ماسەلەن, اتىراۋ وبلىسىندا 2000 جىلدان بەرى قۇرىلىس يندۋسترياسى قارقىن الىپ وتىر. مۇنايلى شاھاردا بىرنەشە شاعىن اۋداندا تۇرعىن ءۇي بوي تۇزەدى. تەك وبلىس ورتالىعى عانا ەمەس, اۋداندار مەن شالعايداعى اۋىلداردا دا مەكتەپتەر, مادەنيەت ۇيلەرى مەن مەديتسينا نىساندارى كوپتەپ پايدالانۋعا بەرىلىپ كەلەدى.
اتىراۋ وبلىسى اكىمىنىڭ ورىنباسارى جاسۇلان بيسەمبيەۆتىڭ ايتۋىنشا, 2025 جىلعا دەيىن 35 دەنساۋلىق ساقتاۋ نىسانىن سالۋ جوسپارى بار. ونىڭ ىشىندە وسى جىلدىڭ سوڭىنا دەيىن 10 مەديتسينالىق نىساندى پايدالانۋعا بەرۋ كوزدەلىپ وتىر.
«قۇرمانعازى اۋدانىنداعى التىنشى, شاعىرلى, جاستالاپ, ەگىنقۇدىق اۋىلدارىندا مەديتسينالىق نىساندى سالۋعا دايىندىق باستالدى. قازىر ارنايى بولىنگەن ۋچاسكەلەردە توپىراق توگۋ جۇمىستارى ءجۇرىپ جاتىر. ال ماحامبەت اۋدانىنىڭ تالدىكول اۋىلىنداعى توزىعى جەتكەن دارىگەرلىك امبۋلاتوريا عيماراتىن بۇزۋ قولعا الىندى. ورنىنا زاماناۋي عيمارات سالىنادى. تۇرعىندار يساتاي اۋدانىنىڭ ورتالىعى اققىستاۋ اۋىلىندا فەلدشەرلىك-اكۋشەرلىك پۋنكت, جىلىوي اۋدانىندا ورتالىق اۋرۋحانا, اتىراۋ قالاسىنىڭ ماڭىنداعى بەرەكە, دامبى اۋىلدارىندا دارىگەرلىك امبۋلاتوريانىڭ يگىلىگىن كورە باستايدى», دەيدى ج.بيسەمبيەۆ.
اكىم ورىنباسارىنىڭ دەرەگىنە سۇيەنسەك, كەلەسى جىلى ءدال وسىنداي 25 نىساننىڭ قۇرىلىسى اياقتالادى. جاڭا نىساندار اراسىندا 7 مەديتسينالىق پۋنكت, 6 دارىگەرلىك امبۋلاتوريا, 5 فەلدشەرلىك-اكۋشەرلىك پۋنكت بار. اتىراۋ قالاسىندا ءۇش قوسالقى پۋنكتى بار جەدەل مەديتسينالىق جاردەم ستانساسى ءۇشىن جاڭا عيمارات بوي كوتەرەدى.
سونىمەن قاتار بيىل 7 مەكتەپ پەن 1 جاپسارجايدىڭ قۇرىلىسىن اياقتاۋ جوسپارلانعان. ءسويتىپ, جالپى سانى 6 450 ورىنعا شاقتالعان جاڭا مەكتەپتەر وقۋشىلاردى قابىلدايدى. قولدانىسقا بەرىلەتىن جاڭا مەكتەپتەردىڭ بەسەۋى اتىراۋ قالاسىنىڭ اۋماعىندا ورنالاسقان. ناقتىلاي ايتقاندا, نۇرسايا, سارىارقا شاعىن اۋداندارىنداعى Binom مەكتەپتەرى, ماعجان جۇماباەۆ اتىنداعى مەكتەپتىڭ جاڭا عيماراتى, جاڭاتالاپ جانە اقجار اۋىلىندا, ماحامبەت اۋدانىندا قۇرىلىسى اياقتالاتىن ءبىلىم ورداسى, يساتاي اۋدانىنىڭ تۇششىقۇدىق اۋىلىنداعى مەكتەپتىڭ جاپسارجايى پايدالانۋعا تاپسىرىلادى. ال كەلەسى جىلى 18 مەكتەپتى پايدالانۋعا بەرۋ جوسپارلانىپ وتىر. ونىڭ ىشىندە 9 ءبىلىم ورداسى «جايلى مەكتەپ» باعدارلاماسىمەن سالىنادى.
مىنە, وسىنداي الەۋمەتتىك ماڭىزى زور نىسانداردىڭ بارىندە قۇرىلىسشىلاردىڭ ماڭداي تەرى, قۇرىش قولىنىڭ قولتاڭباسى, ءبىر سوزبەن ايتقاندا, قاجىرلى ەڭبەگى بارى داۋسىز. ءبىر قاراعاندا اق قاعازعا جوباسى سىزىلعان ءتۇرلى عيماراتتىڭ ىرگەتاسىن قۇيىپ, تاسىن قالاۋ, سىلاپ-سىرلاۋ وڭاي كورىنۋى مۇمكىن. بىراق ءوز ىسىنە جاۋاپكەرشىلىكپەن قارايتىن قۇرىلىسشىلار ءۇشىن ولاي ەمەس. ءار ءىستىڭ ءوز قيىندىعى بولاتىنى سەكىلدى, عيماراتتى تۇرعىزۋدا جوبادان اۋىتقىماۋ قاجەت. سول سەبەپتەن تاس قالاۋشىلار دا, سىلاقشىلار دا ءار كۇنگى ءىسىنىڭ ناتيجەسىنە ەكى شۇقىپ, ءبىر قارايدى.
ماسەلەن, «تارازقۇرىلىسينۆەست» جشس باس ديرەكتورى نۇربولا ءابدىراسىلوۆتىڭ ايتۋىنشا, بىلتىردان بەرى اتىراۋ قالاسىنىڭ «بىرلىك-2» شاعىن اۋدانىنداعى 600 ورىندىق مەكتەپتىڭ قۇرىلىسى سالىنىپ جاتىر. ءبىلىم ورداسىنىڭ نىسانىن 2024 جىلعى قىركۇيەككە دەيىن پايدالانۋعا تاپسىرۋ جوسپارلانىپ وتىر. اتالعان سەرىكتەستىك قۇرىلىسشىلارى بۇعان قوسا تاسقالا, ەركىنقالا ەلدى مەكەندەرىندە دە مەكتەپتەردىڭ قۇرىلىسىن جۇرگىزۋدى قولعا العان.
ال «باتىسسترويسەرۆيساتىراۋ» جشس-نىڭ 150-گە جۋىق قۇرىلىسشىسى 8 نىساننىڭ قۇرىلىسىن ساپالى جۇرگىزۋدى ماقسات ەتىپ وتىر. سەرىكتەستىكتىڭ ۋچاسكە شەبەرى ەركەبۇلان ەسەنوۆتىڭ ايتۋىنا قاراعاندا, سالىنىپ جاتقان نىساندار الەۋمەتتىك سالا ءۇشىن اسا قاجەت. ويتكەنى تۇرعىندار بالتىرى سىزداپ, باسى اۋىرسا, اۋرۋحانا دارىگەرلەرىنە جۇگىنەدى. رۋحاني ازىق الۋ ءۇشىن مادەنيەت ۇيلەرىنە بارادى. ال سپورت كەشەندەرى سالاماتتى ءومىر سالتىن ۇستانىپ, بۇقارالىق سپورتقا دەن قويعانداردىڭ ۇدايى باس قوساتىن نىسانىنا اينالادى.
ء«بىزدىڭ قۇرىلىسشىلار بريگادالارى ءار نىساننىڭ ساپالى سالىنۋىنا باسا ءمان بەرەدى. ۇجىمدا قۇرىلىس سالاسىندا تولىمدى تاجىريبەسى قالىپتاسقان ماماندار جيناقتالعان. تاس قالاۋشىلار, سىلاقشىلار جۇمىسىن جاۋاپكەرشىلىكپەن اتقارادى», دەدى ە.ەسەنوۆ.
اتىراۋدا قۇرىلىس يندۋسترياسىنا مول ۇلەس قوسىپ جۇرگەن قۇرىلىسشىلاردىڭ كاسىبي مەرەكەسى قارساڭىندا تاس قالاۋشىلار مەن سىلاقشىلاردىڭ سايىسى ءوتتى. وعان قۇرىلىس كومپانيالارىنان 7 كوماندا قاتىسىپ, شەبەرلىگىن ورتاعا سالدى. قۇرىلىسشىلار باسەكەسىنە وبلىستىق مەملەكەتتىك ساۋلەت-قۇرىلىس باقىلاۋ باسقارماسىنىڭ ءبولىم باسشىسى رۇستەم ماحاباەۆ, ساراپشى تالعات بيسەنوۆ پەن تەحنيكالىق قاداعالاۋشى قانات ەرمۇحانوۆ قازىلىق ەتتى.
«ەل اۋماعىنداعى بوي كوتەرگەن ءار تۇرعىن ۇيدە, ءار عيماراتتا, الەۋمەتتىك نىساندا قۇرىش قولدى قۇرىلىسشىلاردىڭ قولتاڭباسى بار. قۇرىلىس يندۋسترياسىن دامىتۋعا ۇلەس قوسىپ جۇرگەن قۇرىلىسشىلارعا دا, سالاعا جاۋاپتى ماماندارعا دا ۇلكەن جاۋاپكەرشىلىك جۇكتەلىپ وتىر. ويتكەنى ءبارىمىز ءتۇرلى ماقساتتاعى عيماراتتار مەن تۇرعىن ۇيلەر قۇرىلىسىن سالىپ قانا قويماي, وندا جۇمىس ىستەيتىن, تۇراتىن ادامداردىڭ ءومىرى ءۇشىن جاۋاپ بەرەمىز. سول سەبەپتەن قۇرىلىسشىلاردىڭ تاجىريبەسىن شىڭداۋ, ءبىر-بىرىمەن تاجىريبە الماسۋىنا سايىستىڭ ىقپالى زور بولادى», دەدى وبلىس اكىمىنىڭ ورىنباسارى قايرات نۇرتاەۆ.
وبلىستىق قۇرىلىس باسقارماسىنىڭ باسشىسى نۇربەرگەن قۇسايىنوۆتىڭ ايتۋىنشا, مۇنداي سايىس وسىمەن ەكىنشى رەت وتكىزىلىپ وتىر. العاش رەت 2019 جىلى وتكىزىلگەن. بۇل سايىس قۇرىلىسشىلاردىڭ بىلىكتىلىگىن ارتتىرۋعا ىقپال ەتەدى.
«بۇل سايىسقا قاتىسۋشىلاردىڭ جۇمىسىن باعالاۋعا قۇرىلىس سالاسىنداعى بىلىكتى ماماندار شاقىرىلدى. ولار سايىسكەرلەردىڭ ەڭبەك قاۋىپسىزدىگىن ساقتاۋ دەڭگەيىنە, كىرپىشتى قالاۋ تاسىلىنە, تىك جانە كولدەنەڭ تىگىستى ساقتاۋىنا, سىرتقى جانە ىشكى ۆەرستىڭ تۇزۋلىگىنە, سىلاقتى تەگىس جۇرگىزۋگە, جالپى جۇمىستىڭ ساپاسىنا باعاسىن بەردى», دەيدى ن.قۇسايىنوۆ.
قۇرىلىسشىلار سايىسىنا قازىلىق ەتكەن ماماندار شەشىمىمەن جەڭىمپازدار مەن جۇلدەگەرلەر انىقتالدى. سىلاقشىلار اراسىنان ءبىرىنشى جۇلدەنى «سۇڭقار قۇرىلىس» جشس بريگاداسى ەنشىلەدى. ال «ARSM» مەن «باتىساليانسستروي» جشس سىلاقشىلارى ەكىنشى جانە ءۇشىنشى جۇلدەنى جەڭىپ الدى.
تاس قالاۋشىلار شەبەرلىگىن ءبىر-بىرىنەن اسىرۋعا تىرىستى. سايىستىڭ ءبىرىنشى جۇلدەسى «TSG Construction» جشس كومانداسىنا بەرىلدى. «باتىسسترويسەرۆيس» بەن «تارازقۇرىلىسينۆەست» جشس تاس قالاۋشىلارى ەكىنشى جانە ءۇشىنشى جۇلدەنى ءوزارا ءبولىستى.
سونداي-اق شاعىن فۋتبولدان تۋرنيرگە قۇرىلىسشىلاردان قۇرالعان 15 كوماندا قاتىستى. تۋرنيردە ءبىرىنشى ورىندى وبلىستىق جولاۋشىلار كولىگى, اۆتوموبيل جولدارى جانە ەنەرگەتيكا باسقارماسىنىڭ كومانداسى, ەكىنشى ورىندى «سالا», ءۇشىنشى ورىندى «BI Group» جشس كومانداسى يەلەندى. جاسىل الاڭدا جوعارى شەبەرلىك كورسەتكەن بىرنەشە ويىنشى اتالىمدار بويىنشا جۇلدەلەرگە يە بولدى. ارسلان قۇتفۋللين – «ۇزدىك ويىنشى», ءال-فارابي قويباعاروۆ – «ۇزدىك شابۋىلشى», جانبوتا نىعمەتوۆ – «ۇزدىك سۇرمەرگەن», ايداربەك زينوللاەۆ – «ۇزدىك قاقپاشى», تۇرلان ايتباەۆ «ۇزدىك قورعاۋشى» اتاندى.
اتىراۋ وبلىسى
