فوتو: ۇكىمەتتىڭ ءباسپاسوز قىزمەتى
كەزدەسۋ ايماقتىق ەكولوگيالىق سامميت – 2026 اياسىندا ءوتتى. تاراپتار ەلىمىزدىڭ جاڭا كونستيتۋتسياسىندا بەكىتىلگەن قورشاعان ورتانى قورعاۋ نورمالارى مەن «تازا قازاقستان» باستاماسى نەگىزىندە بىرلەسكەن جوبالاردى جۇزەگە اسىرۋدىڭ ماڭىزىن اتاپ ءوتتى.
بۇگىن ەلوردادا قاتتى تۇرمىستىق قالدىقتاردى وڭدەپ, ەلەكتر ەنەرگياسىن وندىرۋگە ارنالعان «استانا ەنەرگياسى» ەكوپاركى» ينۆەستيتسيالىق جوباسىنىڭ ءبىرىنشى كەزەڭىنىڭ قۇرىلىسى باستالدى. جوباعا 180 ملن دوللار ينۆەستيتسيا باعىتتالادى. ءبىرىنشى كەزەڭدە كاسىپورىننىڭ قۋاتى تاۋلىگىنە 1,5 مىڭ توننادان استام قالدىقتى وڭدەۋگە, ال وندىرىلەتىن ەلەكتر ەنەرگياسى 50 مۆت-قا دەيىن جەتۋگە ءتيىس.
جوبا اياسىندا قالدىقتاردى تازارتۋدىڭ زاماناۋي كوپساتىلى جۇيەلەرى ەنگىزىلىپ, ەكولوگيالىق تالاپتاردىڭ ساقتالۋىنا ەرەكشە ءمان بەرىلمەك. وسى ماقساتتا ەلوردادا «East Hope» جشس بىرلەسكەن كاسىپورنى قۇرىلدى. نىساندى پايدالانۋعا بەرۋ 2029 جىلدىڭ ماۋسىمىنا جوسپارلانعان.
ء«بىزدىڭ مەملەكەتتەرىمىزدىڭ باسشىلارى اراسىندا سەنىمگە قۇرىلعان قارقىندى ديالوگ ورنىققان, بۇل – بىرلەسكەن ينۆەستيتسيالىق جوبالاردى جۇزەگە اسىرۋ ءۇشىن نەگىز. ءبىز قىتاي تاراپى مەن بيزنەسكە ەكونوميكانىڭ دامۋىنا قوسقان ۇلەسى ءۇشىن ريزامىز جانە بارلىق قاجەتتى جاعدايلاردى جاساۋعا دايىنبىز. «استانا ەنەرگياسى» ەكوپاركى جوباسى ەلوردا ءۇشىن عانا ەمەس, ەل ءۇشىن دە ستراتەگيالىق ماڭىزعا يە. ۇكىمەت وسى جوبانى جۇزەگە اسىرۋ ءۇشىن بارلىق قاجەتتى قولداۋ شارالارىن كورسەتەدى», دەدى ولجاس بەكتەنوۆ.
پرەمەر-مينيستر ەنەرگەتيكا مينيسترلىگى مەن اكىمدىككە وسى تاجىريبەنى باسقا وڭىرلەرگە تاراتۋ مۇمكىندىگىن قاراستىرۋدى تاپسىردى.
قالدىقتى كاسىپ كوزىنە اينالدىردى: اۋىل تۇرعىنى ەرەكشە ەكولوگيالىق جوبانى ىسكە اسىردى
ءوز كەزەگىندە Shenzhen Energy Environment Co., Ltd ديرەكتورلار كەڭەسىنىڭ توراعاسى ۆان گان جوبانىڭ ەكىنشى كەزەڭىن ىسكە اسىرۋعا نيەتتى ەكەنىن جەتكىزدى. ونىڭ ايتۋىنشا, بۇل بولاشاقتا قاتتى تۇرمىستىق قالدىقتار پوليگوندارىندا جينالعان قوقىستى تولىق جويۋعا مۇمكىندىك بەرەدى. قازىرگى تاڭدا كومپانيانىڭ پورتفەلىندە تاۋلىگىنە 79 مىڭ توننا قۋاتتىلىعى بار 57 قوقىس وڭدەۋ زاۋىتى بار. شەنچجەن قالاسىندا قالدىقتاردىڭ 90%-ى سۇرىپتالىپ, كادەگە جاراتىلىپ جاتىر.
ء«بىز قازاقستاندا جۇمىس ىستەۋ مۇمكىندىگىن جوعارى باعالايمىز جانە جوبانى ساپالى جۇزەگە اسىرۋ ءۇشىن بار كۇش-جىگەرىمىزدى سالۋعا دايىنبىز. كاسىپورىن قىتاي مەن قازاقستان اراسىنداعى ءىس جۇزىندەگى ىنتىماقتاستىقتىڭ ماڭىزدى ۇلگىسى بولاتىنىنا سەنىمدىمىن. قازاقستان ۇكىمەتىنىڭ قولداۋىمەن جوبانى ودان ءارى ىلگەرىلەتۋدى جوسپارلاپ وتىرمىز», دەدى ۆان گان.
كەزدەسۋ بارىسىندا تاراپتار كومىرمەن جۇمىس ىستەيتىن جىلۋ ەلەكتر ورتالىقتارىن جانە گاز ەلەكتر ستانسالارىن ەكولوگيالىق جاڭعىرتۋ, سونداي-اق ءوندىرىستى جەرگىلىكتەندىرۋ باعىتىنداعى ارىپتەستىكتى دە تالقىلادى.
جيىن قورىتىندىسىندا تاراپتار جوبانى بەلگىلەنگەن مەرزىمدە ىسكە اسىرىپ, ەكولوگيا جانە ەنەرگەتيكا سالالارىنداعى ىنتىماقتاستىقتى كەڭەيتۋگە دايىن ەكەنىن راستادى.
