ء«بىز برەندتى قايتا قاراستىرىپ, وعان جاڭا ءمان-ماعىنا بەرىپ, ونى جارقىن ءارى ەستە قالارلىق ەتكىمىز كەلەدى. بالكىم, بۇل 21 عاسىردا بالاماسى جوق جول, ويتكەنى جارقىن بەينەسىز قانداي دا ءبىر ىلگەرىلەۋ تۋرالى ايتۋ مۇمكىن ەمەس. بۇل بۇگىنگى كۇننىڭ شىندىعى. دەسە دە, جاسالعان رەبرەندينگ – اياسى تار ماقسات نەمەسە جاي عانا گرافيكالىق وزگەرىس ەمەس. بۇل ءبىزدىڭ قۇندىلىقتارىمىزدىڭ, ەۆوليۋتسيامىزدىڭ جانە كەمەلدىككە دەگەن ۇمتىلىسىمىزدىڭ كورىنىسى», دەپ اتاپ ءوتتى قشف پرەزيدەنتى تيمۋر تۋرلوۆ.
جاڭارتىلعان فيرمالىق ستيل ەلىمىزدىڭ مادەني تەرەڭدىگى مەن بولاشاققا اشىقتىعىن كورسەتەتىن ءداستۇر مەن قازىرگى زاماننىڭ ۇيلەسىمى. ونىڭ نەگىزىندە ءال-اۋقات پەن مولشىلىقتى بەينەلەيتىن, قازاق مادەنيەتىندەگى دانالىقتىڭ نىشانىمەن جانە شاحماتتاعى ەرەكشە فيگۋرا – اتتىڭ بەينەسىمەن توعىسقان ەجەلگى ء«مۇيىز» ويۋ-ورنەگى جاتىر. وتكەن مەن بۇگىننىڭ ۇشتاسۋى فەدەراتسيانىڭ قازاقستاندى باي تاريحي مۇرانىڭ ساقتاۋشىسى رەتىندە عانا ەمەس, شاحماتتى دامىتۋ ءۇشىن وزىق تەحنولوگيالاردى پايدالاناتىن الەمدىك قوعامداستىقتىڭ پروگرەسسيۆتى قاتىسۋشىسى رەتىندە كورسەتۋگە دەگەن ۇمتىلىسىن بىلدىرەدى.
«وتكەن كەزەڭدە ءبىزدىڭ فەدەراتسيا الەمدىك شاحمات كارتاسىندا ويىپ ورىن الدى, ونى حالىقارالىق شاحمات فەدەراتسياسىنداعى ارىپتەستەرىمىز دە اتاپ ءوتتى. قازاقستان بىرنەشە رەت ءارتۇرلى الەم, ازيا چەمپيوناتتارىنىڭ, شاحمات ءتاجى ءۇشىن ماتچ سياقتى ماڭىزدى وقيعالاردىڭ ورتالىعىنا اينالدى. قشف شاحماتتى تانىمال ەتۋگە باعىتتالعان بىرقاتار جوبالاردى ىسكە اسىرۋدا ۇدەمەلى جۇمىستار اتقاردى. ءبىزدىڭ رەبرەندينگ – بۇل ءبىزدىڭ ءوز الدىمىزعا ءورشىل مىندەتتەر قويعان جاڭا كەزەڭنىڭ بەينەسى. مىسالى, «مەكتەپتەگى شاحمات» جوباسى اياسىندا ءبىز ۇكىمەتپەن, اكىمدىكتەرمەن بىرلەسە وتىرىپ, 5 جىل ىشىندە باستاۋىش سىنىپ بالالارىنىڭ 20%-نا دەيىن قامتۋدى جوسپارلاپ وتىرمىز. بۇل ەلدەگى شاحماتتىڭ دامۋىنا ۇلكەن سەرپىن بەرەدى جانە زياتكەرلىك ۇلتتىڭ قالىپتاسۋىنا قوسىلعان ۇلكەن ۇلەس بولادى», دەدى قشف ءبىرىنشى ۆيتسە-پرەزيدەنتى, ازيا شاحمات فەدەراتسياسىنىڭ ۆيتسە-پرەزيدەنتى دارمەن سادۋاقاسوۆ.
تيمۋر تۋرلوۆتىڭ ايتۋىنشا, فەدەراتسيا كەزەڭ-كەزەڭىمەن اۋقىمدى شارالار كەشەنىن جۇزەگە اسىرىپ جاتىر
«جالپى رەبرەندينگتىڭ اۋقىمىنا تەك كورنەكى بەينەلەر عانا جاسىرىلماعان, وعان قشف جۇمىسىنداعى جۇيەلى وزگەرىستەر, سونداي-اق ءبىزدىڭ جۇمىسىمىزدىڭ ودان ارعى جوسپارلارى دا كىرەدى. وسى تۇرعىدا ءبىزدىڭ فەدەراتسيامىز كەزەڭ-كەزەڭىمەن اۋقىمدى شارالار كەشەنىن جۇزەگە اسىرىپ جاتىر. سولاردىڭ ءبىرى – فيليالدىق جەلىنى دامىتۋ. بۇل ءبىز جىلدامداتۋدى كوزدەيتىن وتە ماڭىزدى ماسەلە. ال وسى فيليالدار جەرگىلىكتى جەرلەردە ءتۇرلى باعدارلامالاردى ىسكە اسىرۋ كەزىندە جۇمىستىڭ نەگىزگى قۇرالىنا اينالۋى ءتيىس», دەپ قوستى قشف پرەزيدەنتى تيمۋر تۋرلوۆ.
قشف پرەزيدەنتىنىڭ ايتۋىنشا, فيليالدىق جەلىنى دامىتۋدىڭ ماڭىزدى قوزعاۋشى كۇشى رەسپۋبليكالىق «شاحمات كەرۋەنى» جوباسى بولۋى ءتيىس, اتالمىش جوبانىڭ ىسكە قوسىلۋى دا ءباسپاسوز ءماسليحاتى بارىسىندا جاريالاندى.
«شاحمات كەرۋەنى» – قازاقستاننىڭ بارلىق وڭىرلەرىندە شاحمات سپورتىن ناسيحاتتاۋعا باعىتتالعان ءورشىل جوبا. جوبانى ازىرلەۋدە شابىتتاندىرعان ۇلى جىبەك جولى بولدى, ويتكەنى ول بۇكىل الەم بويىنشا ساۋدا-ساتتىقپەن قاتار ءارتۇرلى حالىقتاردىڭ مادەني جانە سپورتتىق مۇرالارىن الىپ ءجۇردى. قازاقستان اۋماعىنداعى قالالاردا «شاحمات كەرۋەنىن» ۇيىمداستىرا وتىرىپ, فەدەراتسيا باس سەرىكتەس Freedom Broker-ءدىڭ قولداۋىمەن وڭىرلەردە شاحمات سپورتىن نىعايتۋعا جانە فيليالداردىڭ سەنىمدى جەلىسىن قۇرۋعا ۇمتىلادى», دەپ ءبولىستى قشف اتقارۋشى ديرەكتورى گۇلميرا داۋلەتوۆا.
«شاحمات كەرۋەنى» اياسىندا قازاقستان رەسپۋبليكاسىنىڭ 20 قالاسىندا بليتس بويىنشا اشىق شاعىن تۋرنيرلەر وتەدى, ونىڭ شارىقتاۋ شەگى ءىرى جۇلدە قورى تىگىلگەن گراند-فينال بولادى. وڭىرلىك تۋرنيرلەر 12 قىركۇيەكتە كوكشەتاۋدا, 14 قىركۇيەكتە پەتروپاۆلدا, 18 قىركۇيەكتە قوستانايدا, 21 قىركۇيەكتە قاراعاندىدا, 24 قىركۇيەكتە پاۆلوداردا, 26 قىركۇيەكتە سەمەيدە, 28 قىركۇيەكتە وسكەمەندە, 2 قازاندا تالدىقورعاندا, 4 قازاندا قوناەۆتا, 7 قازاندا تارازدا, 9 قازاندا شىمكەنتتە, 11 قازاندا تۇركىستاندا, 13 قازاندا قىزىلوردادا, 18 قازاندا جەزقازعاندا, 22 قازاندا اقتوبەدە, 25 قازاندا ورالدا, 28 قازاندا اتىراۋدا جانە 2 قاراشادا اقتاۋدا وتەدى. وڭىرلىك كەزەڭدەردىڭ جەڭىمپازدارى 10 قاراشادا تۇركىستان قالاسىندا وتەتىن گراند-فينالدا كەزدەسەدى.
رەسپۋبليكالىق ءتۋرنيردىڭ كەستەسى:
- كوكشەتاۋ - 12.09;
- پەتروپاۆل - 14.09;
- قوستاناي - 11.10;
- قاراعاندى - 21.09;
- پاۆلودار - 24.09;
- سەمەي - 26.09;
- وسكەمەن - 28.09;
- تالدىقورعان - 02.10;
- قوناەۆ - 04.10;
- تاراز - 07.10;
- شىمكەنت - 09.10;
- تۇركىستان - 11.10;
- قىزىلوردا - 13.10;
- جەزقازعان - 18.10;
- اقتوبە - 22.10;
- ورال - 25.10;
- اتىراۋ - 28.10;
- اقتاۋ - 02.10;
- تۇركىستان (فينال) - 10.11.
