جوعالعان جول بەلگىلەرى

رەسپۋبليكالىق ماڭىزى بار جولداردى تۇراقتى پاترۋلدەۋگە جانە پروفيلاكتيكالىق اقپاراتتىق-ءتۇسىندىرۋ جۇمىستارىنا قاراماستان جىل سايىن جول ينفراقۇرىلىمى ەلەمەنتتەرىن ۇرلاۋ فاكتىلەرى تىركەلىپ وتىر. الايدا وتكەن جىلدارمەن سا­لىستىرعاندا جول ينفراقۇرىلىمى ەلەمەنتتەرىن ۇرلاۋ فاكتىلەرى ءبىر­شاما ازايعان. ماسەلەن, 2023 جىل­دىڭ باسىنان بەرى رەسپۋبليكالىق ماڭىزداعى كۇرەجولداردان شامامەن 20 ملن تەڭگە سوماعا جول ينفرا­قۇرىلىمى ەلەمەنتتەرى ۇرلانىپتى. سالىستىرمالى تۇردە قاراساق, وسىدان ەكى جىل بۇرىن بۇل شىعىن 60 ملن تەڭگەدەن اسقان ەكەن.

جول بويىنان كوبىنەسە جول بەلگىلەرى, ءۇي جانۋارلارىنىڭ جولعا شىعىپ كەتۋىنەن قورعايتىن تورلى قورشاۋلار, كاتافوتتار مەن ستروبوسكوپتار ۇرلانادى. ءتىپتى بەلگىسىز ادامدار جارىق باعىتتايتىن ەكى ۇلكەن ترانسفورماتوردى ۇرلاعان جاعداي دا تىركەلىپتى.

ۇرلانعان جول ينفراقۇرىلىمى ەلەمەنتتەرى كوبىنەسە تۇرمىستىق ماقساتتاردا قولدانىلادى ەكەن. مى­سالى, ءتورتبۇرىشتى جول بەلگىلە­رىنەن كۇرەكتەر, دوڭگەلەك ءپىشىندى جول بەلگىلەرىنەن تابالار مەن قازان­دارعا ارنالعان قاقپاقتار, ءۇي جا­نۋارلارىنىڭ جولعا شىعىپ كەتۋىنەن قورعايتىن تورلاردان ءۇي قورشاۋلارى جاسالسا, جارىقديودتى كاتافوتتار ۆەلوسيپەدتەرگە بەكىتىلەدى ەكەن.

وسىعان وراي جولعا جاۋاپ­تى مەكەمەلەر رەسپۋب­ليكا­لىق ماڭىزى بار اۆتوموبيل جولدارىن پايدالانۋشىلاردان مەملەكەتتىك م ۇلىكتى ۇقىپتى ۇستاۋعا شاقىرىپ وتىر. جول بويىندا ورنالاسقان بار­لىق جول ينفراقۇرىلىمى ەلە­مەنتى قوزعالىس قاۋىپسىزدىگىن قام­تاماسىز ەتۋگە باعىتتالعان. بۇل ماسە­لەدە ازا­مات­تاردىڭ جەكە جاۋاپ­كەرشىلىگى وتە ماڭىزدى بولىپ تۇر.

ەل جولشىلارى بيىل دا بۇل باعىتتا قىرۋار جۇمىس اتقارىپتى. اتاپ ايتقاندا, 8 مىڭعا جۋىق جاڭا جول بەلگىسىن, 19 مىڭ دانا كاتافوتتى, 3,5 مىڭ شارشى مەتر شۋ جولاعىن جانە 10 مىڭ سيگنال باعاناسىن ورنات­قان. سونىمەن قاتار ماماندار 9,7 مىڭ قۋما مەتر توسقاۋىل قورشاۋىن جابدىقتاپ, 23 مىڭ شا­قى­رىمنان اسا جولتاڭبا سىزىعىن جاڭارتىپتى. 179 اۆتوپاۆيلون جانە دەمالىس الاڭىن جوندەدى. جول قوز­عالىسى ەرەجەلەرىن ساقتاپ, جول قاۋىپ­سىزدىگىن ناسيحاتتاۋ ماقساتىمەن رەس­پۋب­ليكالىق اۆتوتراسسالاردىڭ بويىندا 300-دەن اسا جاڭا اقپاراتتىق پاننو ورناتىلعان.