سۋرەتتى تۇسىرگەن – ەرلان ومار, «ەQ»
نەگىزى زاۋىتتا ءۇش ءتۇرلى تەمىرجول ماشيناسى جاسالادى. ولار: ءبىر سەكتسيالى تە33اس سەريالى ماگيسترالدىق جۇك تەپلوۆوزى, ءبىر سەكتسيالى تە33ا سەريالى ماگيسترالدىق جولاۋشىلار تەپلوۆوزى جانە تەم 11ا سەريالى مانەۆر تەپلوۆوزى. قازىر تولىق قۋاتىندا جۇمىس ىستەپ تۇرعان زاۋىتتا اي سايىن 10 لوكوموتيۆ قۇراستىرىلادى.
اتالعان زاۋىتتا جاڭا تەحنولوگيالار ەنگىزىلىپ, ەكولوگيالىق تازا, ەكونوميكالىق تۇرعىدا وتە ۇنەمدى تەمىرجول ماشينالارى قۇراستىرىلىپ جاتىر. سونداي-اق يننوۆاتسيالىق تاسىلدەردىڭ ۇتىمدى قولدانىلۋى جانە زاۋىتتا كىلەڭ كاسىبي مامانداردىڭ جۇمىس ىستەۋى كاسىپورىندى جاڭا بەلەسكە كوتەردى. ء«سويتىپ, زاۋىتتى ىشكى جانە سىرتقى نارىققا لوكوموتيۆ شىعارۋ مەن جەتكىزۋدە كوشباسشىلاردىڭ بىرىنە اينالدىردى. كەيىنگى 10 جىلدا كومپانيا لوكوموتيۆتەرى الەم ەلدەرىنىڭ سۇرانىسىنا يە بولىپ ۇلگەردى. «زاۋىت تاريحىندا 2023 جىلدىڭ 17 تامىزى ايتۋلى داتا بولىپ قالادى. بۇل كۇنى 500-لوكوموتيۆ شىعارىلدى», دەيدى «لوكوموتيۆ قۇراستىرۋ زاۋىتى» اق-نىڭ ءوندىرىس بويىنشا ۆيتسە-پرەزيدەنتى تولەگەن جاڭاباەۆ.
كاسىپورىننىڭ 500 لوكوموتيۆى ەلىمىزدىڭ «قازاقستان تەمىر جولى» ۇلتتىق كومپانياسىنىڭ پايدالانۋىنا جىبەرىلگەن. قازىرگى تاڭدا زاۋىتتا 800-دەن استام جۇمىسشى ەڭبەك ەتەدى.
جالپى, وتاندىق لوكوموتيۆتەردىڭ ساپاسى مەن سەنىمدىلىگىنە ىشكى عانا ەمەس, سىرتقى نارىق تۇتىنۋشىلارى دا جوعارى باعاسىن بەرىپ وتىر. بەلسەندى ماركەتينگتىك قىزمەت پەن باسقا ەلدەرمەن سەرىكتەستىك قاتىناستاردى ءساتتى ورناتۋدىڭ ناتيجەسىندە كومپانيا ءوز ونىمدەرىن الەمدىك نارىققا شىعارىپ كەلەدى. بۇگىنگى كۇندە وتاندىق لوكوموتيۆتەر بىرقاتار الىس-جاقىن شەتەلدەرگە ەكسپورتتالعان. ولاردىڭ قاتارىندا ازەربايجان, ۋكراينا, تۇرىكمەنستان, تاجىكستان, قىرعىزستان, مولدوۆا بار.
كاسىپورىن ءوز تابىسىنىڭ ماڭىزدى فاكتورلارىن يننوۆاتسيالار مەن تەحنولوگيالاردى دامىتۋ باعىتىنان كورەدى. ءوز كەزەگىندە كومپانيا زەرتتەۋ مەن ازىرلەمەلەرگە بەلسەندى قاتىسىپ ءجۇر.
«لوكوموتيۆ قۇراستىرۋ زاۋىتى» اق قول جەتكىزگەن وسى جەتىستىگى شەڭبەرىندە عانا قالىپ قويمايدى. ءوندىرىس كولەمىن ءارى قاراي ۇلعايتۋعا, يننوۆاتسيالاردى جالعاستىرۋعا جانە جەتكىزۋ گەوگرافياسىن بارىنشا كەڭەيتۋگە كۇش سالادى. ءبىزدىڭ جوسپارىمىزدا سونى سەرىكتەستەرمەن ىنتىماقتاستىق ورناتۋ, جاڭا تەحنولوگيالاردى ەنگىزۋ, سونداي-اق لوكوموتيۆتەردىڭ باسقا دا مودەلدەرىن ازىرلەۋ سىندى جوبالار بار», دەيدى ماركەتينگ جانە ساتۋ ءبولىمىنىڭ باستىعى راۋان دوڭسەباەۆ.
لوكوموتيۆ قۇراستىرۋ زاۋىتى – ەلىمىزدەگى جەتەكشى كاسىپورىنداردىڭ ءبىرى عانا ەمەس, قازاق ەلىنىڭ ماقتانىشى. ءوندىرىستىڭ جوعارى دەڭگەيى مەن ءونىم ساپاسىنىڭ ارقاسىندا كومپانيا حالىقارالىق ارەنادا ءوزىنىڭ قاتىسۋىن نىعايتۋدى جالعاستىرىپ جاتىر. ال زاۋىت ۇجىمى قازاقستاندى سەنىمدى جانە يننوۆاتسيالىق لوكوموتيۆتەردى ەكسپورتتاۋشى ەل رەتىندە تانىستىرىپ جاتقاندارىن ماقتانىش كورەدى. ونىڭ انىق دالەلى ەل الدىندا.
ەڭ باستىسى ەلىمىزدەن شىعارىلعان لوكوموتيۆتەردىڭ تيىمدىلىگى جوعارى, پايدالانۋ شىعىنى از جانە ەكولوگيالىق قاۋىپسىز قاسيەتتەرگە يە.
مەملەكەت باسشىسى اتاپ وتكەندەي: «قازىر كوپتەگەن ەل ىشكى نارىقتى قورعاۋ شارالارىن بەلسەندى تۇردە قولدانىپ وتىر. ءتىپتى دامىعان ەلدەر پروتەكتسيونيستىك يندۋستريالىق ساياساتقا كوشتى. قازاقستاندا دسۇ كلاسسيفيكاتسياسى بويىنشا ىشكى نارىقتى قورعاۋ دەڭگەيى تومەن بولىپ سانالادى, تەك 128 تاريفتىك ەمەس شارالار قولدانىلادى. سوندىقتان بىزگە ساۋدا ساياساتىندا جاڭا, باتىل تاسىلدەر قاجەت».
ارينە, بۇل شەتەلدىك اكتسيونەرلەرگە ءبىزدىڭ زاۋىتتى دامىتۋعا قوسىمشا قاراجات سالۋعا جاڭا ءبىر جىگەر سىيلايتىنداي. ەسكەرە كەتىن ءبىر جايت, تەك 2022-2023 جىلداردىڭ وزىندە عانا زاۋىت اكتسيونەرلەرى قوسىمشا تسەحتاردىڭ قۇرىلىسىنا جانە جابدىقتاردى ساتىپ الۋعا قوسىمشا 3,5 ميلليارد تەڭگەگە جۋىق ينۆەستيتسيا سالدى. ءبىر قۋانارلىعى, مۇنىڭ ءبارى مۇمكىن بولدى. قازىر ولار ەل باسشىلىعىنىڭ وتاندىق وندىرۋشىلەردى قولداۋعا جانە دامىتۋعا دايىن ەكەنىن دە كورىپ-ءبىلىپ وتىر. جالعىز وتاندىق لوكوموتيۆ ءوندىرۋشى كاسىپورىننىڭ قىزمەتكەرى رەتىندە ايتارىم, پرەزيدەنتتىڭ «مەملەكەت وتاندىق وندىرۋشىلەردى قورعاۋعا مىندەتتى. بۇل ءبىزدىڭ ەكونوميكامىزدى سىرتقى الەمنەن جابۋ سيگنالى ەمەس. ول اشىق كۇيىندە قالۋى كەرەك, بىراق ۇلتتىق بيزنەستىڭ مۇددەلەرىن ەسكەرە وتىرىپ» دەگەنىنە قاتتى قۋاندىم», دەدى ت.جاناباەۆ.
