فوتو: اشىق دەرەككوز
دەپۋتاتپەن كەزدەسۋگە جۇزدەن استام ازامات كەلدى. ولار بالالاردى مەكتەپكە دايارلاۋعا بەرىلەتىن قارجىلاي كومەكتىڭ ءادىل بولىنبەۋى, كوپبالالى وتباسىدان شىققان جانە الەۋمەتتىك از قامتىلعان بالالاردى مەكتەپتە ىستىق تاماقپەن قامتاماسىز ەتۋ, مەديتسينا سالاسىنداعى الەۋمەتتىك قىزمەتكەرلەردىڭ, پسيحولوگتاردىڭ جالاقىسىنىڭ تومەندىگى, ءبىلىم بەرۋ فورماتىنىڭ وزگەرۋى, مىندەتتى الەۋمەتتىك مەديتسينالىق ساقتاندىرۋ قورىنا اۋدارىپ وتىرعان قارجىنى ءتيىمدى پايدالانۋ جونىندە ۇسىنىس-پىكىرلەرىن ورتاعا سالدى.
ماسەلەن, اۋىل تۇرعىنى ايناگۇل زايروۆا بالا كۇتىمىنە وراي ەكى نەمەرەسىنە مەكتەپكە دايارلاۋعا بەرىلەتىن 40 مىڭ تەڭگەنى الا الماي وتىرعاندىعىن اتاپ ءوتتى. ونىڭ ايتۋىنشا, قىزى ءۇش بالاسىمەن قولىندا وتىر, ەكەۋى مەكتەپتە وقيدى.
«وسى بالالارعا كومەك الۋ ءۇشىن قۇجات وتكىزسەك, مەنىڭ جانە اتاسىنىڭ ءبىر ايلىق تابىسىن ەسەپتەپ, كورسەتكىشتەن اسىپ تۇر, سول سەبەپتى سىزگە بەرىلمەيدى دەگەن جاۋاپ كەلدى. بالالار مەنىڭ قامقورلىعىمدا ەمەس قوي. بۇل – بولەك وتباسى. نەگە اتا-اجەسىنىڭ تابىسى ەسەپتەلۋ كەرەك. الەۋمەتتىك جاعدايى نەگە ەسكەرىلمەيدى. وقۋشىلارعا مەكتەپكە دايىندىققا بەرىلەتىن 40 مىڭ تەڭگە ءادىل تاعايىندالسا», دەدى ول.
ازاماتتاردىڭ پىكىرىن نازارعا العان مۇرات ابەنوۆ بۇل ماسەلەلەر بويىنشا ءتيىستى مينيسترلىكتەرگە ۇسىنىس بەرەتىنىن ايتتى.
«بارلىق اۋىلدا حالىقپەن كەزدەسكەندە كوتەرىلەتىن ماسەلەلەر بىردەي. ول – مەديتسينالىق قىزمەتتىڭ ساپاسى, مىندەتتى الەۋمەتتىك مەديتسينالىق ساقتاندىرۋ قورىنىڭ جۇمىسى. حالىق قورعا اقشاسىن تولەيدى, بىراق ورنىنا الىپ جاتقان ساپالى قىزمەتى جوق. ەكىنشى ماسەلە – بالالارعا بەرىلەتىن مەكتەپتەگى ىستىق تاماققا بولىنەتىن قارجى كولەمىنىڭ ءار الۋاندىعى. ماسەلەن, ءبىر اۋىلدا ءبىر بالاعا كۇنىنە تاماق ىشۋگە 200 تەڭگە, ەندى ءبىر اۋىلدا 400 تەڭگە قاراستىرىلعان. استانا مەن الماتىدا 800 تەڭگە, ال نازارباەۆ زياتكەرلىك مەكتەبىندە 2000 تەڭگە دەگەن رەنىشتەر ايتىلىپ جاتىر. ارينە, بۇل وتە ورىندى دەپ ەسەپتەيمىن. سەبەبى مەملەكەت تاراپىنان بارلىق بالاعا بىردەي جاعداي جاسالۋى كەرەك. سوندىقتان ءبىز پارلامەنت قابارعاسىندا بۇل ماسەلە بويىنشا ءتيىستى مينيسترلىكتەرگە ستاندارتتار ەنگىزۋ جونىندە ۇسىنىس بەرەتىن بولامىز», دەدى مۇرات ابەنوۆ.
