الايدا ءالى 56 مىڭ گەكتار جەر بويىنشا سوت پروتسەسى ءجۇرىپ جاتىر. ىلە اۋدانىنداعى كاسىپكەرلىك نىساندارىنا ينفراقۇرىلىم تارتۋ بويىنشا دا جەرلەر زاڭسىز بەرىلگەن.
«الماتى وبلىسىنىڭ مامانداندىرىلعان اۋدانارالىق سوتىنىڭ شەشىمدەرىمەن ىلە اۋدانىندا 11 020,808 گەكتار جەر تەلىمى جانە جالپى كولەمى 4920 گەكتار 14 اۋىل شارۋاشىلىعى جەرى مەملەكەت مەنشىگىنە قايتارىلدى. مىسالى, كولەمى 2 مىڭ گا بولاتىن جەر ءبىر عانا ادامعا تيەسىلى بولعان, ول جەر كەرى قايتارىلدى», دەپ حابارلادى الماتى وبلىسىنىڭ سىبايلاس جەمقورلىققا قارسى قىزمەتى.
اگەنتتىك مىڭداعان گەكتار جەردى الىپ السا دا, بىردە ءبىر مالى جوق «قوجالىقتاردى» دا انىقتاعان. جۇرگىزىلگەن جۇمىستاردىڭ ناتيجەسىندە بالقاش اۋدانىنىڭ وزىندە 1 700 گا اۋىل شارۋاشىلىعى ماقساتىنداعى جەر انىقتالىپ, مەملەكەت مەنشىگىنە ءوتتى. جەر يەلەنۋشى 23 ادامنىڭ جايىلىمدىق جەرلەرىندە مال باسى جوق بولىپ شىققان. قازىرگى ساتتە الماتى وبلىسى بويىنشا سىبايلاس جەمقورلىققا قارسى دەپارتامەنتتىڭ باستاماسى ارقىلى جامبىل اۋدانى جەردىڭ يەلەرىمەن سوتتاسىپ جاتىر.
دەپارتامەنت ءباسپاسوز قىزمەتىنىڭ حابارلاۋىنشا, ەڭبەكشىقازاق اۋدانىندا جالپى كولەمى 327 گا بولاتىن 5 اۋىل شارۋاشىلىعى جەر تەلىمى, قاراساي اۋدانىندا جالپى كولەمى 360,0 گا 2 اۋىل شارۋاشىلىعى ماقساتىنداعى جەر, كەگەن اۋدانىندا جالپى كولەمى 269,0 گەكتار 2 اۋىل شارۋاشىلىعى ماقساتىنداعى جەر. قوناەۆ قالاسىندا الماتى وبلىسىنىڭ مامانداندىرىلعان اۋدانارالىق سوتىنىڭ قاۋلىلارىمەن جالپى كولەمى 183,6 گەكتاردى قۇرايتىن 3 اۋىل شارۋاشىلىعى ماقساتىنداعى جەر تەلىمى مەملەكەت مەنشىگىنە قايتارىلدى. سىبايلاس جەمقورلىق تاۋەكەلدەرىن سىرتتاي تالداۋ ناتيجەسىندە الماتى وبلىسىنىڭ جامبىل اۋدانىندا 55 644 گەكتار پايدالانىلمايتىن اۋىل شارۋاشىلىعى جايىلىمدارى انىقتالدى.
