مۇنداي وي كول جاعالاۋىندا سەرۋەندەپ جۇرگەندە كەلىپتى. تولقىننىڭ ءتۇسى وزگەرگەنىن اڭعارعان. كولگە قۇيىلاتىن قوقىستىڭ كولەمى جىل سايىن كۇرت كوبەيىپ كەلە جاتقاندىعىن سان مارتە ەستىپ ەدى. ەندى مىنە, ءوز كوزىمەن كورىپ تۇر. بۇل جايت جەرگىلىكتى جەردىڭ ماسەلەسى عانا ەمەس, جاھاندىق ەكولوگيالىق پروبلەمالاردىڭ سويى. كورىكتى كوكشەنىڭ باۋىرىنداعى جۇزدەگەن كول مەن وتكەل بەرمەس وزەن حيميالىق, بيولوگيالىق جانە فيزيكالىق زاتتاردان لاستانعان.
تيمۋر ۇستازىنىڭ جەتەكشىلىك ەتۋىمەن وسى ماسەلەنى قاۋزاپ, تەرەڭىرەك زەرتتەي باستادى. بۋراباي كۋرورتتىق ايماعىنداعى كولدەردىڭ دە لاستانۋ سەبەپتەرىن سارالادى. سۋدى قايتارىمسىز الۋ, سۋ جيناۋ الاڭىنىڭ وندىرىستىك جانە تۇتىنۋ قالدىقتارىمەن, جاعالاۋ بەلدەۋلەرى مەن جاعاجايلاردىڭ قوقىستارمەن لاستانۋى – باستى سەبەپتىڭ ءبىرى. بۇل فاكتورلار بۋلانۋ ۇدەرىستەرىمەن بىرگە كولدەردىڭ تەمپەراتۋراسىنىڭ وزگەرۋىنە اكەلەدى. تەمپەراتۋرانىڭ جوعارىلاۋى سۋ وسىمدىكتەرىنىڭ دامۋىنا ىقپال ەتىپ, سونىڭ سالدارىنان شوگىندىلەر كوبەيىپ, سۋ ساپاسى ناشارلاي تۇسەدى.
– وسى ماسەلەلەردىڭ شەشىمى رەتىندە ءبىز سۋ نىساندارىن جوعارى تيىمدىلىكپەن تازارتۋعا قابىلەتتى روبوتتى ۇسىنامىز. روبوت سۋ بەتىندەگى سىرتقى قوقىس پەن لايدى جيناۋعا نەگىزدەلگەن, – دەپ وي ءبولىستى تيمۋر ريابوۆ.
روبوتتى سىناۋ بۋراباي اۋدانىنىڭ اۋماعىنداعى زابوي كولىندە جۇرگىزىلدى. نەگىزگى ماتەريال ءۇشىن پەنوپلەكس پەن سينتەتيكالىق ماتا تاڭدالدى.
– روبوتقا ءبىز Arduino Uno نەگىزىندەگى mCore ءچيپىن ونىڭ قولجەتىمدى باعاسى مەن مۇمكىندىكتەرىنە بايلانىستى تاڭدادىق. باسقارۋ كودى موتورلارمەن Arduino تىلىندە جازىلعان, – دەپ تولىقتىردى ءسوزىن جوبا جەتەكشىسى, ء«بىلىم-يننوۆاتسيا» ليتسەي-ينتەرناتىنىڭ ماتەماتيكا ءپانىنىڭ مۇعالىمى ولجاس قادىروۆ.
قوزعالتقىشتار رەتىندە ونەرتاپقىشتار Arduino جيىنتىعىنان تۇراقتى توق قوزعالتقىشتارىن تاڭدادى. نەبارى 6 ۆولتتى تۇتىناتىن 800 gf قوزعالتقىشىنىڭ جوعارى شەگى وتە جاقسى جۇمىس ىستەيدى. تيمۋر وسى جۇمىسىن رەسپۋبليكالىق كونفەرەنتسيانىڭ «ومىرلىك ورتانىڭ ەكولوگياسى» سەكتسياسىندا كوپشىلىك نازارىنا ۇسىنىپ, جۇلدەلى ەكىنشى ورىندى جەڭىپ الدى.
ساراپشىلار جوباعا جاقسى باعا بەرۋمەن قاتار, روبوتتى كۇن پانەلدەرى, جەل گەنەراتورلارى جانە GPS جۇيەسىمەن جابدىقتاۋدى ۇسىندى. بۇل ونەرتابىستىڭ مۇمكىندىگىن ەداۋىر كەڭەيتەتىنى انىق.
اقمولا وبلىسى,
بۋراباي اۋدانى
