2 قىركۇيەكتە وتكەن مەرەكەلىك ءىس-شاراعا ۇلتتىق مادەنيەتتى الەمدىك كەڭىستىكتە تانىتىپ جۇرگەن مادەنيەت مايتالماندارى مەن ونەر جۇلدىزدارى قاتىستى. مادەني كەشكە «قازاقكونتسەرتتىڭ» سوليستەرى مەن ونەر ۇجىمى, «astana musical» مەملەكەتتىك تەاترى, «Turan» ەتنو-فولكلورلىق ءانسامبلى, «گۇلدەر» ءانسامبلى, «استانا سازى» فولكلورلىق ءانسامبلى, «حالىق قازىناسى» ءداستۇرلى ونەر ورتالىعى, ەسترادا جانە كلاسسيكالىق ونەر ءبولىمىنىڭ سوليستەرى, سونداي-اق قازاقستاننىڭ ەڭبەك سىڭىرگەن مادەنيەت قايراتكەرى قۇرماش ماحان, بيبىگۇل جانۇزاق, سالتانات احمەتوۆا, الىشەر كاريموۆ, «دارىن» مەملەكەتتىك جاستار سىيلىعىنىڭ لاۋرەاتتارى رۋحيا بايدۇكەنوۆا, ازات ماليك, رەسپۋبليكالىق جانە حالىقارالىق بايقاۋلاردىڭ لاۋرەاتى ديدار ابدۋحالىق جانە «قازاقكونتسەرتتىڭ» بارلىق شىعارماشىلىق ۇجىمى مەن ارتىستەرى قاتىستى.
ال 3 قىركۇيەك كۇنى «Turan» ەتنو-فولكلورلىق ءانسامبلى «Bridge of times» اتتى جاڭا بىرەگەي جوبا ۇسىندى. كەش باعدارلاماسىندا فولكلورلىق جانە سيمفونيالىق ۇزدىك تۋىندىلار ورىندالدى. ءىس-شارادا كومپوزيتور اقتوتى رايىمقۇلوۆا, بەلگىلى وپەرا ءانشىسى, «يتاليا جۇلدىزى» وردەنىنىڭ كاۆالەرى مەدەت چوتاباەۆ, وپەرا ءانشىسى, ارريگو بويتو اتىنداعى كونسەرۆاتوريانىڭ ماگيسترى (يتاليا) ايگەرىم التىنبەك, پيانيست, كونتسەرتمەيستەر دينا ميرمانوۆا ونەر كورسەتتى.
4 جانە 5 قىركۇيەك كۇندەرى «دجاز كەشتەرى» حالىقارالىق فەستيۆالى ءوتىپ, jam-session-عا «قازاقكونتسەرت» ساحناسىندا ۇزدىك دجاز توپتارى ساحناعا شىقتى. مۋزىكالىق كەشكە قاتىسقان ونەر ۇجىمى مەن سوليستەرىنىڭ قاتارىندا ايجان نۇرماعامبەتوۆا, جاننا ورىنباساروۆا, عازيزا گابدراحيموۆا, گۇلنار كوشەنوۆا, سالتانات مەڭدىعاليەۆا, «Saz&Soul» ۆوكالدى-اسپاپتى ءانسامبلى, شىعىس قازاقستان وبلىسى مادەنيەت باسقارماسىنىڭ «ەرتىس كونتسەرت» رمقك «Big Band», قاراعاندى وبلىسى مادەنيەت, مۇراعاتتار جانە قۇجاتتاما باسقارماسى قالي بايجانوۆ اتىنداعى قاراعاندى كونتسەرتتىك بىرلەستىگىنىڭ, «قوستاناي قالالىق مادەنيەت جانە تىلدەردى دامىتۋ ءبولىمى» مم «دجاز Big Band», يسا بايزاقوۆ اتىنداعى پاۆلودار وبلىستىق فيلارمونياسىنىڭ «بيگ بەند» دجاز-وركەسترلەرى مەن سوليستەرى, «استانا» ەسترادالىق-سيمفونيالىق وركەسترى قۇرامىنداعى «جىگەر» ەسترادالىق-دجاز ءانسامبلى, «شابىت» شىعارماشىلىق ۇجىمى, «Jam-session trio» تريوسى, «Gulder Band» ءانسامبلى ونەرلەرىمەن ءبولىستى. ال كەشتىڭ باستى قوناقتارى – وزبەكستاننىڭ حالىق ءارتىسى مانسۋر تاشماتوۆ جانە وزبەكستان مەملەكەتتىك فيلارمونياسىنىڭ ءسوليسى (ساكسوفون) ازيزبەك يسماتۋللاەۆ بولدى.
ۇيىمداستىرۋشىلاردىڭ ايتۋىنشا, دجاز فەستيۆالى كورەرمەنگە جاڭا ەسىمدەردى اشۋعا ارنالعان. «قازاقكونتسەرت» قۇرىلعان كەزدەن باستاپ بىرنەشە جىل بويى مادەنيەت پەن ونەردىڭ ورداسىنا اينالدى. ەلىمىزدەگى ەڭ ءىرى كونتسەرتتىك ۇيىم بۇگىندە كوپجىلدىق ءداستۇر بويىنشا رەسپۋبليكانىڭ ۇزدىك ارتىستەرى مەن شىعارماشىلىق ۇجىمدارىن شوعىرلاندىرا وتىرىپ, مادەني تاريحتى لايىقتى جالعاستىرىپ كەلەدى», دەدى ۇيىم ديرەكتورى.
جاڭا ماۋسىمنىڭ جاڭالىقتارى تۋرالى ورتالىق كوممۋنيكاتسيالار قىزمەتى الاڭىندا وتكەن بريفينگتە روزا باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمىنىڭ ديرەكتورى اقتوتى رايىمقۇلوۆا باياندادى.
«الداعى ماۋسىم كەرەمەت وقيعالارعا تولى بولماق. جاڭا جوبالاردىڭ جۇرتشىلىقتىڭ قىزىعۋشىلىعىن تۋدىراتىنىنا سەنىمىمىز مول. سەبەبى ءبىزدىڭ تۇراقتى كورەرمەنىمىز جازعى دەمالىس اياقتالعاننان كەيىن سۇيىكتى ارتىستەرىمەن كەزدەسۋدى اسىعا كۇتەدى. ايتا كەتەيىن, وتكەن 62-ءشى كونتسەرتتىك ماۋسىمدى ويداعىداي اياقتاپ, ماقساتىمىزعا قول جەتكىزدىك. بۇل ماۋسىمدا شىعارماشىلىق ۇجىمدار مەن ارتىستەر ءۇشىن گاسترولدىك ساپارلار مەن ءتۇرلى جوباعا جانە ايتارلىقتاي وقيعاعا تولى بولدى. جىل بويى «قازاقكونتسەرتتىڭ» ارتىستەرى مەن شىعارماشىلىق ۇجىمدارى رەسپۋبليكالىق, حالىقارالىق جانە الەمدىك تۋرنە بويىنشا 379 ءىس-شاراعا قاتىستى. حالىقارالىق گاسترولدە 35 كونتسەرت, 2 سپەكتاكل (اقش, فرانتسيا, شۆەيتساريا, سلوۆەنيا, بەلگيا, اۋستريا, حورۆاتيا, ماجارستان, يتاليا, برازيليا, وڭتۇستىك كورەيا, رەسەي, گەرمانيا, وزبەكستان, قىرعىزستان) قويدى. ال رەسپۋبليكا كولەمىندە 72 كونتسەرت, 6 سپەكتاكل ۇسىندى», دەدى ۇيىم ديرەكتورى.
سونداي-اق ول قازاقستاننىڭ حالىق ءارتىسى التىنبەك قورازباەۆتىڭ, قازاقستاننىڭ ەڭبەك ەرلەرى ايمان مۇساحودجاەۆانىڭ, روزا رىمباەۆانىڭ, كومپوزيتور, قازاقستاننىڭ ەڭبەك سىڭىرگەن قايراتكەرلەرى تولەگەن مۇحامەدجانوۆ پەن ەركەش شاكەەۆتىڭ شىعارماشىلىقتارىنا ارنالعان جەكە كونتسەرتتەرى وتكەنىن اتاپ ءوتتى.
«روزا باعلانوۆا اتىنداعى «قازاقكونتسەرت» مەملەكەتتىك ۇيىمىنىڭ ارتىستەرى مەن شىعارماشىلىق ۇجىمدارى «ەل بىرلىگى – جاڭا قازاقستان» جوباسى بويىنشا 2022 جىلعى تامىزدان باستاپ, 2023 جىلعى تامىز ارالىعىندا ەل ىشىندەگى گاسترولدىك ساپارلاردا 30 000 شاقىرىمنان استام جول ءجۇرىپ ءوتتى. گاسترولدىك ءىس-شارالارمەن ەل ىشىندە 65 000 كورەرمەن قامتىلدى. وسى جوبا بويىنشا 2022 جىلى «قازاقكونتسەرت» ۇجىمى گاسترولدىك ساپارمەن جاڭا وبلىستار – اباي, ۇلىتاۋ, جەتىسۋدىڭ جانە شىعىس قازاقستان,تۇركىستان, جامبىل وبلىستارىنىڭ ەلدى مەكەندەرىن ارالاپ, ءوڭىر تۇرعىندارىنا ارنايى كونتسەرت بەرىپ قايتقان بولاتىن. ال بيىل ناۋرىز-ءساۋىر ايلارىندا ماڭعىستاۋ, اتىراۋ, باتىس قازاقستان, اقتوبە وبلىستارىندا گاسترولدىك ساپارمەن بولىپ, حالىققا ءوز ونەرلەرىن پاش ەتتى. سونداي-اق اتالعان جوبا قوستاناي وبلىسىنىڭ بىرقاتار اۋدانىندا قازاقستاننىڭ ەڭبەك سىڭىرگەن ءارتىسى, «قۇرمەت» وردەنىنىڭ كاۆالەرى ايجان نۇرماعامبەتوۆانىڭ ساحناداعى شىعارماشىلىعىنا 45 جىل تولۋىنا وراي ۇيىمداستىرىلدى. جىل اياعىنا قاراي ءدال وسى يگى ءىستىڭ جالعاسى رەتىندە «قازاقكونتسەرتتىڭ» سوليستەرى مەن ونەر ۇجىمى قىزىلوردا وڭىرىنە ىسساپارعا شىعادى», دەدى ا.رايىمقۇلوۆا.
ءيا, وتكەن ماۋسىم جاڭادان جاساقتالعان «گۇلدەر» ءانسامبلىنىڭ استانا, الماتى جانە كوكشەتاۋ قالالارىندا وتكەن تۇساۋكەسەر كونتسەرتتەرىمەن دە ەستە قالدى. بيشىلەر قىرعىزستان, وزبەكستان ەلدەرىنە ىسساپارعا شىعىپ, ونەرلەرىن كورسەتىپ قايتقان ەدى.
«سونىمەن قاتار «Astana musical» مەملەكەتتىك تەاترىنىڭ رەپەرتۋارىندا «ەنت تاپسىرمايمىن», «دوستار سەرتى», «Covid» سپەكتاكلدەرى بولسا, بىلتىر بالالار جىلىنا وراي ارنايى بالالار ءۇشىن «الدار كوسە» ميۋزيكلى ەندى. «Astana musical» تەاترى قازاقستانداعى جانە ورتالىق ازياداعى تۇڭعىش مەملەكەتتىك ميۋزيكل تەاتر بولىپ سانالادى. ماۋسىم ايىندا تەاتردىڭ حالىقارالىق فەستيۆالدا بىردەن ەكى جۇلدەنى جەڭىپ الۋىن ەلوردانىڭ مادەني ومىرىندەگى ايتۋلى وقيعا دەپ بىلەمىز. وڭتۇستىك كورەيانىڭ «daegu international musical festival» فەستيۆالىندە «روزا باعلانوۆا» ميۋزيكلى «ۇزدىك حالىقارالىق ميۋزيكل», ال تەاتر ءارتىسى زارينا ماكينا «ۇزدىك ايەل بەينەسى» اتالىمىمەن ماراپاتتالدى», دەدى ۇيىم ديرەكتورى.
كونتسەرتتىك ۇيىمنىڭ 2023 جىلدىڭ ءىى جارتىجىلدىعىنىڭ كونتسەرتتىك-گاسترولدىك جوسپارلارى دا كوپ ەكەنى ايتىلدى.
«قىركۇيەك ايىندا الماتى كورەرمەنى ءۇشىن قالا كۇنىنە وراي «الماتىداعى التىن كۇز «قازاقكونتسەرتپەن» اتتى كونتسەرتتىك باعدارلامامىزدى ۇسىنامىز. ءىس-شاراعا قازاق ەسترادا جۇلدىزدارى روزا رىمباەۆا, ماقپال ءجۇنىسوۆا, التىنبەك قورازباەۆ, ايجان نۇرماعامبەتوۆا, سۇلەيمەن يبراگيموۆ, جەڭىس ىسقاقوۆا, جازيرا مەن جانبولات, جاننا ورىنباساروۆا, «مەلومەن», «ازيا» توپتارى جانە باسقالارى قاتىسادى. بيىل ەكىنشى رەت «alem saz» حالىقارالىق مۋزىكالىق فەستيۆالىن ۇيىمداستىرعالى وتىرمىز. بۇل – الەمنىڭ تۇكپىر-تۇكپىرىنەن ءتۇرلى مۋزىكالىق باعىتتاعى بىرەگەي مۋزىكانتتاردى ءبىر ساحنادا توعىستىراتىن ەرەكشە ءىس-شارا. قىركۇيەك ايىنىڭ 28-ءى مەن قازان ايىنىڭ 3-ءى ارالىعىندا وتەتىن فەستيۆالعا تۇركيا, جاپونيا, ماجارستان, گەرمانيا, رەسەي مەملەكەتتەرىنەن قوناقتار كۇتىلۋدە. «ارمان اسۋلارى» اتتى ەرەكشە قاجەتتىلىگى بار بالالارعا ارنالعان رەسپۋبليكالىق فەستيۆالدىڭ گالا-كونتسەرتى دە ەكىنشى رەت ۇيىمداستىرىلعالى وتىر. ءىس-شارا قازاقستاننىڭ بارلىق ايماعىنان ەرەكشە قاجەتتىلىگى بار بالالار اراسىنداعى تالانتتىلاردى انىقتاۋ, شىعارماشىلىق قابىلەتتەرىن ارتتىرۋ, دامىتۋعا قاجەتتى جاعداي جاساۋ جانە قولداۋ كورسەتۋ ماقساتىن كوزدەيدى. استانا قالاسىندا وتەتىن فەستيۆالدىڭ گالا-كونتسەرتىنە ەلىمىزدىڭ وڭىرلەرىندە تىڭدالىم بايقاۋلارىندا جەڭىسكە جەتكەن بالالار تانىمال ونەر جۇلدىزدارىمەن ءبىر ساحنادا بىرگە ونەر كورسەتەدى», دەپ اتاپ ءوتتى.
ۇيىم باسشىسىنىڭ ايتۋىنشا, «كوشپەندىلەر اۋەنى» حالىقارالىق فەستيۆالى دە جوسپارلانعان. فەستيۆالدىڭ ماقساتى – تۇركى حالىقتارىنىڭ بىرلىگىن جانە مادەنيەتىن نىعايتۋعا باعىتتالعان, سونداي-اق ەجەلگى تامىرى بار سالت-داستۇرلەر, ادەت-عۇرىپتار ارقىلى ءبىرتۇتاس فولكلورلىق شىعارماشىلىق ورتا قۇرۋ. فەستيۆالعا تۇركى حالىقتارىنىڭ تانىمال مۋزىكانتتارى قاتىسادى. اتاپ ايتاتىن بولساق, وزبەكستان, تۇركيا, ياكۋتيا, ماجارستان, قىرعىزستان ەلدەرىنەن ونەرپازدار كەلمەك. ودان بولەك, جەتەكشى شىعارماشىلىق ۇجىمدار مەن سوليستەر قىتاي, تۇركيا, فرانتسيا, اقش, سەربيا ەلدەرىنە گاسترولدىك ساپارعا اتتانباق.
