جاڭا مەكتەپتىڭ سالىنۋىنا وسى اۋىلدا كىندىك قانى تامعان الدابەرگەن اقساقالدىڭ نەمەرەسى داۋرەن قانات ۇلى ۇيىتقى بولدى. «حالىق يگىلىگى» قايىرىمدىلىق قورى 100 بالاعا ارنالعان ەكىقاباتتى جاڭا مەكتەپتىڭ قۇرىلىسىن بىلتىر باستاپ, بيىلعى وقۋ جىلىندا پايدالانۋعا بەردى. اۋماعى 3,5 مىڭ شارشى مەترگە تەڭ مەكتەپ قۇرىلىسىنا 750 ملن تەڭگە جۇمسالعان. مۇنداعى وقۋ مەملەكەتتىك تىلدە ءارى ءبىر اۋىسىمدا جۇرگىزىلەدى.
وسىلايشا, اتىمتاي جومارت ازامات اۋىل تۇرعىندارىن زور قۋانىشقا كەنەلتتى. اسىرەسە جاڭا وقۋ جىلىندا تابالدىرىعىنان تورىنە دەيىن زاماناۋي دۇنيەلەرمەن جابدىقتالعان جاڭا مەكتەپتە وقيتىن وقۋشىلاردىڭ كەۋدەسىن ماقتانىش كەرنەپ ءجۇر. ولار ەندى جاقسى وقۋعا, ۇلگىلى بولۋعا تالپىنارى انىق. بيىل قوسقۇدىقتاعى ورتا مەكتەپكە 86 وقۋشى باردى. 5 ءبۇلدىرشىن 1-سىنىپقا قابىلداندى. «جالپى, قوسقۇدىقتىڭ دامۋ الەۋەتى جوعارى. ىرگەسىندە تەمىر جول ستانساسى بار ءارى وبلىس ورتالىعىنا جاقىن ورنالاسقان. مەكتەپ – ماڭىزدى ينفراقۇرىلىمدىق نىسان. سول ارقىلى جاس مامانداردى, جاس وتباسىلاردى تارتىپ, اۋىلعا جان بىتىرۋگە بولادى. بۇل – ەلدى مەكەننىڭ دامۋىنا تىڭ سەرپىن بەرەدى», دەيدى الماتى وبلىسىنىڭ اكىمى مارات سۇلتانعازيەۆ.
– بۇگىن وتباسىم ءۇشىن قۋانىشتى كۇن. وسى ۋاقىتقا دەيىن بىرنەشە مەكتەپ قۇرىلىسىنىڭ باسى-قاسىندا جۇرسەم دە ءدال بۇگىنگىدەي تولقىعان ەمەسپىن. ويتكەنى بۇل اۋىلدا اكەم الدابەرگەن تۋىپ-وسكەن. جاڭا مەكتەپتى ۇلىم داۋرەن سالىپ بەرىپ وتىر. ونىڭ بۇل ءىسى كوڭىلىمدى كوككە كوتەردى. وسى اۋىلدىڭ مەكتەبىنەن ءبىلىم الىپ, بولاشاققا قانات قاققان ۇل-قىزدارىمىزدىڭ مىقتى ازاماتتاردىڭ قاتارىنا قوسىلارىنا سەنەمىن, – دەدى قانات بوزىمباەۆ.
سونداي-اق «حالىق يگىلىگى» قوعامدىق قورى مەكتەپ ۇجىمىنا «Suzuki» ماركالى اۆتوكولىكتى سىيعا تارتتى. سونىمەن قاتار كوپبالالى ءارى الەۋمەتتىك وسال توپتان شىققان 12 بالانى مەكتەپكە دايارلاپ, وقۋ قۇرالدارىمەن جانە مەكتەپ فورماسىمەن قامتاماسىز ەتتى.
زاماناۋي مەكتەپتە 24 وقۋ كابينەتى, 3 زەرتحانالىق (فيزيكا, بيولوگيا, حيميا جانە ينفورماتيكا) كابينەت, كومپيۋتەرلىك سىنىپ, 2 شەبەرحانا, اكت جانە سپورت زالدارى, جاتتىعۋ الاڭى, سونداي-اق 60 ورىندىق اسحانا مەن مەديتسينالىق كابينەت, كىتاپحانا بار.
جالپى, الماتى وبلىسىندا بيىل 15 750 ورىندىق 16 مەكتەپتىڭ قۇرىلىسى جوسپارلانعان. ونىڭ 9-ى 1-قىركۇيەكتە اشىلدى. قالعان 5 مەكتەپتىڭ قۇرىلىسى جىل سوڭىنا دەيىن اياقتالادى.
الماتى وبلىسى
