«قۇقىق قورعاۋ ورگاندارى جانە قۇقىق قورعاۋ قۇرىلىمدارى الدىن الۋ شارالارىنا باسا ءمان بەرۋى كەرەك. بارلىق تۇيتكىلدى باعىتتار بويىنشا پرواكتيۆتى تۇردە جۇمىس جۇرگىزۋ قاجەت. ازاماتتاردىڭ قۇقىعىنىڭ بۇزىلۋىنا جول بەرمەۋ جانە الدىن الا بولجاۋ تەتىگىن جەتىلدىرۋ كەرەك. كوپ جاعدايدا بۇل مىندەتتىڭ تابىستى ورىندالۋى ازاماتتىق قوعاممەن تىعىز قارىم-قاتىناس جاساۋعا بايلانىستى.
قۇقىق قورعاۋ ينستيتۋتتارى ءوز توڭىرەگىنە ساراپشىلاردى, ۇكىمەتتىك ەمەس ۇيىمداردىڭ ماماندارىن شوعىرلاندىرۋعا ءتيىس. سىزدەر مەن قۇقىق قورعاۋ قاۋىمداستىعى اراسىندا اشىق ديالوگ دامۋى كەرەك. قازىر وسىنداي سەرىكتەستىكتىڭ جەتىسپەيتىنى بايقالادى. پرەزيدەنت جانىنداعى ادام قۇقىقتارى جونىندەگى كوميسسيا رەفورمالار بارىسىنا باعا بەرۋ ۇدەرىسىنە ءتۇرلى ساراپشىلاردى بەلسەندى تۇردە قاتىستىرۋى كەرەك», دەدى مەملەكەت باسشىسى ادام قۇقىقتارىن قورعاۋ جۇيەسىنىڭ وكىلدەرىمەن كەزدەسۋ بارىسىندا.
سونىمەن قاتار پرەزيدەنت حالىقارالىق قۇرىلىمدارمەن ءوزارا قارىم-قاتىناس جاساۋدىڭ, سونداي-اق ەلىمىزدەگى ادام قۇقىقتارىنىڭ جاي-كۇيىن باعالاۋ ءۇشىن سەرىكتەستەر قولداناتىن كورسەتكىشتەردى ءوز تاجىريبەمىزگە ەنگىزۋدىڭ ماڭىزى زور ەكەنىن اتاپ ءوتتى.
