تەڭىز پورتتارىنداعى مۇنايدى اۋىستىرىپ تيەۋ بويىنشا ەڭ جوعارى ءوسىم – 53%, سونداي-اق پاروممەن تاسىمالداۋ – 12%. وسى قىركۇيەك ايىندا Abu Dhabi Ports Group قاتىسۋىمەن قازاقستاندىق Semurg Invest كومپانياسى سالعان قۇرىق پورتىنداعى جاڭا تەرمينالدان استىقتىڭ ءبىرىنشى پارتياسىن جونەلتۋ كوزدەلىپ وتىر.
ەسىمىزدە بولسا, پرەزيدەنتتىڭ ارنايى تاپسىرماسىنا وراي ەلىمىزدىڭ كولىك-لوگيستيكالىق الەۋەتىن ارتتىرۋ ماقساتىندا وسى جىلدىڭ اقپان ايىنان باستاپ اقتاۋ تەڭىز ساۋدا پورتى جانە ونىڭ قۇرامىنداعى «باۋتينو» جۇك اۋدانى, قۇرىق پورتىنىڭ اۋماقتارى «اقتاۋ تەڭىز پورتى» اەا قۇرامىنا ەنگىزىلدى. ەندى پورتتاردىڭ ينفراقۇرىلىمىن دامىتۋ ىستەرىمەن بىرگە ەكونوميكالىق ايماقتا 2025 جىلدىڭ سوڭىنا دەيىن كونتەينەرلىك حاب قۇرۋ جوسپارلانعان. پورتتاردىڭ ەكونوميكالىق ايماققا قوسىلۋى وڭىرگە الەۋمەتتىك-ەكونوميكالىق تۇرعىدا ەلەۋلى اسەر ەتەدى. سونداي-اق ماڭعىستاۋ وبلىسىنا ينۆەستيتسيالار تارتۋ ءۇشىن قولايلى الاڭعا اينالدىرىپ قانا قويماي, ءىرى حالىقارالىق كولىك دالىزدەرىنىڭ ءبىرى بولۋىنا ۇلەس قوسادى. مۇنىمەن بىرگە پورتتارعا الەمنىڭ ۇزدىك لوگيستيكالىق كومپانيالارىمەن جۇمىس ىستەۋگە جول اشادى.
اقتاۋ تەڭىز پورتى – قۇرعاق جۇكتەر, مۇناي جانە شيكى مۇناي ونىمدەرىن شىعىستان باتىسقا, سولتۇستىكتەن وڭتۇستىككە, سونداي-اق ازەربايجان, يران, تۇرىكمەنستان, رەسەي ەلدەرىنە جۇك تاسىمالدايتىن ايلاق. مۇندا جىلدىق قۋاتى 12 ملن توننالىق 6 مۇناي ايلاعى جۇمىس ىستەيدى. اقتاۋ پورتىنىڭ تاسىمالداۋ ۇلەسى كاسپي تەڭىزىندەگى جالپى تاسىمال كولەمىنىڭ 40%-ىن قۇرايدى. وسى ۋاقىتتا قازاقستان اقتاۋ پورتى ارقىلى حالىقارالىق كولىك دالىزدەرىنىڭ تۇيىنىنە اينالىپ وتىر.
ال قۇرىق پورتىندا 4 ايلاق جۇمىس ىستەيدى. ونىڭ ەكەۋى تەمىرجول ارقىلى كەلگەن جۇكتەردى پارومعا تيەۋگە ارنالسا, قالعان ەكەۋىنەن كولىكتەر تۇسىرىلەدى. قازىرگى ۋاقىتتا پورتتىڭ قىزمەتىن دامىتىپ, جۇك تاسىمالىن ودان ءارى ارتتىرۋ ءۇشىن تاعى ءبىر ايلاق سالۋ جۇمىستارى جۇرگىزىلىپ جاتىر. بۇل ارقىلى سالماعى اۋىر جۇكتەر مەن كونتەينەرلەر تاسىمالدانادى.
وعان قوسا كەلەر جىلدان باستاپ قۇرىق پورتىندا قازاقستاندىق پارومداردى قابىلداۋ جوسپارى بار. بۇل ءوز كەزەگىندە رەسەي جانە يراننىڭ ەكى پورتىمەن جاڭا مارشرۋتتاردىڭ اشىلۋىنا سەپتەسەدى. كەيىنگى جىلداعى گەوساياسي جاعدايعا بايلانىستى قۇرىق پورتىندا جۇك تاسىمالى ارتقان. بيىل جىل باسىنان بەرى مۇندا 550 مىڭ توننادان اسا جۇك تاسىمالدانىپتى. بۇل بىلتىرعى وسى كەزەڭمەن سالىستىرعاندا 2 ەسە كوپ بولىپ تۇر.
