وڭىردەگى اۋرۋحانالار احۋالى

كەزدەسۋدە كرەديتورلىق بەرە­شەك­تى وتەۋ ماسەلەسىنە ەرەكشە نازار اۋدارىلدى. مۇنداعى بەرەشەك 800 ملن تەڭگەنى قۇراعان. بۇل سوما پاندەميا سالدارىنان ەلدە اۋرۋحاناعا جوسپارلى جات­قىزۋ توقتاتىلعان كەزدە جيناق­تالىپتى. قازىرگى تاڭدا مە­ديتسينالىق ۇيىم دەبەت پەن كرە­ديت اراسىنداعى تەپە-تەڭدىكتى ساق­تاپ, كەلىسىمشارتتار كەستەسىنە سايكەس ورىنداۋدى ۋاقىتىلى جۇر­گىزىپ جاتىر. كەزەڭدەر دە وڭ سال­دومەن جابىلىپ وتىر.

ء«بىز قىزمەت جەلىسىن ساق­تاپ كەلەمىز. بىراق وسىنىڭ وزى­نە كوپ كۇش-جىگەر جۇمسالادى. نارازىلىق تا جوق ەمەس. شىن­دى­عىنا كەلسەك, بىزگە جۇگىنەتىن ناۋقاستاردىڭ ۇشتەن ءبىرىن عانا ەمدەپ وتىرمىز. ورتا ەسەپپەن 30 مىڭعا جۋىق ناۋقاس كەلەدى, ولاردىڭ ءبىرازىن امبۋلاتورلىق ەمگە قابىلدايمىز. سو­نىمەن قاتار اۋرۋحاناعا شۇعىل جاتقىزۋ ۇلە­سى جىل سايىن تومەندەپ بارادى, قازىر ول شامامەن 65%-عا تەڭ. قيىن ناۋقاستاردى وزى­مىزدە قالدىرىپ, دەرتى جەڭىل ناۋ­قاستاردى اۋدانعا نەمەسە امبۋ­لا­توريالىق جاتقىزۋعا, كەيبىرىن كۇندىزگى ستاتسيوناردا ەمدەتۋ ارقىلى اۋرۋحاناعا شۇعىل جات­قىزۋ ۇلەسىن ازايتۋدامىز», دەيدى الماتى كوپسالالى كليني­كا­لىق اۋرۋحاناسىنىڭ باس ديرەكتورى جۇماعالي يسمايلوۆ.

جىل باسىندا اۋرۋحانادا كرەديتورلىق بەرەشەك قالىپ­تاس­قانىمەن, بۇگىندە ونىڭ ءبارى وتەلگەن. باس دارىگەر شىعىندى وڭ­تايلاندىرۋدىڭ ءتيىمدى ءبىر جولى بارىن ەسكە سالدى. بۇل – دارىلىك زاتتار بويىنشا رەۆيزيا جۇرگىزۋ.

«اتالعان تىزىمدە 600-دەن اسا دۇنيە­ بار. كلينيكالىق فارماكولوگتى شا­قىرىپ, اپتالاپ جۇمىس ىستەدىك. سونىڭ ناتيجەسىندە تىزىم­دە 300 ءتۇرلى ءدارى-دارمەك قانا قال­دى. مىسالى, كەيبىر دارىلەردىڭ 12 ءتۇرلى انالوگى ساتىپ الىن­عان. قازىر قاجەتسىز ساتىپ الۋلار كۇرت تومەندەدى. سونداي-اق باعا سايا­ساتىن دا قايتا قارادىق. ەندى مە­ديتسينالىق اقپاراتتىق جۇيەنى «1س: بۋحگالتەريا» جۇيەسىمەن باي­لانىستىرساق دەيمىز. بۇل ءدارى-دارمەكتەردى اۆتوماتتى تۇردە ەسەپتەن شىعارۋ ءۇشىن كەرەك», دەدى اۋرۋحانا باسشىسى.

ينفراقۇرىلىمنىڭ ەسكىلىگىنە قارا­ماس­تان, الماتى كوپسالالى كلينيكالىق اۋرۋحاناسى كارديوحيرۋرگيا, ورتوپەديا, لور جانە كارديوحيرۋرگيا بويىنشا 27 جوعارى تەحنولوگيالىق مەديتسينالىق كومەك ءتۇرىن ۇسىنادى. ال كارديوحيرۋرگيا بويىنشا كومەك وبلىستا تەك وسىندا عانا كورسەتىلەدى. قازىرگى ۋاقىتتا جاڭا عيمارات سالىنىپ جاتىر. كورسەتىلەتىن مەديتسينالىق كومەك تۇرلەرىن كەڭەيتۋ جوسپارلانعان.

قور باسشىسى بۇدان كەيىن تالعار اۋدانىنداعى بەساعاش جانە تۇزدىباستاۋ اۋىلدارىنىڭ 14,8 مىڭ تۇرعىنىنا قىزمەت كور­سەتەتىن «Promedical» مەدي­تسي­نالىق ورتالىعىنا باردى. كلي­نيكا بيىلدان باستاپ ءمامس بويىنشا جۇمىس ىستەيدى. ور­تا­لىق ديرەكتورى نۇرلان ەسمۇ­را­توۆتىڭ ايتۋىنشا, مۇندا 7 ۋچاس­كە قۇرىلعان, ونىڭ 2-ءۋى – پە­دياتريالىق.

«اۋىل تۇرعىندارى اۋدان ورتالىعىنا نەمەسە قالاعا بارماي-اق ەمحانادا قاجەتتى تەكسەرۋدەن وتە الادى. سالىستىرمالى تۇردە العاشقى مەديتسينالىق-سانيتارلىق كومەك كورسەتەتىن شاعىن مەكەمەدە جالپى تاجىريبە دارىگەرى مەن نەگىزگى ماماندار عانا ەمەس, سونىمەن قاتار اللەرگولوگ, رەۆماتولوگ, گەپاتولوگ, دەرماتوۆەنەرولوگ, اندرولوگ سىندى وبلىس اۋماعىنان تابىلۋى قيىن دارىگەرلەر بار. كلينيكا باسشىلىعى پاتسيەنتتەرىنە ءارتۇر­لى مەديتسينالىق قىزمەتتەرگە قول­جەتىمدىلىكتى قامتاماسىز ەتۋ ارقىلى جۇمىستى دۇرىس ۇيىم­داستىرىپ وتىر. ناتيجەسىندە, تىركەلگەن حالىق سانى دا ارتىپ كەلەدى», دەدى س.احمەتوۆ.

قاراساي كلينيكالىق كوپسا­لا­لى ورتالىق اۋداندىق اۋرۋحاناسى – ستاتسيو­نار قىزمەتىن ۇسىناتىن قاسكەلەڭدەگى جال­عىز اۋرۋحانا. سوندىقتان پاتسيەنت­تەردىڭ اعى­نى ايتارلىقتاي جوعارى. تاۋ­لىگىنە 500-گە جۋىق ادام كەلەدى. اتاپ وتەرلىگى, ولاردىڭ دەنى شۇعىل جاعدايمەن جۇگىنەدى. بۇل – بارلىق اۋرۋحاناعا ءتان پروبلەما. ەگەر ەمحانالار ديسپانسەرلىك پاتسيەنتتەردى ءتيىستى تۇردە باقىلاپ, ولاردى الاڭداتارلىق احۋالعا جەت­كىزبەي امبۋلاتوريالىق-ەم­حا­نا­لىق باعىتتا ەمدەلسە, جاع­داي ءىشىنارا جاقسارار ەدى. وسى­نىڭ سالدارىنان قاراساي كليني­كا­لىق كوپسالالى ورتالىق اۋدان­دىق اۋرۋحاناسى شۇعىل تۇر­دە تۇ­سۋشىلەرگە ءتيىستى كومەك كور­سەتۋ ءۇشىن اۋرۋحاناعا جوسپارلى جات­قىزۋدى توقتاتۋعا ءماجبۇر.

قوناەۆ قالاسىنىڭ قالالىق كوپ­بەيىندى اۋرۋحاناسىندا ۋرو­لو­گيالىق جانە لور-بەيىندى توسەك­تەرى بار حيرۋرگيا بولىمشەسى, جاق-بەت حيرۋرگياسى توسەكتەرى بار تراۆماتولوگيا جانە نەي­روحيرۋرگيا بولىمشەسى, گينەكولو­گيا جانە پەرزەنتحانا بولىمشەسى, پۋلمونولوگيا توسەكتەرى بار نەۆرولوگيا­ تەراپياسى بولىمشەسى, رەانيماتسيا بو­لىمشەسى, بالالار سوماتيكالىق بو­لىمشەسى جانە وبلىستاعى جالعىز ين­فەك­تسيا­لىق بولىمشە بار. مۇندا ايماق­تاعى وزگە اۋرۋحانالار سياق­تى قار­جى­لاندىرۋدىڭ شەك­تەۋلى بولۋىنا باي­لانىس­تى ستاتسيونارلاردىڭ تولىق جۇك­تە­مە­سى جوق. بىراق قاجەتتىلىك جوعا­رى. ويت­كەنى مۇ­نىڭ وبلىس ورتالىعىنداعى جال­عىز اۋرۋحانا ەكەنىن ەسكەرۋ كەرەك.

اۋرۋحانانى 2017 جىلدان بەرى باسقارىپ كەلە جاتقان باس دارىگەر ايمان راقىشەۆا 2023 جىلدىڭ ەرەكشە قيىن بولعانىن ايتتى. وسى ۋاقىتقا دەيىن مۇندا ەشقاشان كرەديتورلىق بەرەشەككە جول بەرىلمەگەن. الايدا مەديتسينالىق قىزمەتكەرلەردىڭ جالاقىسىن كوتەرۋ مىندەتتەمەلەرىن ورىنداۋ قاجەت­تىلىگىنە بايلانىستى جالاقى قورى بويىنشا شىعىندار 82%-عا دەيىن وسكەن. سونداي-اق «سق-فارماتسيامەن» ەسەپ ايىرى­سۋدا ماسەلە بارى تىلگە تيەك بولدى.

مەديتسينالىق ۇيىمداردى ارالاعان ءسابيت احمەتوۆ ۋچاسكەلىك دارىگەرلەرمەن دە اڭگىمەلەستى. ول حالىقتىڭ مەديتسينا­لىق ساقتان­دىرۋ مەن قامتۋ اياسىندا جۇر­گىزىلىپ جاتقان جۇمىستارعا سايكەس ادامداردىڭ ءمامس جارنالارىن تولەۋ قاجەتتىلىگىنە قالاي قاراي­تىنىنا قىزى­عۋشىلىق تانىتتى.

«بۇرىن قيىن بولاتىن. قازىر ادامدار ءمامس ارقىلى تەگىن تەكسەرۋدەن وتۋگە بولاتىنىن بىلەدى, اسىرەسە وپەراتسيا قاجەت كەزدە. ءبىز ساقتاندىرىلعاندار سانى بويىنشا وڭ ديناميكانى بايقاپ وتىرمىز. الايدا بۇل ىسكە دارىگەرلەر عانا ەمەس, اكىمدىك, جۇمىسپەن قامتۋ ورتالىعى جانە سالىقتىق ورگاننىڭ دا قاتىسۋى قاجەت ەكەنىن جەتكىزگىم كەلەدى», دەدى جالپى تاجىريبە دارىگەرلەرى.

الماتى وبلىسى