وبلىسقا ارنايى ىسساپارمەن كەلگەن سەنات سپيكەرى ماۋلەن اشىمباەۆ جەتىسۋ وبلىسىنىڭ جۇرتشىلىعىمەن كەزدەستى. كەزدەسۋ بارىسىندا ءوڭىردى دامىتۋ ماسەلەلەرى, مەملەكەت باسشىسىنىڭ تاپسىرمالارىن ىسكە اسىرۋ جوسپارى, تەكەلى قالاسىنىڭ ينفراقۇرىلىمىنا قاتىستى پروبلەمالار جانە سەنات پەن ءماسليحاتتاردىڭ ءوزارا ءىس-قيمىلىنىڭ كەلەشەگى تالقىلاندى. پالاتا سپيكەرى ەل پرەزيدەنتىنىڭ باستاماسىمەن قولعا الىنعان رەفورمالاردىڭ ىسكە اسىرىلۋىن ساپالى تۇردە قامتاماسىز ەتۋ پالاتا مەن ءماسليحاتتاردىڭ بىرلەسكەن جۇمىسىنداعى اسا ماڭىزدى مىندەت ەكەنىن اتاپ ءوتتى.
«مەملەكەت باسشىسىنىڭ باستاماسىمەن ەلىمىزدە اۋقىمدى وزگەرىستەر ورىن الىپ جاتىر. بۇل رەتتە ءبىزدىڭ باستى ماقساتىمىز – بارشاعا تەڭ مۇمكىندىك بەرەتىن ادىلەتتى قازاقستان قۇرۋ. وسىلايشا, ەلىمىز دامۋدىڭ جاڭا كەزەڭىنە قادام باسىپ وتىر. وسىنداي ورتاق ماقسات جولىندا ەل بولىپ جۇمىلىپ, بەكەم بىرلىك تانىتۋ ايرىقشا مانگە يە. بۇل مەملەكەتتىلىگىمىزدى نىعايتىپ, تاۋەلسىزدىگىمىزدى باياندى ەتۋ ءۇشىن قاجەت», دەدى م.اشىمباەۆ.
سونداي-اق ول سەناتتىڭ زاڭ شىعارۋ قىزمەتىنە توقتالىپ ءوتتى جانە وڭىرلەرمەن ءتيىمدى ءوزارا قارىم-قاتىناس ورناتۋدىڭ ماڭىزدى ەكەنىنە نازار اۋداردى.
«پرەزيدەنتىمىز قاسىم-جومارت توقاەۆ وبەكتيۆتى جانە تاۋەلسىز سوت ادىلەتتى مەملەكەتتىڭ نەگىزى ەكەنىن ايتتى. سوعان سايكەس سەنات جانىنان سوت جۇيەسىن رەفورمالاۋدى زاڭنامالىق تۇرعىدان قامتاماسىز ەتۋ ءۇشىن جۇمىس توبى قۇرىلدى. بۇل باعىتتا قابىلداناتىن زاڭدار تاۋەلسىز, اشىق جانە كاسىبي سوت جۇيەسىن قۇرۋعا ىقپال ەتەدى دەپ سەنەمىز. جاڭا سەسسيادا سەناتورلاردىڭ باستاماسىمەن ازىرلەنگەن بىرقاتار زاڭ جوباسىن قارايمىز. ولاردىڭ قاتارىندا جايىلىمدىق جەرلەردى پايدالانۋ, ورگانيكالىق ءونىم ءوندىرۋ ماسەلەلەرى بويىنشا زاڭ جوبالارى بار. وسىنداي اۋقىمدى جۇمىستا وڭىرلەردەگى ارىپتەستەرىمىزدىڭ تاجىريبەلەرى مەن پىكىرلەرى اسا ماڭىزدى. سوندىقتان ءبىز ءماسليحات دەپۋتاتتارىمەن بەلسەندى ءارى تىعىز جۇمىس ىستەۋدى كوزدەپ وتىرمىز», دەدى م.اشىمباەۆ.
پالاتا توراعاسى سەنات جانىنداعى جەرگىلىكتى وكىلدى ورگاندارمەن ءوزارا ءىس-قيمىل جاساۋ جونىندەگى كەڭەس پەن ء«وڭىر» دەپۋتاتتىق توبىنىڭ جۇمىسىنا دا توقتالدى. اتالعان ەكى ينستيتۋتتىڭ قىزمەتى ايماقتارداعى پروبلەمالاردى شەشۋگە ىقپال ەتۋگە ارنالعان. وڭىرلەردەگى تۇيتكىلدەردىڭ باسىم بولىگى ينفراقۇرىلىمعا, الەۋمەتتىك نىساندارعا جانە مەملەكەتتىك باعدارلامالاردىڭ ىسكە اسىرىلۋىنا قاتىستى ەكەنى بەلگىلى. دەگەنمەن ءوڭىردىڭ وتكەن جەتى ايدىڭ ناقتى كورسەتكىشتەرىنە كوز سالاتىن بولساق, الەۋمەتتىك-ەكونوميكالىق سالانىڭ بارلىعىندا ءوسىم بار. ماسەلەن, ونەركاسىپ كولەمى 8,9%-عا ارتقان. اۋىل شارۋاشىلىعى ءونىمى 1,4%-عا ءوسىپ, قۇرىلىس جۇمىستارىنىڭ كولەمى 1,7 ەسەگە ۇلعايعان. تۇرعىن ءۇيدى پايدالانۋعا بەرۋ كورسەتكىشى – 18,1 پايىز, ساۋدا 1,7 ەسەگە وسكەن. جىل باسىنان بەرى وبلىس ەكونوميكاسىنا 119,6 ملرد تەڭگە ينۆەستيتسيا تارتىلىپتى.
«بۇل كورسەتكىشتەر – جەتىسۋ جۇرتشىلىعىنىڭ, اكىمشىلىكتەردىڭ, ءماسليحات دەپۋتاتتارى, قوعامدىق كەڭەس مۇشەلەرى مەن ۇكىمەتتىك ەمەس ۇيىمدارىمەن بىرلەسە اتقارىلعان ورتاق جۇمىستاردىڭ ناتيجەسى. جالپى, بيىلعى جىلى وتكەن بارلىق دەڭگەيدەگى دەپۋتاتتار سايلاۋىنىڭ ناتيجەسىندە جەتىسۋ وبلىسىنىڭ دەپۋتاتتار قۇرامى 75%-عا جاڭارىپ, 6 ساياسي پارتيا فيليالدارىنىڭ وكىلدەرى ەندى. جىل باسىنان بارلىق دەڭگەيدەگى اكىمدەردىڭ تۇرعىندارمەن وفلاين, ونلاين بايلانىستا 1 215 كەزدەسۋى ۇيىمداستىرىلدى. وعان 116 106 ادام قاتىسىپ, تۇرعىندار تاراپىنان 4 607 ماسەلە كوتەرىلدى. سونىمەن قاتار, 1 188 جەكە قابىلداۋ وتكىزىلدى. الداعى ۋاقىتتا دا ەل يگىلىگى جولىندا اتقاراتىن شارۋالارىمىز از ەمەس», دەيدى ءوڭىر اكىمى بەيبىت يساباەۆ.
كەزدەسۋدە ءوڭىر دەپۋتاتتارى لەپسى-بالقاش تاسجولىنىڭ جوندەۋ جۇمىستارىنىڭ سالعىرتتىعىن جانە اقشي اۋىلىنداعى جارىق جەلىلەرىنىڭ ەسكىرگەنىن جەتكىزدى. سونداي-اق تالدىقورعان قالاسىنىڭ ىرگەسىندەگى ساياجايلارعا مارتەبە بەرىلۋىن سۇرادى. سەنات سپيكەرى بۇل ماسەلەلەر كوپ ۇزاماي شەشىمىن تاباتىنىن جەتكىزدى.
ودان كەيىن سەنات توراعاسى تەكەلى قالاسىنىڭ تۇرعىندارىمەن كەزدەستى. بۇل كەزدەسۋدە دە ءوڭىردى دامىتۋ ماسەلەلەرى كەڭىنەن ءسوز بولدى. ونىڭ ىشىندە قالانىڭ ينفراقۇرىلىمىنا قاتىستى ماسەلەنى شەشۋ بارىسىنا ەرەكشە كوڭىل ءبولىندى.
«قالادا كاناليزاتسيالىق-تازارتۋ نىسانى ابدەن توزعان. بۇگىندە بۇل وتە وزەكتى ماسەلە ەكەنىن بىلەمىز. وسى پروبلەمانى شەشۋ ءۇشىن جاڭا تازارتۋ ستانساسى سالىنىپ جاتىر. الداعى ۋاقىتتا بۇل باعىتتاعى جۇمىس سەناتتىڭ باقىلاۋىندا بولادى. وبلىستىڭ 2025 جىلعا دەيىنگى دامۋ جوسپارىندا ەكونوميكانى دامىتۋ جانە ينفراقۇرىلىمدى جاقسارتۋمەن بىرگە الەۋمەتتىك سالاعا دا ەرەكشە باسىمدىق بەرىلگەن. سوعان بايلانىستى الداعى ءۇش جىلدا وڭىردە بىرقاتار تۇرعىن ءۇي, مەكتەپ, مەديتسينالىق مەكەمەلەر سالىنباق. وسى ورايدا وبلىس باسشىلىعى تەكەلى قالاسىنىڭ دا دامۋىنا ەرەكشە ءمان بەرەدى دەپ سەنەمىز», دەدى پالاتا سپيكەرى.
ساپار بارىسىندا ماۋلەن اشىمباەۆ جەتىسۋ وبلىسىنىڭ بوچچاشىلارىمەن دە كەزدەستى. قازىرگى تاڭدا وڭىردە اتالعان پاراليمپيادالىق سپورت تۇرىنەن ەكى ارنايى ۇيىرمە جۇمىس ىستەيدى. كەزدەسۋدە سەنات توراعاسى ەلىمىزدە ينكليۋزيۆتى قوعام قۇرۋ باعىتىندا اتقارىلىپ جاتقان جۇمىستار جونىندە ايتتى.
ودان بولەك, پالاتا سپيكەرى قۇلجاباي قاسىموۆ اتىنداعى №28 ءىت مەكتەپ-ليتسەيىنە باردى. وقۋ ورنىندا وتكەن كەزدەسۋدە وقۋشىلار مەن پەداگوگتەردىڭ ءوزىن-ءوزى دامىتۋ تاسىلدەرىن ۇنەمى جەتىلدىرىپ وتىرۋ جانە اكىمدىك تاراپىنان مەكتەپتەردەگى ورىن تاپشىلىعى ماسەلەسىن شەشۋ جايىندا ءسوز قوزعالدى.
جەتىسۋ وبلىسى
