«كاسىپكە باعىت» جوباسى «مەن – كاسىپكەر» كاسىپكەرلىك الەۋەتىن دامىتۋ» قۇرالىنىڭ ءبىر باعىتى رەتىندە قولعا الىندى. اتالعان جوبا شاعىن جانە ورتا بيزنەستىڭ كاسىپكەرلىك الەۋەتىن ارتتىرۋ ماقساتىندا سالالىق وقىتۋدى قامتيدى. «كاسىپكە باعىت» جوباسى اياسىندا وڭىردە كوكونىس ءوسىرۋ, بالىق ءوسىرۋ, ومارتا شارۋاشىلىعى, ءسۇت جانە ەت باعىتىنداعى سالالار قامتىلادى.
كوكونىس ءوسىرۋ بويىنشا «ەڭبەكشىقازاق اۋدانىنىڭ جەرگىلىكتى قوعامداستىق قورى» قوعامداستىق قورىمەن 15 كاسىپكەر شەبەرلىگىن شىڭدادى.
ء«بىز ءتورت كۇندىك تاجىريبەلىك كۋرس وتكىزدىك. وندا تەوريالىق ماتەريال الۋ, شارۋا قوجالىقتارىن ارالاۋ, كووپەراتيۆ مۇشەلەرىمەن جانە ولاردىڭ شارۋاشىلىقتارىمەن تانىسۋ مۇمكىندىگى بولدى», دەيدى قور وكىلدەرى.
وقىتۋدىڭ العاشقى كۇندەرى كوكونىس وسىرۋشىلەرگە اۋىلدىق اۋماقتاردى دامىتۋدا قوردىڭ تاجىريبەسى, قوسىلعان قۇن تىزبەگىن ۇيىمداستىرۋ, تۇتىنۋشىلارمەن جۇمىس ىستەۋ جانە فەرمەرلەرمەن ءوزارا ەسەپ ايىرىسۋ تۋرالى ءدارىس بەرىلدى.
ودان ءارى كۋرسقا قاتىسۋشىلار جەكە جەر تەلىمىندە پلەنكالى جىلىجاي سالۋدىڭ قىر-سىرىن, داقىلداردىڭ بيولوگياسىن, تىڭايتقىشتاردى قولدانۋ جۇيەلەرىن, وسىمدىكتەردى اۋرۋلار مەن زيانكەستەردەن قورعاۋدى, شىعىن ەسەبىن, باسقا دا كاسىپكە قاتىستى سان ساۋالدىڭ جاۋابىن الۋعا تىرىستى.
كوكونىس وسىرۋشىلەر بىلىكتىلىگىن ارتتىرۋمەن قاتار, وسى باعىتتاعى كاسىپتەرىن كەڭەيتۋگە مۇمكىندىك الدى.
«كۋرستى اياقتاعان سوڭ قاتىسۋشىلار العان ءبىلىمى مەن داعدىسى بويىنشا تەست تاپسىرىپ, 70 بالل جيناعان كاسىپكەرلەر ارنايى سەرتيفيكات الدى. سونىمەن قاتار ولار وقىتقان كاسىپورىننان ءۇش اي بويى قولداۋ تابادى», دەيدى الماتى وبلىسى كاسىپكەرلەر پالاتاسىنا قاراستى ايەلدەر كاسىپكەرلىگىن دامىتۋ ورتالىعىنىڭ مەنەدجەر-كەڭەسشىسى داستان جايلاۋباەۆ.
الماتى وبلىسى
