نۇرا اۋداندىق پروكۋراتۋراسى 2015 جىلدان بەرى اليمەنت تولەۋدەن جالتارىپ جۇرگەن ەلوردا تۇرعىنىن انىقتادى. قارىز سوماسى 19 ملن تەڭگەنى قۇرادى.
«اۋدان پروكۋراتۋراسى «اكىمشىلىك قۇقىق بۇزۋشىلىق تۋرالى» قازاقستان رەسپۋبليكاسى كودەكسىنىڭ 669-بابىنىڭ 1-بولىگى بويىنشا اكىمشىلىك ءىس قوزعادى. استانا قالاسىنىڭ اكىمشىلىك قۇقىق بۇزۋشىلىق ىستەر جونىندەگى مامانداندىرىلعان اۋدانارالىق سوتىنىڭ قاۋلىسىمەن بورىشكەر سوتقا تارتىلىپ, 5 تاۋلىككە قاماۋعا الىندى», دەپ جازىلعان ەلوردالىق پروكۋراتۋرانىڭ حابارلاماسىندا.
ايتا كەتەيىك, قازاقستاندا اليمەنت تولەۋدەن جالتارعان ازاماتتار 5 اەك (17 250 تەڭگە) كولەمىندە ايىپپۇل تولەيدى نەمەسە 5 تاۋلىككە دەيىن اكىمشىلىك قاماۋعا الىنادى, سونداي-اق ەكى جىلعا دەيىن باس بوستاندىعىنان ايىرىلادى.
