جيىندى اشقان پارتيا توراعاسى جولداۋ مەملەكەت باسشىسىنىڭ ەلىمىزدە كەزەڭ-كەزەڭىمەن جۇرگىزىلىپ جاتقان اۋقىمدى ءارى ماڭىزدى رەفورمالارىنىڭ جالعاسى ەكەنىن جانە ونى تاريحي قۇجات دەپ اتاۋعا بولاتىنىن اتاپ ءوتتى.
«جولداۋدا ەكونوميكالىق دامۋىمىزدىڭ تاياۋ جىلدارداعى ەۆوليۋتسياسى ايقىندالدى. وتە اۋقىمدى, ناقتى ءارى كەشەندى ءىس-شارالار جوسپارلانىپ وتىر. سونىمەن قاتار جولداۋدا جۇرتشىلىقتى الاڭداتىپ, تولعانتىپ وتىرعان باسقا دا وزەكتى ماسەلەلەر تولىققاندى قامتىلدى. سوندىقتان پارتيامىز ءۇشىن بۇل جولداۋ – ستراتەگيالىق ماڭىزدى قۇجات. ەندىگى كەزەكتە الدىمىزدا مەملەكەت باسشىسىنىڭ جاڭا ەكونوميكالىق ساياساتىنا قولداۋ كورسەتىپ, ونىڭ ساپالى ورىندالۋىن قامتاماسىز ەتۋ ماقساتى تۇر. «Amanat» پارتياسى وسى ماقساتتى جۇزەگە اسىرۋدىڭ العى شەبىندە بولۋعا ءتيىس», دەدى ول.
ەرلان قوشانوۆ پارتيالىقتاردى جولداۋدى جۇزەگە اسىرۋ ءۇشىن بۇكىل قوعامنىڭ كۇش-جىگەرىن جۇمىلدىرۋعا شاقىردى. ول جولداۋدا مەملەكەت باسشىسى سۋ مەن گاز تاپشىلىعى, ينفراقۇرىلىمنىڭ توزۋى, وتاندىق كاسىپورىندارعا قولداۋدىڭ جەتكىلىكسىزدىگى, ءوندىرىستى دامىتۋ ءۇشىن ۇزاقمەرزىمدى قارجىلاي قولداۋدىڭ بولماۋى, اگروونەركاسىپ سەكتورىنىڭ پروبلەمالارى سياقتى ەلىمىزدەگى بىرقاتار وزەكتى ماسەلەنى قامتىعانىن باسا ايتتى.
«وسى ماسەلەلەردىڭ بارلىعى دا جۇرتشىلىق تاراپىنان تالاي رەت كوتەرىلدى. ءبىز پارتيانىڭ بارلىق دەڭگەيدەگى دەپۋتاتتارى ارقىلى دا, پارتيالىق جوبالارىمىز ارقىلى دا بەلسەندى جۇمىس ىستەپ جاتىرمىز. ايتالىق, وتكەن جىلى «جەر اماناتى» جوباسى اياسىندا 5 ملن گەكتار جەر مەملەكەت مەنشىگىنە قايتارىلىپ, شارۋالارعا قايتا ءبولىندى. «اۋىل اماناتى» جوباسى ىسكە قوسىلىپ, ونىڭ اياسىندا ءوز ءىسىن اشۋعا 2,5 پايىز جەڭىلدىكپەن نەسيە بەرىلىپ جاتىر. پرەزيدەنت بۇل جوبانىڭ قاجەت ەكەنىن اتاپ ءوتىپ, جەكە قوسالقى شارۋاشىلىقتار كووپەراتسياسىن ىنتالاندىرۋدى تاپسىردى», دەدى ەرلان قوشانوۆ. سونداي-اق پارتيا توراعاسى مەملەكەت باسشىسىنىڭ حالىقتىڭ قارجىلىق ساۋاتىن ارتتىرۋعا باعىتتالعان «قارىزسىز قوعام» پارتيالىق جوباسىن قولداعانىن ەرەكشە اتاپ ءوتتى. ەندى «Amanat» وسى جوبانى ۇكىمەتپەن بىرگە بۇكىل ەل اۋماعىندا كەڭەيتىپ, ساپالى ىسكە اسىرۋمەن اينالىسادى.
ەرلان قوشانوۆ پارتياعا قولدانىستاعى زاڭنامالاردى جەتىلدىرۋ, جاڭا ەكونوميكالىق ساياساتتى ىسكە اسىرۋعا باعىتتالعان جاڭا رەتتەۋشى قۇرالداردى قۇرۋ جونىندەگى ۇسىنىستاردى دايىنداۋعا اتسالىسۋدى تاپسىردى. «ونەركاسىپتىك ساياسات, ساۋدا, كاسىپكەرلىك سالاسىنداعى زاڭناماعا وزگەرىستەر ەنگىزۋ قاجەت. بۇگىنگى تاڭدا سالىق جانە بيۋدجەت زاڭناماسى پارتيا الاڭدارىندا قىزۋ تالقىلانىپ جاتىر. عىلىم مەن يننوۆاتسيا, تسيفرلاندىرۋ جانە اقپاراتتىق تەحنولوگيالاردى دامىتۋ سالاسىندا قوسىمشا رەتتەۋشى قۇرالداردى ازىرلەۋ قاجەت. پرەزيدەنتتىڭ باستامالارىن زاڭنامالىق تۇرعىدا قولداۋ – ماجىلىستەگى ءبىزدىڭ فراكتسيانىڭ مىندەتى», دەدى پارتيا توراعاسى.
ءىس-شارا بارىسىندا ءماجىلىستىڭ الەۋمەتتىك-مادەني دامۋ كوميتەتىنىڭ توراعاسى اسحات ايماعامبەتوۆ, ءماجىلىس دەپۋتاتتارى ەكاتەرينا سمىشلياەۆا مەن ماقسات تولىقباي, پارتيانىڭ شىعىس قازاقستان وبلىسىنداعى فيليالىنىڭ توراعاسى سايرانگۇل ءجۇمادىلوۆا مەن الماتى قالالىق فيليالىنىڭ توراعاسى ستانيسلاۆ كانكۋروۆ ءسوز سويلەدى.
جيىن سوڭىندا ەرلان قوشانوۆ پارتيانىڭ ورتالىق اپپاراتى مەن وڭىرلىك فيليالدارىنىڭ الدىنا بىرقاتار ناقتى مىندەت قويدى. اتاپ ايتقاندا, جولداۋدىڭ نەگىزگى باعىتتارى ورتالىق جانە وبلىستىق دەڭگەيلەردەگى «Talqylau» جانە «Bir Tolqynda» ديالوگ الاڭدارى اياسىندا تالقىلانادى. پارتيا كەڭەستەرى ءوز ۇسىنىستارىن دايىنداۋى قاجەت. سونداي-اق ول جولداۋدا جۇكتەلگەن مىندەتتەردىڭ ورىندالۋىنا بارلىق دەڭگەيدەگى ماسليحاتتارداعى پارتيانىڭ دەپۋتاتتىق فراكتسياسى مۇشەلەرىنىڭ ءبىر كىسىدەي جۇمىلىپ, قاتىسۋىن تاپسىردى.
