تىگىن تىگۋ ءىسىن بالا كۇنىندە اناسىنان ۇيرەنگەن. سودان بەرى قولىنان ينە-ءجىپتى تاستاماي كەلەدى. ال اياقكيىم تىگۋمەن تەك حوببي رەتىندە اينالىسىپ, باستاپقىدا اعايىن-تۋىستارىنىڭ تاپسىرىسىن ورىنداپ جۇرگەن. كەيىننەن بۇل ءىسىن تۇراقتى كاسىپكە اينالدىرۋعا بەكىنىپتى.
«كاسىپ باستاۋ وڭاي ەمەس. وعان تاۋەكەل دە, ءتىپتى قارجى دا كەرەك. سوندىقتان اۋداندىق جۇمىسپەن قامتۋ ورتالىعىنىڭ ماماندارىنان, «اتامەكەن» ۇكپ-نىڭ وڭىرلىك فيليالىنان كەڭەس الىپ, بيزنەس-جوسپار قۇردىم. 2021-2025 جىلدارعا ارنالعان كاسىپكەرلىكتى دامىتۋ جونىندەگى ۇلتتىق جوبا اياسىندا 1 ملن 380 مىڭ تەڭگە كولەمىندەگى قايتارىمسىز قارجىعا قول جەتكىزدىم. تىگىن ماشىنكەسىن, وزگە دە قۇرال-جابدىقتاردى ساتىپ الىپ, شاعىن شەبەرحانا اشتىم», دەيدى جانارگۇل.
ول اياقكيىمنىڭ ساپالى بولعانىن قالايدى. سول سەبەپتەن ساپالى ءجىپتى يران مەن تۇركيادان تاپسىرىسپەن الدىرادى.
«كەلىنىم ءوزىم سەكىلدى قولونەرگە جاقىن جان. ۇيدەن ۇلتتىق ناقىشپەن كورپە تىگەدى. ونىڭ ءبارىن تاپسىرىسپەن جاسايدى. ءوزىم ءبىر كۇندە 2-3 جۇپ اياقكيىم دايىندايمىن. باعاسى – 5 مىڭ تەڭگە. ەندى بالالارعا ارنالعان جابىق ۇلگىدەگى اياقكيىمدەردى توقۋعا كوشەمىن», دەيدى ج.امانعاليەۆا.
ونىڭ ايتۋىنشا, اياقكيىمنىڭ بازار مەن دۇكەندە ساتىلاتىن تۇرلەرىنەن بىرنەشە ەرەكشەلىگى بار. بىرىنشىدەن, اياقتى تەرلەتپەيدى. ەكىنشىدەن, ءيىس شىعارمايدى. ۇشىنشىدەن, بۇل اياقكيىم جۋعان سوڭ ءوڭىن بۇزبايدى.
اتىراۋ وبلىسى
