فوتو: اقوردا
ء«بىزدىڭ تاريحىمىز بەن تامىرىمىز – ورتاق. ەكى ەل دە كوشپەندىلەر وركەنيەتى مەن «كيىز ۇيلەر» مادەنيەتىنىڭ مۇراگەرى سانالادى. قوس حالىقتىڭ بولمىسى مەن رۋحاني دۇنيەسى, ءومىر سالتى مەن ادەت-عۇرپى – ۇندەس. سوندىقتان ءبىز ءاردايىم ءبىر-بىرىمىزگە تىلەكتەس بولىپ, جەتىستىكتەرىمىزگە شىنايى قۋانامىز. سوڭعى جىلدارى قازاقستان مەن موڭعوليانىڭ قارىم-قاتىناسى تىڭ قارقىنمەن دامىپ كەلە جاتىر. وسىدان ءبىر جارىم جىل بۇرىن موڭعولياعا مەملەكەتتىك ساپارمەن بارعانىمدى بىلەسىزدەر. قادىرلى پرەزيدەنت ۋحنااگين حۋرەلسۋح مىرزانىڭ جانە بارشا موڭعول حالقىنىڭ ىقىلاس-ءىلتيپاتىن ءاردايىم ريزاشىلىقپەن ەسكە الامىن. سول ساپار بارىسىندا Cتراتەگيالىق ارىپتەستىك تۋرالى دەكلاراتسياعا قول قويدىق. بۇل – مىڭجىلدىق باۋىرلاستىعىمىزدى ءبىرجولا بەكىتە تۇسكەن تاريحي قۇجات. قازىرگى تاڭدا ەكى ەلدىڭ پارلامەنتتەرى مەن قۇزىرلى مينيسترلىكتەرى تىعىز بايلانىس ورناتقان. ۇكىمەتارالىق كوميسسيا جانە ىسكەرلىك كەڭەس تابىستى جۇمىس ىستەپ كەلەدى. پرەزيدەنت حۋرەلسۋحتىڭ بۇگىنگى ساپارى وسى ىنتىماقتاستىقتى نىعايتا تۇسەرى انىق», دەدى قازاقستان پرەزيدەنتى.تاراپتار ەكىجاقتى قارىم-قاتىناستىڭ بارلىق باعىتى بويىنشا مازمۇندى ءارى ناتيجەلى كەلىسسوزدەر جۇرگىزگەن.
«ساياسي-ەكونوميكالىق, مادەني-گۋمانيتارلىق جانە وزگە دە سالاداعى ىقپالداستىعىمىزدى ودان ءارى ارتتىرۋعا كەلىستىك. اتاپ ايتقاندا, ءبىز موڭعوليانىڭ بايان-ولگەي ايماعىندا قازاقستاننىڭ كونسۋلدىق مەكەمەسىن اشۋ تۋرالى ءوزارا كەلىسىمگە كەلدىك. مۇنى, شىن مانىندە, باۋىرلاس ءارى تاريحى تامىرلاس ەلدەرىمىزدىڭ اراسىنداعى ستراتەگيالىق سەرىكتەستىك رۋحىنا ساي كەلەتىن ماڭىزدى قادام دەپ ايتۋعا تولىق نەگىز بار. سونداي-اق بۇل موڭعول ەلىنىڭ قازاق حالقىنا دەگەن ىزگى نيەتى مەن شىنايى دوستىق كوڭىلىنىڭ ايقىن كورىنىسى ەكەنى ءسوزسىز. ءبىز بۇل شەشىمدى جوعارى باعالايمىز. وسى ورايدا, مەن پرەزيدەنت حۋرەلسۋح مىرزاعا زور العىسىمدى ايتقىم كەلەدى. جالپى, ساپار بارىسىندا بىرقاتار ماڭىزدى قۇجاتتارعا قول قويىلدى. بۇگىن جاسالعان كەلىسىمدەر ەكى ەلدىڭ الىس-بەرىسىن جانداندىرا تۇسەتىنى ءسوزسىز. قازاقستان مەن موڭعوليا اراسىنداعى ساۋدا-ساتتىق كولەمى بىلتىر 130 ميلليون دوللار بولىپ, 7,7 پايىزعا ءوستى. ەلدەرىمىزدىڭ ەكونوميكالىق الەۋەتىن ەسكەرسەك, بۇل كورسەتكىشتى ارتتىرۋعا تولىق مۇمكىندىگىمىز بار. وسى ورايدا الداعى بىرنەشە جىلدا تاۋار اينالىمىن 500 ميلليون دوللارعا جەتكىزۋ جونىندە مەجە قويىپ وتىرمىز. ول ءۇشىن, ەڭ الدىمەن, ساۋدا-ساتتىقتاعى تاۋار ءتۇرىن كەڭەيتۋىمىز كەرەك. ەكونوميكالىق ىقپالداستىقتى تەجەيتىن كەدەرگىلەردى بارىنشا ازايتۋ قاجەت. وسىدان ءبىر اي بۇرىن قازاقستاننىڭ ساۋدا ميسسياسى موڭعولياعا ارنايى ساپارمەن باردى. وندا ەكونوميكالىق بايلانىستاردى ارتاراپتاندىرۋعا قاتىستى ماڭىزدى ۇسىنىستار جاسالدى. ءبىز بىلتىر ەۋرازيا ەكونوميكالىق وداعى مەن موڭعوليا اراسىنداعى ۋاقىتشا ساۋدا كەلىسىمىن راتيفيكاتسيالادىق. بۇل قۇجات ەلدەرىمىز ءۇشىن كوپتەگەن تىڭ مۇمكىندىككە جول اشادى», دەدى قاسىم-جومارت توقاەۆ.
