«مەكتەپكە حيدجاب كيۋ ماسەلەسى - قوعامدا كەڭىنەن تالقىلانىپ جاتقان وزەكتى تاقىرىپ. اتا زاڭىمىزدا كورسەتىلگەندەي, ءبىز ءۇشىن زايىرلىلىق ۇستانىمى ءبىرىنشى ورىندا تۇرادى. ەكىنشىدەن, بۇعان قاتىستى ۇستانىمدار ءارتۇرلى. كەيبىر قوعامدىق پىكىردى قالىپتاستىرۋشىلار مانيپۋلياتسياعا يتەرمەلەيتىن سياقتى. كەي جەلى قولدانۋشىلارى بۇل ماسەلە حالىقارالىق تاجىريبەدە, الەم ەلدەرىندە شەشىمىن تاپقان دەپ ءۇزىلدى-كەسىلدى جازعان. مەنىڭشە, بۇل فەيك اقپارات. كەيبىر دامىعان فرانتسيا, اۆستريا سياقتى ەلدەردە جاسىنا بايلانىستى شەكتەۋ قويعان. ارينە, رۇقسات ەتەتىن مەملەكەتتەر دە بار», دەدى اقپارات ءمينيسترى.
سونىمەن قاتار مينيستر ەڭ باستىسى مەملەكەت ىشىندە ىرىتكى سالۋعا جول بەرمەۋدىڭ اسا ماڭىزدى ەكەنىن تىلگە تيەك ەتتى.
«بىزدە مەكتەپ فورماسى بەكىتىلگەن جانە ول تۋرالى ارىپتەسىم عاني بەكتاي ۇلى ايتىپ بەردى. سونداي-اق ەلدەگى ءدىني سەنىم بوستاندىعىنا دا قۇرمەتپەن قارايتىنىمىزدى ايتا كەتۋ كەرەك. مەملەكەتتە بۇل ءۇشىن بارلىق جاعداي جاسالعان. مىسالى, ءدىن ىستەرىنە قارايتىن قىز بالالاردىڭ ءبىلىم الۋىنا جاعداي جاسالعان مەدرەسە مەن كوللەدجدەر بار. كەيدە بۇل ماسەلەگە ءداستۇر تۇرعىسىندا دا قاراپ جاتادى. ءبىلىم بەرۋ مەكەمەلەرىنىڭ باستى ماقساتى – وقىتۋ, بالاعا ءبىلىم بەرۋ. قۇرانداعى العاشقى ءامىردىڭ ءوزى «وقى» دەپ باستالعانىن بىلەمىز. ال ەڭ باستىسى – بۇل تاقىرىپتى ساياسيلاندىرىپ الماۋ. سەبەبى ساياسيلانۋ مەن راديكالدانۋ ەڭ اۋەلى ءدىننىڭ وزىنە قانشالىقتى قاۋىپتى ەكەنىن تاياۋ شىعىس ەلدەرىنەن جاقسى كورىپ وتىرمىز», دەدى دارحان قىدىرالى.
