فوتو: اشىق دەرەككوز
«ەكى ەل دە – تابيعي بايلىعى مول مەملەكەتتەر. تاۋ-كەن سالاسىندا, سونىڭ ىشىندە گەولوگيالىق بارلاۋ جانە جەر قويناۋىن يگەرۋ ىسىندە قازاقستاننىڭ تاجىريبەسى مول. قوس تاراپ وسى باعىتتا بىرلەسە كۇش جۇمىلدىرۋعا دايىن. ەلدەرىمىز اۋىل شارۋاشىلىعىنا, اسىرەسە, مال شارۋاشىلىعىنا ايرىقشا ءمان بەرەدى. قازىرگى زاماندا مال ونىمدەرىنىڭ حالىقارالىق ستاندارتتارعا ساي ءارى قاۋىپسىز بولۋى اسا ماڭىزدى. قازاقستاندا مال اۋرۋىنا قارسى ءتيىمدى ۆاكتسينا ءوندىرىسى جولعا قويىلعان. ءبىز ەلىمىزدىڭ ۆاكتسينالارىن موڭعولياعا جەتكىزۋ, بولاشاقتا بىرلەسكەن ءوندىرىس ورىندارىن اشۋ مۇمكىندىگىن قاراستىرۋعا مۇددەلىمىز. سونداي-اق موڭعوليانىڭ جەردى عارىشتان باقىلايتىن جۇيە قۇرۋ باستاماسىنا قولعابىس ەتۋگە دايىنبىز. وسى سالاعا قاجەتتى بىلىكتى مامانداردى دا دايارلاۋعا بولادى. قازاقستان تسيفرلىق دامۋ ماسەلەسىنە ايرىقشا نازار اۋدارادى. بۇل – ەلىمىزدىڭ بولاشاعىن, جاھاندىق باسەكەدەگى ورنىن ايقىندايتىن ستراتەگيالىق سالا. بۇگىن حۋرەلسۋح مىرزا «Alem.AI» حالىقارالىق ورتالىعىنا جانە «اقىلدى قالانى» باسقارۋ ورتالىعىنا» بارادى. جالپى تسيفرلاندىرۋ سالاسىنداعى ءوزارا ىنتىماقتاستىقتى دامىتۋعا ەكى تاراپ تا مۇددەلى», دەدى مەملەكەت باسشىسى.
سونىمەن قاتار قازاقستان مەن موڭعوليا پرەزيدەنتتەرى مادەني-گۋمانيتارلىق بايلانىستى تالقىلاعان.
«بىلتىر استانادا وتكەن «Silk Way Star» حالىقارالىق ۆوكالدىق كونكۋرسىندا موڭعوليانىڭ ميشەل اتتى ءانشىسى ءبىرىنشى ورىن الىپ, كورەرمەننىڭ ىستىق ىقىلاسىنا بولەندى. مۇنداي جوبالار حالىقتارىمىزدىڭ عاسىرلار بويى قالىپتاسقان رۋحاني بايلانىسىن بەكەمدەيتىنى ءسوزسىز. سونداي-اق ەلدەرىمىزدىڭ ءبىلىم-عىلىم سالاسىنداعى ىنتىماقتاستىعىن نىعايتۋعا مول مۇمكىندىك بار», دەدى قازاقستان پرەزيدەنتى.
قازاقستان مەن موڭعوليا اراسىنداعى ساۋدا كولەمى 7,7 پايىزعا ءوستى
قاسىم-جومارت توقاەۆ قازاقستان جىل سايىن موڭعول ازاماتتارىنا ءبىلىم گرانتتارىن ءبولىپ كەلە جاتقانىنا نازار اۋداردى.
ء«بىز گرانت سانىن كوبەيتىپ, موڭعولياعا قاجەتتى ماماندار دايىنداۋ ىسىنە اتسالىسۋعا ءازىرمىز. بيىل موڭعوليادا «Study in Kazakhstan» ءبىلىم جارمەڭكەسىن وتكىزۋ جوسپارلانۋدا. سونىمەن قاتار ءبىز ۇلان-باتىر قالاسىندا قازاقستاننىڭ ىرگەلى ۋنيۆەرسيتەتىنىڭ فيليالىن اشۋدى ۇسىندىق. بۇعان قوسا, ەكى ەلدىڭ قالالارى اراسىنداعى باۋىرلاستىق قارىم-قاتىناستى ودان ءارى دامىتۋعا كەلىستىك. بۇل شارالار ەلدەرىمىزدىڭ دوستىعىن بەكەمدەۋگە, ساۋدا-ەكونوميكالىق جانە مادەني-گۋمانيتارلىق بايلانىستى كۇشەيتۋگە جول اشادى. وسى جۇمىستى جالعاستىرا بەرۋ ماڭىزدى دەپ سانايمىن», دەدى مەملەكەت باسشىسى.
قاسىم-جومارت توقاەۆ موڭعوليا پرەزيدەنتىنىڭ قازاقستانعا مەملەكەتتىك ساپارى وتە ناتيجەلى ءوتىپ جاتقانىن ايتتى.
«قازاقستان مەن موڭعوليانىڭ ايماقتىق جانە جاھاندىق دەڭگەيدەگى كوپتەگەن وزەكتى ماسەلە بويىنشا ۇستانىمدارى – ۇقساس. ەرتەڭ وتەتىن ەكولوگيالىق سامميت – سونىڭ ايقىن كورىنىسى. ءبىز موڭعوليامەن ىنتىماقتاستىقتى دامىتۋعا ايرىقشا كوڭىل بولەمىز. حالىقارالىق ۇيىمدار اياسىندا ءبىز ءبىر-بىرىمىزگە ۇنەمى قولداۋ كورسەتىپ كەلەمىز. بۇل ەلدەرىمىزدىڭ ستراتەگيالىق سەرىكتەستىگى جانە ءوزارا سەنىمىنىڭ ناقتى كورىنىسى ەكەنى انىق. مەن مۇنى جوعارى باعالايمىن», دەدى قازاقستان پرەزيدەنتى.
بايان-ولگەي ايماعىندا قازاقستاننىڭ كونسۋلدىق مەكەمەسى اشىلادى
ۋحنااگين حۋرەلسۋح بۇگىنگى كەلىسسوزدەرگە جوعارى باعا بەردى.
«قۇرمەتتى پرەزيدەنت, ءبىز ءسىزدىڭ موڭعوليا مەن قازاقستان اراسىنداعى ىنتىماقتاستىقتى دامىتۋعا قوسقان ۇلەسىڭىزدى جوعارى باعالايمىز. بۇگىنگى قول جەتكىزىلگەن ۋاعدالاستىقتار مەن بىرلەسكەن ءىس-قيمىل جوسپارى ناتيجەلى جۇزەگە اسىپ, ەكى ەلدىڭ يگىلىگىنە قىزمەت ەتەتىنىنە كامىل سەنەمىن. باۋىرلاس حالىقتارىمىزدىڭ دوستىعى ۇرپاقتان ۇرپاققا ۇلاسىپ, ستراتەگيالىق ارىپتەستىگىمىز بەن ىقپالداستىعىمىز ماڭگى جاساي بەرسىن!», دەدى موڭعوليا پرەزيدەنتى.
