اتىراۋ وبلىستىق مەملەكەتتىك كىرىستەر دەپارتامەنتىنىڭ قىزمەتكەرلەرى كەيىنگى ءبىر ايدا كولەڭكەلى ىسپەن اينالىسقانداردىڭ بىرنەشە زاڭسىز ارەكەتىن اشكەرەلەدى. اسىرەسە, سايكەستەندىرۋ قۇرالدارىمەن تاڭبالانۋعا جاتاتىن اكتسيزدەلەتىن ونىمدەردى زاڭسىز ساتۋ دەرەگى بەلەڭ الىپ تۇر. سونداي دەرەكتىڭ ءبىرىن وڭىرلىك ەكونوميكالىق تەرگەۋ دەپارتامەنتىنىڭ قىزمەتكەرلەرى اتىراۋ قالاسىنداعى قويمالار مەن دۇكەننىڭ بىرىنە جۇرگىزگەن تەكسەرۋ كەزىندە انىقتاعان. تەكسەرۋ جۇمىستارى كەزىندە قويما مەن دۇكەننەن ەلەكتروندىق تەمەكى, ۆەيپ قۇرىلعىلار, سۇيىقتىق تۇرىندەگى 2,5 مىڭنان استام تەمەكى بۇيىمى انىقتالدى. بۇل زاتتاردىڭ بارلىعى ساۋداعا زاڭسىز شىعارىلعان. زاڭسىز اينالىمنان الىنعان تەمەكى ءونىمىنىڭ نارىقتاعى قۇنى شامامەن 6,7 ملن تەڭگەنى قۇرايدى.
ەكىنشى دەرەك تە تەمەكى ءونىمىن زاڭسىز ساتۋعا قاتىستى بولىپ وتىر. دەپارتامەنت قىزمەتكەرلەرى ءبىر كاسىپورىننىڭ قىزمەتىن مەملەكەتتىك كىرىستەر ورگاندارىندا تەمەكى ونىمدەرىن كوتەرمە ساتۋشى رەتىندە تىركەۋسىز جۇزەگە اسىرىپ كەلگەنىن انىقتادى. كاسىپورىننان 69 قوراپقا سالىنعان 96 مىڭ زاڭسىز تەمەكى ءونىمى تابىلدى. زاڭسىز ءونىمنىڭ جالپى قۇنى – 67 ملن 178 مىڭ تەڭگە.
ءتىپتى مۇناي ونىمدەرىن زاڭسىز ساتاتىندار بار. ماسەلەن, وتكەن اپتادا اتىراۋ قالالىق مەملەكەتتىك كىرىستەر باسقارماسىنىڭ قىزمەتكەرلەرى مۇناي ونىمىنە جاتاتىن 3 توننا ديزەلدى زاڭسىز ساتۋدىڭ جولىن كەستى. وسى ءىستى كاسىپكە اينالدىرعىسى كەلگەن ءبىر ادام انىقتالدى. كۇدىككە ىلىنگەن قالا تۇرعىنى 3 توننا ديزەل وتىنىن ارنايى كولىكپەن تاسىمالداعان.
«اكتسيزدەلەتىن ونىمدەردىڭ زاڭسىز اينالىمىن انىقتاۋعا بايلانىستى ءىس-شارالار جالعاسىپ جاتىر. زاڭسىز اينالىمنان الىنعان ونىمدەرگە, ونى ساتقان ادامدارعا قاتىستى جيناقتالعان ءىس ماتەريالدارى سوتقا جولداندى», دەپ حابارلادى دەپارتامەنتتىڭ ءباسپاسوز قىزمەتى.
اتىراۋ وبلىسى
