كۇنى كەشە پرەزيدەنت قاسىم-جومارت توقاەۆ «جاعالاۋ» وقۋ-جاتتىعۋ پوليگونىندا وتكەن «باتىل تويتارىس-2023» ستراتەگيالىق كوماندالىق-شتابتىق اسكەري وقۋ-جاتتىعۋ جيىنىنا قاتىسىپ, ارناۋلى وپەراتسيالار كۇشتەرى مەن دەسانتتىق-شابۋىلداۋ اسكەرلەرىنىڭ دايىندىعىن كوزبەن كورگەن بولاتىن. قازاقستان رەسپۋبليكاسى قارۋلى كۇشتەرىنىڭ قۇرامىنا كىرەتىن ارناۋلى وپەراتسيالار كۇشتەرىنىڭ قولباسشىلىعى پرەزيدەنتتىڭ 2022 جىلعى 19 قاڭتارداعى №779 جارلىعىمەن قۇرىلىپ, 3 اقپاندا مەملەكەت باسشىسىنىڭ وكىمىمەن بولات جوراباەۆ ونىڭ قولباسشىسى لاۋازىمىنا تاعايىندالدى.
ارناۋلى وپەراتسيالار كۇشتەرى ەلدىڭ قورعانىس قابىلەتى مەن اسكەري قاۋىپسىزدىگىن قامتاماسىز ەتۋ اياسىندا, ونىڭ ىشىندە تەرروريزمگە قارسى وپەراتسيالارعا جانە زاڭسىز قارۋلانعان قۇرىلىمدارعا قارسى ءىس-قيمىل جاساۋعا قاتىسۋ ارقىلى ارنايى مىندەتتەردى شەشۋگە ارنالعان.
جاڭا ءبولىنىستىڭ قىزمەت ەتىپ كەلە جاتقانىنا ەكى جىلعا جۋىقتاپ قالدى. وسى ۋاقىت ارالىعىندا قورعانىس مينيسترلىگى مەملەكەت باسشىسىنىڭ ارميانىڭ جاۋىنگەرلىك قابىلەتىن تۇبەگەيلى ارتتىرۋ جانە قارۋلى كۇشتەردىڭ جۇمىسىن قايتا قۇرۋ جونىندەگى تاپسىرماسىن ىسكە اسىرۋ شەڭبەرىندە قۇرىلعان ارناۋلى وپەراتسيالار كۇشتەرى قولباسشىلىعىنىڭ كۇشتەرى مەن قۇرالدار قۇرامىن, مىندەتتەرى مەن فۋنكتسيالارىن ايقىندادى. جىل بويى باسقارۋ ورگاندارى مەن بولىمشەلەرىن قۇزىرەتتى ماماندارمەن جاساقتاۋ, ولاردى زاماناۋي تەحنيكامەن, قارۋ-جاراقپەن جانە وقۋ-ماتەريالدىق بازامەن جاراقتاندىرۋ جۇمىستارىن جۇرگىزدى.
بۇگىنگى قازاق ارمياسى – ەل مەن جەردى تەك سىرتقى جاۋدان عانا ەمەس, ىشكى قاۋىپ-قاتەرلەردەن دە سەنىمدى قورعاي الاتىن الىپ كۇشكە اينالدى. ارناۋلى وپەراتسيالار كۇشتەرى سونىڭ ىشىندەگى ەڭ زامانعا ساي جابدىقتالعان قۋاتتى قۇرىلىمداردىڭ ءبىرى.
