«دامۋ» قورىنىڭ اتىراۋ وبلىستىق فيليالى ديرەكتورىنىڭ ورىنباسارى ەرنار جۇماعاليەۆتىڭ مالىمەتىنشە, 2013 جىلى بيزنەستى قولداۋ جانە دامىتۋ باعدارلامالارى ىسكە قوسىلعاننان بەرى نەسيە سوماسى 255,2 ملرد تەڭگە بولاتىن 4 047 جوباعا سۋبسيديا بەرىلگەن. كاسىپكەرلەردىڭ 3 276 جوباسى «دامۋ» قورىنان 35,4 ملرد تەڭگەنىڭ كەپىلدىگىن العان. مۇنداعى نەسيە سوماسى 71,8 ملرد تەڭگەنى قۇرايدى.
«كاسىپكەرلەردىڭ «پايىزدىق مولشەرلەمەنى سۋبسيديالاۋ» باعىتىمەن 23,9 ملرد تەڭگەدەن اسا قارجىنى قۇراعان 428 جوباعا قولداۋ كورسەتىلدى. «كاسىپكەرلىكتى دامىتۋ جونىندەگى 2021-2025 جىلدارعا ارنالعان ۇلتتىق جوبا» شەڭبەرىندە نەسيە سوماسى 14,4 ملرد تەڭگەدەن اسا 425 جوبا بار. ال «قاراپايىم زاتتار ەكونوميكاسى» باسىم جوبالارىن نەسيەلەۋ تەتىگىمەن قۇنى 9,5 ملرد تەڭگەدەن اساتىن 3, «كەپىلدەندىرۋ» باعىتىمەن 11,9 ملرد تەڭگەنىڭ 388 جوباسىنا قولداۋ جاسالدى. كاسىپ اشقان كاسىپكەرلەردىڭ جوباسىنا بەرىلگەن كەپىلدىك سوماسى 5,8 ملرد تەڭگەنى قۇرادى», دەيدى ە.جۇماعاليەۆ.
ماسەلەن, ۇلبولسىن ەرۋباەۆا «ريزا» جەكە كاسىپكەرلىگىن قۇرىپ, نەمىس تەحنولوگياسىمەن نان ونىمدەرىن ءپىسىرۋدى قولعا العان. بۇل ءۇشىن گەرمانيادا شىعارىلعان «بۋلكي-حاۋز» ناۋبايحاناسىنىڭ جابدىعىن ساتىپ, جالعا العان ورىنعا ورناتقان. ارينە, وزگە ەلدىڭ تەحنولوگياسىن يگەرۋ وڭاي ەمەس. سول سەبەپتەن اۋەلى شەتەلدىك تەحنولوگيامەن نان ءپىسىرۋ ءادىسىن زەرتتەپ, كەيىن باشقۇر اسپازدارىنان كەڭەس العان.
«مەنىڭ كاسىبىم عيماراتتى جالداۋمەن باستالدى. جەكە عيمارات ساتىپ الۋعا مۇمكىندىگىم بولمادى. ويتكەنى تسەرەبرالدى سال اۋرۋىنا شالدىققان بالام بار. وعان ۇدايى ەمدىك كۋرس الۋ قاجەت. ونى ۇدايى قولداۋ ءۇشىن السىزدىك تانىتپاۋعا بەكىندىم. قازىر ەكى جەكە اسپازدىق دۇكەنىم جۇمىس ىستەپ تۇر», دەيدى ۇ.ەرۋباەۆا.
قازىر ونىڭ اسپازدىق دۇكەندەرىندە نان ونىمدەرىنىڭ 30 ءتۇرى پىسىرىلەدى. تۇتىنۋشىعا ءتاتتى جانە نىرلەندىرىلگەن ونىمدەردىڭ 100 ءتۇرىن ۇسىنادى.
«بانكتەن العان نەسيەمە «بيزنەستىڭ جول كارتاسى – 2025» مەملەكەتتىك باعدارلاماسى ارقىلى جىلدىق مولشەرلەمەسى 14 پايىزدىق سۋبسيدياعا يە بولدىم. قازىر 6 پايىزىن عانا تولەيمىن. ايىرماسىن مەملەكەت سۋبسيديالايدى. «دامۋ» قورىنىڭ كەپىلدىگى نەسيە سوماسىنىڭ 85 پايىزىن قۇرايدى. بۇل – بىزگە ۇلكەن قولداۋ», دەيدى ۇ.ەرۋباەۆا.
وسىنداي دەمەۋدى سەزىنىپ وتىرعان كاسىپكەردىڭ قاتارىندا گۇلبانۋ عايداروۆا دا بار. ول ۇلتتىق ناقىشتاعى توي كيىمدەرىنىڭ سالونىن اشقان.
«مەنىڭ نەگىزگى ماماندىعىم – باستاۋىش سىنىپتارداعى اعىلشىن ءتىلى ءپانىنىڭ مۇعالىمى. الايدا ەڭبەك جولىمدى باستار ساتتە الدىمدا ەكى تاڭداۋ تۇردى. ءبىرى – ماماندىعىممەن جۇمىسقا ورنالاسۋ, ەكىنشىسى – توي كويلەكتەرىنىڭ سالونىن اشۋ. ويتكەنى بالا كەزىمنەن قۋىرشاقتارعا اق ماتادان قالىڭدىقتىڭ كويلەگىن تىككەندى ۇناتۋشى ەدىم», دەيدى گ.عايداروۆا.
ءبىر قىزىعى, ءوزىنىڭ تويىندا كيگەن قالىڭدىقتىڭ كويلەگى مەن ساۋكەلەنى ساتىپ الماعان. ەكەۋىن دە ءوزى تىككەن. بۇعان, ارينە, تۋىستارى مەن دوستارىنىڭ ءبارى تاڭدانىس ءبىلدىرىپتى.
«وسىدان كەيىن ۇلتتىق ناقىشتا كيىم تىگەتىن شەبەرحانا اشۋعا بەل بايلادىم. قازىر «سىرعا سالۋ», «قىز ۇزاتۋ» سالتاناتىنا تاپسىرىس كوپ تۇسەدى. 11 جىلدان بەرى ۇلتتىق كيىمدەردى تىگۋدى كاسىپ ەتىپ كەلەمىن. اتىراۋ, اقتاۋ, ورال جانە اقتوبە قالالارىنان تويعا ارنالعان كيىمدەردىڭ سالونىن اشتىم. كاسىبىمدى وركەندەتۋگە «دامۋ» قورى ارقىلى يە بولعان 14 پايىزدىق سۋبسيديانىڭ كومەگى ءتيىپ تۇر. قور 30,1 ملن تەڭگەگە كەپىلدىك بەردى. ءوزىم بانكتىك مولشەرلەمەنىڭ 5 پايىزىن تولەيمىن», دەيدى گ.عايداروۆا.
قوردىڭ كەپىلدىگىمەن ءىسىن جانداندىرىپ وتىرعان لاۋرا قۇسمانوۆا دا اتىراۋ قالاسىنىڭ ەكى شاعىن اۋدانىنان «التىن ساقا-1», «التىن ساقا-2» بالاباقشاسىن اشقان. قازىر ەكى بالاباقشاعا 350-گە جۋىق بالا بارىپ ءجۇر. عيماراتتار قاجەتتى قۇرال-جابدىقتارمەن, جيھازدارمەن, تۇرمىستىق تەحنيكامەن, ويىن الاڭدارىمەن جابدىقتالعان. بالالارعا بەس مەزگىل تاماق بەرىلەدى. ولارعا مەكتەپكە دەيىنگى ساباق قازاق جانە ورىس تىلىندە «قارلىعاش», «زەرەك بالا» وقۋ جوسپارىمەن جۇرگىزىلەدى.
ەندى كاسىپكەر كاسىبىن كەڭەيتىپ, وقۋ-شىعارماشىلىقتى باعىتتى ۇستاناتىن سپورت ورتالىعىن اشۋعا بەل بايلاپتى. مۇندا سپورتتىڭ ءتۇر-ءتۇرى مەن بيگە, اسپاپتىق جانە اقپاراتتىق تەحنولوگياعا باۋليتىن ۇيىرمەلەر اشىلادى.
ال «Grant med group» جشس ستوماتولوگيالىق ەمحانانى اشۋدى قولاي كورىپتى. ويتكەنى كەيىنگى جىلدارى مەديتسينانىڭ بۇل قىزمەتىنە جۇگىنەتىندەر كوبەيگەن. سول سەبەپتەن «دامۋدىڭ» دەمەۋىمەن قىزمەتىن باستاعان جاڭا يننوۆاتسيالىق ەمحانانىڭ تۇراقتى كەلۋشىلەر شوعىرى قالىپتاسقان.
اتىراۋ وبلىسى
