زاڭنىڭ ماقساتى – ءۇي جانۋارلارىنىڭ سانىن رەتتەۋ, ولارعا قاتىستى جاسالاتىن قاتىگەزدىككە جول بەرمەۋ. ەسەپكە الۋ جونىندەگى ءىس-شارالاردى جەرگىلىكتى اتقارۋشى ورگاندار قۇرعان مەملەكەتتىك ۆەتەرينارلىق ۇيىمدار, ۆەتەريناريا سالاسىندا ەمدەۋ-پروفيلاكتيكالىق كاسىپكەرلىك قىزمەتىمەن اينالىساتىن جەكە نەمەسە مەملەكەتتىك ەمەس زاڭدى تۇلعالار جۇزەگە اسىرادى. رەسمي اقپاراتقا سۇيەنسەك, وبلىستا ءۇي جانۋارلارىن ەسەپكە قويۋ جانە چيپتەۋگە ازاماتتار شامامەن 3,5-4 مىڭ تەڭگە شىعىندالادى ەكەن. تۇرعىندار يت-مىسىعىن, وزگە دە اسىراندى ءۇي جانۋارلارىن ەسەپكە قويۋ ارقىلى ولاردىڭ ءومىرى مەن تارتىبىنە جاۋاپتى بولادى.
– مۇددەلى ورگاندار ءۇي جانۋارلارى بويىنشا بارلىق دەرەكتەر ەنگىزىلەتىن «Tanba» سايكەستەندىرۋ دەرەكقورىنا قول جەتكىزە الادى. قىركۇيەكتىڭ العاشقى ونكۇندىگىندەگى مالىمەتكە سۇيەنسەك, «Tanba» بازاسىندا وبلىس بويىنشا 1797 ءۇي جانۋارى تىركەلگەن, ونىڭ ىشىندە 997-ءى يت بولسا, وزگەسى مىسىق. شالعايداعى اۋىلدىق جەرلەردە جانۋارلاردى ەسەپكە الۋ جونىندەگى ءىس-شارالاردى ۆەتەرينارلىق پۋنكتتەر جۇزەگە اسىرادى. قاراۋسىز جانە قاڭعىباس جانۋارلاردى بىردەيلەندىرۋدى جۇرگىزۋگە جەرگىلىكتى بيۋدجەتتەن 17,5 ملن تەڭگە ءبولىندى, سونداي-اق حالىقتىڭ الەۋمەتتىك وسال توپتارى ءۇشىن 6,3 ملن تەڭگە قاراستىرىلعان. وڭىردە جانۋارلاردى ەسەپكە الۋدى جۇزەگە اسىراتىن ۆەتەرينارلىق كلينيكالار دا بار: ولار – «جان», «فورۆارد», «قامقورلىق», «VetMed», «شانس» (بارلىعى پاۆلودار قالاسىندا), سونداي-اق «ەجكين كوت» جانە «فورۆارد» (ەكىباستۇز قالاسىندا) فيرمالارى, – دەيدى وڭىرلىك ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ باسشىسى رۋسلان تولەپباەۆ.
ال پاۆلودار وبلىسى ۆەتەريناريا باسقارماسى باسشىسىنىڭ ورىنباسارى اسىلتاس تىلەۋباەۆ ارنايى ەسەپكە يت پەن مىسىقتان باسقا ءۇي جانۋارى رەتىندە تەڭىز شوشقاسى, شينشيللا, كۇزەن, ءساندى ەگەۋقۇيرىقتار, تاسباقا, ەرگەجەيلى شوشقا, حومياك, مايمىل جاتاتىنىن ايتادى. بيىلعى قاڭتار ايىنان باستاپ ءۇي جانۋارلارى مىندەتتى تىركەۋگە الىنا باستاعانىن جۇرت ءبىلۋى كەرەك. تالاپتى ورىنداماعاندارعا بۇدان بىلاي 10-نان 20 ايلىق ەسەپتىك كورسەتكىشكە دەيىن ايىپپۇل سالىنادى.
پوليتسەيلەردىڭ سوزىنشە, چيپتەلمەگەن ءۇي جانۋارلارىنىڭ يەلەرىن جاۋاپقا تارتۋ وقيعالارى ازىرشە وبلىس اۋماعىندا تىركەلمەگەن. تەك جىل باسىنان ءۇي جانۋارلارىنا جاۋاپسىز قاراعانى ءۇشىن 250 ازامات ايىپپۇلعا كەسىلىپتى. ايىپپۇلداردىڭ جالپى سوماسى بەس ميلليون تەڭگەدەن استى. «پوليتسيانىڭ ەڭ اۋەلگى مىندەتى – قوعامداعى ءتارتىپ پەن قاۋىپسىزدىكتى قامتاماسىز ەتۋ. سوعان وراي نەگىزگى شارالارىمىز كوشەلەردە جۇرگىزىلەدى. قاڭعىباس يتتەردىڭ كوبەيۋى, ءوز بەتىمەن كوشەدە جۇرەتىن ءۇي جانۋارلارى, قارعىباۋ نەمەسە تۇمسىققاپ تاقپاۋ سياقتى كەمشىلىكتەر ءجيى كەزدەسەدى. ازاماتتاردىڭ وتىنىشتەرى مەن ارىز-شاعىمدارى بويىنشا جۇمىس جۇرگىزەمىز. كەيبىر جاعدايدا كورشىلەر ءبىر-بىرىنە شاعىمدانادى. ءۇي جانۋارىنا قاتىگەزدىك جاساعانى ءۇشىن بەس ازاماتقا قاتىستى اكىمشىلىك حاتتاما تولتىردىق. زاڭ بۇزۋشىلار 26 مىڭ تەڭگە كولەمىندە ايىپپۇل تولەدى. تاعى 9 وقيعا بويىنشا قىلمىستىق قۇقىق بۇزۋشىلىق تىركەلدى. ازىرشە كوشەدە يتپەن جۇرگەن ازاماتتاردى توقتاتىپ, جانۋاردى تىركەمەگەنى ءۇشىن ايىپپۇل سالۋ ءتارتىبى ەنگىزىلگەن جوق. الايدا ول قوعامدىق ورتادا, ءيتىن سەرۋەندەتىپ ءجۇرىپ كەمشىلىككە جول بەرسە, اكىمشىلىك جاۋاپكەرشىلىككە تارتىلادى», دەپ ءتۇسىندىردى وڭىرلىك جەرگىلىكتى پوليتسيا قىزمەتى تابيعات قورعاۋ پوليتسياسىنىڭ ينسپەكتورى داۋرەن قابىشەۆ.
پاۆلودار وبلىسى
