TarihShy AI – جاساندى ينتەللەكت نەگىزىندە جاسالعان قازاقستان تاريحىن زەردەلەيتىن ۆەب-قوسىمشا. قولدانۋشىلار حاندار مەن بيلەر, الاش زيالىلارىمەن تاريح پەن تۇلعالاردىڭ وزدەرى تۋرالى تىلدەسەدى. جاۋاپتى اۋديو, ۆيدەو نەمەسە ءماتىن تۇرىندە الادى. قوسىمشادا تۇلعالاردان اقىل سۇراۋعا دا بولادى. ولار وزدەرىنە بەرىلگەن ءرول مەن ءومىربايانى ارقىلى كەڭەس بەرەدى. جوبانىڭ ماقساتى – وتكەنىمىزدى جاڭا ادىستەرمەن ۇيرەنۋگە مۇمكىندىك جاساۋ. بالالارعا جاستايىنان تاريحتى تانىتىپ, وقۋشىلار مەن ستۋدەنتتەرگە وقۋ ءۇردىسىن جەڭىلدەتۋ. قازىر ۆەب-قوسىمشانى تۇراقتى قولدانۋشىلار سانى مىڭنان استى.
– ءوزىم تاريحىمىزعا قاتتى قىزىعاتىنمىن, تەرەڭ زەرتتەيتىنمىن. بىراق باسقا ادامداردان ونداي قىزىعۋشىلىق بايقامادىم. سودان وزگەلەردى تاريحىمىزعا قىزىقتىرعىم كەلدى. ينتەرنەتتەن ىزدەۋگە, كىتاپ اقتارىپ وتىرۋعا ءبىراز ۋاقىت پەن كۇش كەتەدى. ال TarihShy AI – ناقتى ءارى دالەلدەنگەن دەرەكتەر جيناقتالعان قولايلى قوسىمشا, – دەيدى التىنبەك جولدىباي.
ول وسى جازدا جاساندى ينتەللەكت ونىمدەرىن ازىرلەۋ بويىنشا ەلىمىزدىڭ IT-ينكۋباتورىنا قاتىسقان. بۇل ءونىم – سول جوبانىڭ جەمىسى. جالپى, TarihShy AI تەحنيكالىق جاعىنان كۇردەلى. دەرەكتەر بازاسى پالەوليت زامانىنان باستاپ قازىرگە دەيىنگى اقپاراتتاردى قامتيدى. اقپارات ۆەكتورلىق دەرەكتەر بازاسىنا جينالعان. سول ارقىلى جاساندى ينتەللەكت سايكەستىك ىزدەيدى. اقپاراتتى وڭدەۋ ءۇشىن جانە جاۋاپ قۇرۋ ءۇشىن gpt-3.5-turbo مودەلىن قولدانعان.
– دەرەكتەردى تۇگەلدەي ينتەرنەتتەن, كىتاپتان الىپ, ونى ءوزىم قولمەن جينادىم. قازىر TarihShy AI ءوزىم قالاعانداي جۇمىس ىستەپ تۇر. تەك سەرۆەر بولىگىندە اقاۋلار بولىپ تۇرادى, بىراق ول شەشىلەتىن ماسەلە. جوسپار بويىنشا TariShy AI تەك ۆەب-قوسىمشا رەتىندە قالماي, اۋقىمدى جوباعا اينالادى, – دەيدى «Computer Systems and Software» ماماندىعىندا ءبىلىم الىپ جاتقان التىنبەك.
McKinsey جاھاندىق ينستيتۋتىنىڭ سوڭعى بولجامدارىنا سايكەس, گەنەراتيۆتى جاساندى ينتەللەكتتەر جىل سايىن الەمدىك كورپوراتيۆتىك كىرىستى 2,6 ترلن دوللاردان 4,4 ترلن دوللارعا دەيىن ۇلعايتتى. وتاندىق IT-ونىمدەر نارىعى الەمنىڭ تۇكپىر-تۇكپىرىندەگى جاساندى ينتەللەكت تەحنولوگيالارىن پايدالاناتىن ينۆەستورلاردىڭ نازارىن اۋدارتىپ وتىر. جۇسىپبەك ايماۋىتوۆتىڭ «وقىعاندار! بۇل ۋاقىت – جان تىنىشتىق ىزدەيتىن, قىزىق قۋاتىن ۋاقىت ەمەس, قىزمەت قىلاتىن, ەڭبەك سىڭىرەتىن ۋاقىت» دەگەن ءسوزى ءالى تالاي قازاق بالاسىن شىڭعا شىعارارى انىق.
