وبلىستىق توتەنشە جاعدايلار دەپارتامەنتىنىڭ قوعاممەن بايلانىس توبىنان ءمالىم ەتكەندەي, وقيعا بيىلعى 4 ماۋسىمدا بولعان. جىلىوي اۋدانىنداعى تۇرعىزبا اۋىلىنان ءبىر وتباسى جەم وزەنىنە شومىلۋعا بارعان. شومىلۋ كەزىندە 13 جاسار ەرناز جاعالاۋدان الىسقا ۇزاپ, شۇڭقىرعا باتىپ كەتكەن. ءىنىسىنىڭ جان ۇشىرا ايقايلاعان داۋىسىن ەستىگەن اعاسى ەلدوس بىردەن كومەكتەسۋگە ۇمتىلادى. الايدا ءىنىسىن قۇتقارۋعا تىرىسقانىمەن, ءوزى دە باتا باستاعان.
ال جاعالاۋدا تۇرعان اپالى-ءسىڭلىلى ايسانا, دانا جانە مەرۋەرت ءبىر-ءبىرىنىڭ قولىنان ۇستاپ, سۋعا باتقان باۋىرلارىنا كومەكتەسۋگە تالپىنادى. بىراق الدا كەلە جاتقان ايسانانىڭ اياعى قۇرىسىپ, باۋىرلارىن قۇتقارۋعا جەتە الماعان. سول سەبەپتەن, ايسانا ايقايلاپ, كومەككە شاقىرعان. ونىڭ داۋىسىن كىلەم جۋىپ جاتقان ايەلىنە كومەكتەسىپ جۇرگەن ماناربەك قارتباەۆ ەستىگەن. ول جاعالاۋعا جەدەل جەتىپ, وزەنگە باتقانداردى قۇتقارۋ ءۇشىن سۋعا سەكىرگەن.
«ماناربەك قارتباەۆ الدىمەن سۋعا باتقان ەرنازدى, كەيىن ەلدوستى الىپ شىقتى. كەيىن ءۇش قىزدىڭ جاعالاۋعا جەتۋىنە كومەگىن بەردى. جەدەل ارەكەت ەتكەن ماناربەك جايمان ۇلى وسىلايشا ءبىر وتباسىنداعى ەكى ادامنىڭ ءومىرىن ساقتاپ قالدى. وعان توتەنشە جاعدايلار مينيسترلىگىنىڭ «سۋعا باتقانداردى قۇتقارعانى ءۇشىن» مەدالى تاپسىرىلدى», دەپ ءمالىم ەتتى دەپارتامەنتتىڭ قوعاممەن بايلانىس توبىنان.
اتىراۋ وبلىسى
