پرەزيدەنت بيىلعى جولداۋىندا سۋ رەسۋرسى ەلىمىزدە وزەكتى ماسەلەنىڭ ءبىرى ەكەنىن ايتتى, سونىمەن قاتار ترانسشەكارالىق سۋ كوزدەرىنە تاۋەلدى ەل ەكەنىمىزدى ءارى سۋ ۇنەمدەلمەسە, تەز تاۋسىلاتىن شەكتەۋلى رەسۋرس ەكەندىگىن ەسكەرتتى, سول سەبەپتى بۇل سالادا زاڭسىزدىققا جول بەرىلمەيتىنىن اتاپ وتكەنى ءمالىم.
«تۇركىستان وڭىرىندە 60-قا جۋىق وزەن بار. سىرداريا - ترانسشەكارالىق رەسپۋبليكالىق ماڭىزى بار ستراتەگيالىق وزەن. وزەندەردىڭ قورشاعان ورتاعا بايلانىستى ماسەلەلەرى «Amanat» پارتياسىنىڭ باقىلاۋىندا. الايدا, ەلىمىزدىڭ وزەندەرىنىڭ ماڭىزدىلىعىنا ءمان بەرىپ, قاۋىپتىلىگىن ەسكەرمەيتىن كاسىپكەرلەر بەلگىلەنگەن سۋ قورعاۋ ايماقتارى مەن بەلدەۋىنە كىرىپ, قۇم مەن تاس جانە وزگە دە پايدالى قازبالاردى وندىرۋمەن تابيعاتقا وراسان زيان كەلتىرىپ وتىر. رۇقساتسىز قازبا جۇمىستارىنان زارداپ شەككەن سىرداريا جانە باسقا دا وزەندەردىڭ ارناسى بۇزىلىپ, ولاردىڭ سۋى تارتىلىپ بارادى. ەلىمىزگە سۋ رەسۋرستارىنىڭ 51 پايىزى كورشى ەلدەردەن كەلەتىنىن دە ۇمىتپاۋىمىز كەرەك», دەدى دەپۋتات.
«Amanat» پارتياسى فراكتسياسىنىڭ مۇشەسى ق.بالابيەۆتىڭ ايتۋىنشا, رۇقساتسىز قازبا جۇمىستارى كەسىرىنەن سىرداريا, ارىس وزەندەرى جاعالاۋلارىندا 70 گەكتارعا دەيىن قازىلعان جەرلەر بار. ال اقسۋ وزەنىنىڭ تابانىنان تاس الۋ كەزىندە 40 مەتر تەرەڭدىككە قازىلعان. عارىشتىق مونيتورينگ ادىستەرىن قولدانۋ كەزىندە وزەندەر جاعالاۋىندا اتالعان وزگەرىستەردىڭ ورىن العانى انىقتالعان.
«وڭىردەگى باسقا وزەندەر دە وسىنداي اۋىر جاعدايدا بولعاندىقتان قۇزىرلى ورگانداردىڭ ارالاسۋىن قاجەت ەتەدى. قازبا جۇمىستارى وسى قارقىندا جالعاساتىن بولسا, سۋ قۇمعا ءسىڭىپ, جاقىن بولاشاقتا سۋسىز قالۋ قاۋپى بار», دەپ دابىل قاقتى دەپۋتات.
دەپۋتاتتىڭ ايتۋىنشا, مۇنداي زاڭسىز ارەكەتتەرگە بايلانىستى «كارەرلەردىڭ جۇمىسى نەلىكتەن بەتىمەن كەتكەن» دەگەن مازمۇندى سۇراق تۋىندايدى. ءاربىر مەملەكەتتىك ورگان ءوز مىندەتىن دۇرىس اتقاراتىن بولسا, بىردە-ءبىر زاڭسىز كارەر بولماس ەدى. ولارعا توسقاۋىل قويىپ, رۇقساتسىز ارەكەتتەرىن ءبىرجولاتا توقتاتۋ كەرەك.
«سىرداريا جانە باسقا دا وزەندەرگە ەكولوگيالىق اپاتقا ۇشىراۋ قاۋپى تونگەنىن ەسكەرىپ, تۇركىستان وڭىرىندەگى وزەندەردىڭ زاڭمەن بەلگىلەنگەن سۋ قورعاۋ ايماقتارى مەن بەلدەۋلەرىندە قازبا جۇمىستارىمەن اينالىسىپ جاتقان كاسىپكەرلەر قىزمەتىنىڭ زاڭدىلىعىن تەكسەرىپ, انىقتالعان زاڭ بۇزۋشىلىقتارعا قاتاڭ پروكۋرورلىق شارالاردى قولدانۋدى, قازبا جۇمىستارىن جۇرگىزۋشى كاسىپكەرلەر تاراپىنان سۋ جانە ەكولوگيا كودەكستەرىندە كورسەتىلگەن زاڭداردىڭ ورىندالۋىن جانە سۋ قورعاۋ ايماقتارى مەن بەلدەۋلەرىن بەلگىلەۋ ەرەجەلەرىنىڭ ساقتالۋىن قاتاڭ باقىلاۋعا الۋدى سۇرايمىن», دەپ تۇيىندەدى قايرات بالابيەۆ.
