ءدال وسى كۇنى جىلعالارىنان كوپتەن بەرى جاڭبىر سۋى اقپاعان قاراعاندىدا نوسەر جاۋىن قۇيدى. ۇلى اقىننىڭ تۋعان كۇنىندە تابيعات-انانىڭ سىيى وسى بولدى. اسپاننان نۇر قۇيىلدى, جەردە جىر وقىلدى. دالا ساحناسىنا جينالعان جۇرت جاڭبىردىڭ استىندا قالسا دا, كەشتى ابدەن تاماشالاپ بارىپ تارقاستى.
كەشتىڭ شىمىلدىعىن اقىن, جازۋشىلار وداعى وبلىستىق فيليالىنىڭ توراعاسى جانات جاڭقاش ۇلى اشتى. تۇرعىنداردى مەرەكەمەن قۇتتىقتاپ, حاكىمگە ارناعان ولەڭىن وقىدى.
«اباي – ادامزاتتىڭ اقىنى. اباي – الاشتىڭ ءۇنى. شىعارمالارىندا قازاقتىڭ بار مۇڭىن, قايعىسىن ايتىپ كەتكەن. حاكىمنىڭ تۋىندىلارىنا ءۇڭىلىپ, قازاقتىڭ ۇلى حالىق ەكەنىنە كوزىڭ جەتەدى. قازاقتىڭ ءسوز ونەرىن شىڭعا شىعارعان ۇلى تۇلعا. بارشاڭىزدى حاكىمنىڭ تۋعان كۇنىمەن شىن جۇرەكتەن قۇتتىقتايمىن», دەدى ول.
ودان كەيىن ءداستۇرلى ءاننىڭ دۇلدۇلدەرى سايان بودەسوۆ, قۋاندىق توكەنوۆ باستاعان انشىلەر اباي اندەرىن ورىندادى. تالانتتى ءانشى ارايلىم جۇكەنوۆا دا ەسترادالىق جانردا «كوزىمنىڭ قاراسىن» شىرقادى. سۇلتان داۋلەتحان, ەرىك نارىن, ەلميرا سايلاۋ, سالتانات قايىربەك سىندى اقىندار ءوز شىعارماشىلىعىنان ولەڭ وقىدى.
«اباي دۇنيەگە كەلگەن كۇن – قازاق پوەزياسى مەن تۇتاس ادەبيەتىنىڭ ءھام دۇنيەتانىمىنىڭ مەرەكەسى. سول مەرەكە كۇنى قاراعاندى ورتالىق ساياباعىندا نوسەرلەپ جاڭبىر قۇيدى, دۇركىرەپ ءان مەن جىر توگىلدى. ولەڭ وقىپ قايتىپ بارا جاتقاندا, ولەڭىڭ تۋرالى جىلى لەبىز ەستۋ, ءتىپتى, عاجاپ. ءداستۇرلى تۇردە ءوتىپ كەلە جاتقان, دالامىزدى دۋمانعا بولەيتىن وسىنداي يگى ءىس-شاراعا قاتىسقانىما قۋانىشتىمىن», دەدى سالتانات قايىربەك.
ۇلى ويشىلدىڭ قاراسوزدەرى دە ۇمىت قالمادى. رەسپۋبليكالىق, وبلىستىق, قالالىق بايقاۋلاردا جۇلدە الىپ جۇرگەن بەكتاس جۇمان مەن ءمادي بيجان حاكىمنىڭ قاراسوزدەرىن شەبەر وقىدى. «ساحناعا سۇرانىپ, ابايدىڭ ولەڭىن جاتقا وقىعان كورەرمەندەر دە بولدى. بۇل ادەبي-سازدى كەشتىڭ ءوز ماقساتىنا جەتكەندىگىن كورسەتتى», دەيدى ۇيىمداستىرۋشىلار.
يگى ءىس-شارانى جازۋشىلار وداعىنىڭ قاراعاندى وبلىستىق فيليالى قالالىق اكىمدىكتىڭ قولداۋىمەن ۇيىمداستىردى. جاز بويى ورتالىق ساياباقتا «قاراعاندى – قارا ولەڭ» اتتى ادەبي-سازدى كەشتەر ءوتىپ ءجۇر. بۇل كەش بۇرىنعى كەشتەردەن وزگەرەك, ارينە.
قاسىمحان عالىم,
«Egemen Qazaqstan»
قاراعاندى وبلىسى
