الىستان كەلگەن قوناقتاردى قارسى العان «قازاق گازەتتەرى» جشس باس ديرەكتورىنىڭ ورىنباسارى – الماتى قالاسى باسىلىمدارىنىڭ جەتەكشىسى دۋمان اناش ەلىمىزدەگى ەڭ ءىرى گازەت-جۋرنالداردى توپتاستىرعان سەرىكتەستىك قۇرامىندا 10-نان اسا باسىلىم, 3 ينتەرنەت-پورتال بار ەكەنىن جەتكىزىپ, اتالعان اقپارات قۇرالدارىندا قازاقستان-قىتاي بايلانىستارى دا شىعىستانۋشى عالىمداردىڭ قاتىسۋى ارقىلى جان-جاقتى ساراپتالاتىنىن اتاپ ءوتتى.
«قىتاي – قازاقستاننىڭ ەڭ جاقىن كورشىسى ءارى ماڭىزدى سەرىكتەستەرىنىڭ ءبىرى. ەكى ەلدىڭ باسشىلارى ەكىجاقتى ارىپتەستىكتى دامىتۋ تۋرالى بىرقاتار ناتيجەلى كەلىسىمگە قول جەتكىزدى. ەل پرەزيدەنتى قاسىم-جومارت توقاەۆ بيىل وسى ەلگە ساپارى بارىسىندا قىتايمەن قارىم-قاتىناستا ورتالىق ازيا ەلدەرىنىڭ اراسىندا قازاقستاننىڭ ۇلەسى جوعارى ەكەنىن ايتقان ەدى. قازىر ەكى ەل اراسىنداعى ساۋدا اينالىمىن 100 ملرد دوللارعا جەتكىزۋ كوزدەلىپ وتىر. ارىپتەستەگىمىز وسى بايلانىستاردى مادەني قىرىنان دامىتۋعا ءارى جان-جاقتى ناسيحاتتاۋعا سۇبەلى ۇلەس قوسادى دەپ سەنەمىن», دەدى د.اناش.
سي يانچۋن قىتاي مەن قازاقستان ەلدەرىنىڭ ءباسپاسوز قۇرالدارى اراسىندا بايلانىس ورناتۋدىڭ ماڭىزدىلىعىن اتاپ ءوتىپ, ەكىجاقتى ارىپتەستىكتى تەرەڭدەتۋگە بەيىل ەكەنىن جەتكىزدى جانە «قازاق گازەتتەرى» سەرىكتەستىگىنىڭ وكىلدەرىن شاندۋنعا ارنايى قوناق بولىپ كەلۋگە شاقىردى. ونىڭ ايتۋىنشا, ەلدىڭ شىعىسىندا ورنالاسقان شاندۋندا قىتاي حالقىنىڭ 14 پايىزى تۇرادى (100 ملن ادام) تۇرادى, ەكونوميكالىق دامۋى تۇرعىسىنان وتە ۇلكەن الەۋەتكە يە.
ال «Dazhong Newspaper Group» باس رەداكتورى چجاو نيانمين كاسىپورىن مەن ونىڭ ەنشىلەس باسىلىمدارى تۋرالى اڭگىمەلەدى. ونىڭ ايتۋىنشا, كاسىپورىن 2000 جىلدىڭ قىركۇيەگىندە قۇرىلعانىمەن, ونىڭ ەڭ باسىندا تۇرعان «Dazhong Daily» گازەتى 1939 جىلدىڭ 1 قاڭتارىنان باستاپ شىعىپ كەلە جاتقان قىتايداعى ەڭ ءىرى باسىلىمنىڭ ءبىرى سانالادى. قازىر بۇل گازەتتەر توبىندا «Qilu Evening News», «Rural Dazhong», «Peninsula Urban Daily», «Economic Guide» سياقتى 10-نان اسا باسىلىم, «Dazhong Net», «Poster News» جانە «Qilu One Point» ۆەب-سايتتار مەن تۇتىنۋشىلار پورتى بار. گازەتتىڭ جالپى تارالىمى ءار سانىنا 3 ملن-نان اسادى, ال جاڭادان قوسىلىپ جاتقان مەدياتۇتىنۋشىلاردىڭ جالپى سانى 460 ملن-عا جەتەعابىل. توپتىڭ تابىس كورسەتكىشتەرى دە تاڭعالدىرارلىق, ياعني گازەت, جاڭا مەديا, باق-تى قارجىلاندىرۋ, مادەني پاركتەر, قۇرىلىس ەكونوميكاسى, ونەر كورمەلەرى جانە ت.ب. باعىتتارداعى نەگىزگى سالالاردى قۇرايتىن «Internet Media Group» جانە مادەني يندۋستريانىڭ ينۆەستيتسيالىق توبى سەكىلدى 54 كومپانيانىڭ ەنۋى ارقىلى بۇل كومپانيا ەلدەگى گازەت يندۋسترياسىنداعى ەڭ ۇزدىك ۇلتتىق توپقا اينالىپ وتىر.
ءوز كەزەگىندە «قازاق گازەتتەرى» قۇرامىنداعى باسىلىمداردىڭ باس رەداكتورلارى ءسوز الىپ, گازەت-جۋرنالداردى تانىستىردى. ونىڭ ىشىندە «بالدىرعان», «اق جەلكەن» جۋرنالدارى مەن «ۇلان», «درۋجنىە رەبياتا» گازەتتەرى سياقتى بالالار باسىلىمدارىنا نازار اۋدارعان قىتايلىق ارىپتەستەر شاندۋن ايماعىندا بالالارعا ارنالعان 20 باسىلىم بار ەكەنىن, قىتاي ەلىنىڭ دە بالالار كونتەنتىنە ەرەكشە نازار اۋداراتىنىن, وسى باعىتتا شىعارماشىلىق بايلانىس ورناتۋعا نيەتتى ەكەنىن جەتكىزدى.
جۇزدەسۋ سوڭىندا تاراپتار ەكىجاقتى ارىپتەستىكتى دامىتۋ تۋرالى مەموراندۋمعا قول قويىپ, كادەسىيلار الماسىپ, ەستەلىك سۋرەتكە ءتۇستى.
