جارىستى ەركىن كۇرەس شەبەرلەرى باستادى. العاشقى كۇنى بوز كىلەمگە شىققان ءتورت جەرلەسىمىزدىڭ ۇشەۋى تۇساۋكەسەر كەزدەسۋلەرىندە ءسۇرىندى. 61 كيلو سالماقتاعى ءوسىمجان داستانبەك امەريكالىق ۆيتالي ورۋدجەۆتەن 0:10 ەسەبىمەن ۇتىلدى. اقش سپورتشىسىنىڭ اكەسى دە كەزىندە مىقتى بالۋان بولعان. تەگى ازەربايجاندىق ۆۋگار ورۋدجەۆ توقسانىنشى جىلدارى كسرو, بەلارۋس جانە رەسەي قۇرامالارى ساپىندا ونەر كورسەتىپ, بارسەلونا وليمپياداسىنىڭ قولا جۇلدەگەرى جانە الەمنىڭ ەكى دۇركىن چەمپيونى اتاندى. ال ءۆيتاليدىڭ ءوزى پانامەريكا بىرىنشىلىگىنىڭ ەكى دۇركىن جەڭىمپازى. دەسەك تە ءوسىمجان ءۇشىن جارىس ءالى اياقتالعان جوق. ورۋدجەۆ فينالعا شىققانىنىڭ ارقاسىندا ول جۇبانىش بەلدەسۋلەردە باق سىناۋ مۇمكىندىگىنە يە بولدى.
70 كيلو سالماقتاعى سانجار دوسجانوۆتىڭ جاستار اراسىنداعى ەۋروپا چەمپيونى, ياشار دوعۋ مەموريالىنىڭ جەڭىمپازى, ازەربايجاندىق ماگومەد-باشير حانيەۆكە ءالى جەتپەدى. بۇل باسەكە 2:9 ەسەبىمەن اياقتالدى. 125 كيلو سالماق دارەجەسىندە كۇش سىناسقان يۋسۋپ باتىرمۇرزاەۆ امەريكانىڭ الىبى, جاستار اراسىنداعى الەم چەمپيونى مەيسون پەرريستىڭ تەمىر قۇرساۋىنان قۇتىلا الماي, تاس-تالقان بولىپ جەڭىلدى – 0:10.
جارىستىڭ العاشقى كۇنى قازاق جانكۇيەرلەرىن ازامات داۋلەتبەكوۆ قانا قۋانتتى. 86 كيلو سالماقتا ايقاسقان ول باستاپقى باسەكەدە ليتۆالىق دومانتاس پاۆليۋچەنكونى 9:0 ەسەبىمەن ويسىراتا ۇتسا, كەلەسى كەزەڭدە جاسوسپىرىمدەر مەن جاستار اراسىنداعى قۇرلىق چەمپيونى, الەم بىرىنشىلىگىنىڭ كۇمىس جۇلدەگەرى, يۆان يارىگين كۋبوگىنىڭ يەگەرى, رەسەيلىك ارسلان باگاەۆتى قوس جاۋرىنىمەن جەرگە قادادى. شيرەك فينالدا فرانتسيانىڭ تۋى استىندا ونەر كورسەتىپ جۇرگەن جاستاردىڭ ەۋروپا چەمپيوناتىنىڭ ەكى دۇركىن جەڭىمپازى, چەشەنستاندىق راقىم ماگامادوۆقا سوقىر ۇپاي دا ۇستاتاي, ايقىن باسىمدىقپەن جەڭدى – 10:0. جارتىلاي فينالدا داۋلەتبەكوۆ اقش-تىڭ اتاقتى بالۋانى, وليمپيادا مەن الەمنىڭ ەكى دۇركىن چەمپيونى دەۆيد تەيلورعا جول بەردى. ەندى قازاق بالۋانى قولا مەدال ءۇشىن تالاسادى.
كەشە اتالعان سالماق دارەجەلەرى بويىنشا التىن جانە قولا مەدال ءۇشىن بەلدەسۋلەر ءوتتى. باس جۇلدە ءۇشىن مىنا بالۋاندار كۇش سىناستى: 61 كيلو – ۆيتالي ورۋدجەۆ (اقش) پەن اباسگادجي ماگومەدوۆ (رەسەي), 70 كيلو – ءامير يازداني (يران) مەن زەين رەزەرفورد (اقش),
86 كيلو – حاسان يازداني (يران) مەن دەۆيد تەيلور (اقش) جانە +125 كيلو – ءامير زارە (يران) مەن گەنو پەترياشۆيلي (گرۋزيا).
