https://web.telegram.org/
حالىقارالىق ىستەر, قورعانىس جانە قاۋىپسىزدىك كوميتەتىنىڭ ءتورايىمى ايگۇل قۇسپان جەتەكشىلىك ەتكەن جيىندا تالقىلاۋعا ۇسىنىلعان زاڭ جوباسىن ءماجىلىس 1 قىركۇيەك كۇنى قابىلداعان بولاتىن. جوبا جۇزەگە اسسا, قازاقستانعا وڭىرىشىلىك ساۋدانى دامىتۋعا, شاعىن جانە ورتا بيزنەس جوبالارىن قارجىلاندىرۋعا, كولىك جانە لوگيستيكا, ونەركاسىپتىك ءوندىرىستى, ينفراقۇرىلىمدى, اۋىل شارۋاشىلىعىن, تۋريزم تاعى باسقا سالالاردى قولداۋعا باعىتتالماق.
ۇلتتىق ەكونوميكا ۆيتسە-ءمينيسترى ابزال ابدىكارىموۆ تۇركى ينۆەستيتسيالىق قورى – تۇركى الەمىنىڭ ەكونوميكالىق ينتەگراتسياسىنىڭ العاشقى بىرلەسكەن قارجى ينستيتۋتى ەكەنىن جەتكىزدى. ول مينيسترلىك ەكونوميكانىڭ وزىق سەكتورلارىنا ينۆەستيتسيا تارتۋ ءۇشىن تۇركى مەملەكەتتەرى ۇيىمى اياسىندا بەلسەندى جۇمىس ىستەپ جاتقانىن ايتتى. «قوردى قۇرۋ باستاماسىنا كەزىندە ازەربايجان رەسپۋبليكاسى ۇيىتقى بولدى. 2021 جىلى ۇيىمنىڭ بەيرەسمي سامميتىندە مەملەكەت باسشىسى تەڭ كاپيتالدى, تەڭ داۋىس قۇقىعى قاعيداتىنا سايكەس جۇمىستى جەدەلدەتۋ قاجەتتىگىن اتاپ ءوتتى. وسىلايشا بيىل ناۋرىزدا تۇركى مەملەكەتتەرى ۇيىمىنا مۇشە ەلدەر باسشىلارى كەڭەسىنىڭ توتەنشە ءسامميتى اياسىندا قوردى قۇرۋ تۋرالى كەلىسىمگە قول قويىلدى», دەدى ۆيتسە-مينيستر.
قور قۇرىلسا, تۇركى مەملەكەتتەرى ۇيىمى ەلدەرىنىڭ ساۋدا-ينۆەستيتسيالىق قاتىناستارىنىڭ دامۋىنا سەرپىن بەرەدى.
