بۇل دارىگەرلەر, مۇعالىمدەر, بالاباقشا تاربيەشىلەرى, سۋرەتشىلەر, سپورتشىلار, قۇتقارۋشىلار, ءورت سوندىرۋشىلەر, جۋرناليستەر جانە الەۋمەتتىك سالا قىزمەتكەرلەرى. جاستار باعدارلاماسى بويىنشا قاتىسۋشىلار ءۇشىن باستاپقى جارناسى نەبارى 10 پايىز.
ءىس-شارانىڭ اشىلۋىندا ءسوز سويلەگەن الماتىداعى «وتباسى بانك» فيليالىنىڭ ديرەكتورى داناگۇل ءتۇسىپوۆا پاتەرلى بولعان جاستاردى قۇتتىقتاپ, بيىل وتباسى بانكىنىڭ قۇرىلعانىنا 20 جىل تولعانىن اتاپ ءوتتى.
«2003 جىلى گەرمانيالىق جيناقتاۋ ۇلگىسىنە سۇيەنە وتىرىپ «تۇرعىن ءۇي قۇرىلىس جيناق بانكى» (بۇگىندە وتباسى بانك) قۇرىلعان بولاتىن. وسى جىلدار اياسىندا قارجى قۇرىلىمى بىرنەشە رەت وزگەرىستەردى باسىنان وتكەردى, سونىمەن قاتار جاڭا باعدارلامالارى دا پايدا بولدى. بۇگىندە بانك سالىمشىلارىنىڭ سانى 2,6 ملن ادامنان استى. ەلىمىزدەگى يپوتەكانىڭ 70 پايىزى وتباسى بانك ارقىلى جۇزەگە اسىرىلۋدا. بىزبەن بىرلەسىپ جۇمىس ىستەۋگە اتسالىسقان الماتى قالاسىنىڭ اكىمدىگىن ەرەكشە اتاپ وتكىم كەلەدى. اكىمدىك 2017 جىلدان بەرى الماتى جاستارى باعدارلاماسى ارقىلى باسپانالى بولعىسى كەلەتىن جاس ماماندارعا ۇلكەن قولداۋ كورسەتۋدە. بيىل بولىنگەن قاراجاتقا الماتىلىق 1100 جاس باسپانالى بولادى», دەدى داناگۇل ءتۇسىپوۆا.
اتالمىش باعدارلاما ارقىلى ءوز باسپاناسىنا قول جەتكىزگەندەردىڭ اراسىندا مەديتسينا سالاسىنىڭ قىزمەتكەرى كوپ. سولاردىڭ ءبىرى - سىرعاباەۆا اقسۇلتان.
«بۇعان دەيىن وتباسى بانكىنىڭ تۇراقتى سالىمشىسى ەدىم. باعدارلاماعا قاتىسىپ, ماقۇلداۋ العاننان كەيىن ءۇي تاڭداۋعا ءبىر ايداي ۋاقىتىم بولدى. مىنە بۇگىن 5 پايىزدىق (جتسم 5,2% باستاپ) مولشەرلەمەمەن 8 جىلعا جەڭىلدەتىلگەن زاەم الدىم. اي سايىنعى تولەمى قالتاما سالماق تۇسىرمەيتىنى قۋانتادى. بۇل ءبىز سياقتى قاراپايىم ەڭبەك ادامدارى ءۇشىن ۇلكەن مۇمكىندىك», دەدى ول.
جالپى 2017 جىلدان بەرى «الماتى جاستارى» باعدارلاماسىنىڭ قارجىلاندىرۋ كولەمى 72,5 ملرد تەڭگەنى قۇراپ, ونىڭ كومەگىمەن 4 مىڭنان استام الماتىلىق قونىس تويىن تويلادى.
