سالانىڭ نەگىزگى كورسەتكىشتەرى تۋرالى اۋىل شارۋاشىلىعى ۆيتسە-ءمينيسترى امانعالي بەردالين باياندادى. ونىڭ ايتۋىنشا, قازاقستانداعى جىلىجاي كولەمى وتكەن جىلدىڭ قورىتىندىسىنا سايكەس 232,3 گەكتارعا قىسقارىپ, 1,2 مىڭ گەكتاردى قۇرادى. سونداي-اق جىلىجاي اۋماعىنىڭ قىسقارۋى وندىرىلگەن ءونىمنىڭ وزىندىك قۇنىنىڭ جوعارى بولۋىنا جانە بيزنەستىڭ تومەن رەنتابەلدىلىگىنە بايلانىستى.
بۇگىندە جىلىجايلاردىڭ نەگىزگى بولىگى تۇركىستان وبلىسىندا – 824,2 گا, الماتى وبلىسىندا – 79 گا, قاراعاندى وبلىسىندا – 43 گا, شىمكەنتتە – 139,2 گا كولەمىندە شوعىرلانعان. قازاقستاننىڭ باسقا ايماقتارىندا دا جىلىجايدىڭ سالىستىرمالى تۇردە شاعىن الاڭدارى بار.
ۆيتسە-مينيستر اشم ماۋسىمارالىق كەزەڭدە ەلەكتر ەنەرگياسى, گاز, كومىر شىعىندارىن سۋبسيديالاۋدى ەنگىزۋ بويىنشا جۇمىس جۇرگىزىپ جاتقانىن اتاپ ءوتتى. ول ءۇشىن 2023 جىلعى 1 مامىردان باستاپ كۇشىنە ەنگەن فەرمەرلىك جىلىجايلارعا ارنالعان ۇلتتىق ستاندارت (قر ست 3834-2023) بەكىتىلدى.
جيىنعا بەينەكونفەرەنتسيا ارقىلى اۋىل شارۋاشىلىعى تاۋارىن وندىرۋشىلەردىڭ وزدەرى دە قاتىستى. تۇركىستان وبلىسىنداعى «اگروتۋر» شارۋا قوجالىعىنىڭ باسشىسى تۇرسىن تاسحودجاەۆتىڭ ايتۋىنشا, جالپى جىلىجاي ماسەلەسى شەشىلە باستاعان.
«سەڭ قوزعالدى, جىلىجاي شارۋاشىلىقتارى ءۇشىن ستاندارتتار قۇرۋ ماسەلەسى جابىلدى. كومىر بويىنشا ايتار بولساق, بىز «شۇباركول كومىر» اق-مەن وتىن جەتكىزۋ تۋرالى شارت جاساسۋ ءۇشىن كووپەراتيۆ قۇردىق. ءبىز ءوزىمىز شامامەن 30-35 مىڭ توننا ساتىپ الدىق, ودان كوپ الۋعا قورقامىز, ويتكەنى ەگەر كوپ مولشەردە ساقتاساق, ول جانىپ كەتۋى مۇمكىن. اپتاپ ىستىق باسىلعاندا شارۋالار جانارماي ساتىپ الا باستايدى. ەگەر سۋبسيديا بولسا, وندا جىلىجاي شارۋاشىلىقتارى بەلسەندى ءوسىم كورسەتە باستايدى, شارۋالار ناتيجەگە جۇمىس ىستەي باستايدى», دەدى تۇرسىن تاسحودجاەۆ.
جاقىن ارادا ينۆەستيتسيالىق سۋبسيديالاۋ شەڭبەرىندە جىلىجاي كەشەندەرىن سالۋ جانە كەڭەيتۋ جونىندەگى جوبالاردى ىسكە اسىرۋ كەزىندە شىعىنداردى وتەۋدى 25%-دان 30%-عا دەيىن ارتتىرۋ جوسپارلانىپ وتىر. ەرەجەنىڭ جوباسىن قىركۇيەك ايىنىڭ سوڭىنا دەيىن بەكىتۋ جوسپارلانعان.
بۇدان باسقا, جابىق توپىراقتا وسىرىلگەن كوكونىس داقىلدارىن ءوندىرۋدى دامىتۋ ماقساتىندا تىڭايتقىشتار (ورگانيكالىق داقىلداردى قوسپاعاندا), پەستيتسيدتەر, بيواگەنتتەر مەن بيوپرەپاراتتاردىڭ قۇنىن سۋبسيديالاۋ, سۋارمالى سۋ, قيار جانە قىزاناق تۇقىمدارىن بەرۋ ارقىلى مەملەكەتتىك قولداۋ جالعاسادى.
سونداي-اق مەملەكەت تاراپىنان «اگروبيزنەس» امبەباپ نەسيەلەۋ باعدارلاماسى شەڭبەرىندە جىلىجاي قۇرىلىسىنا نەسيە بەرۋ جۇزەگە اسىرىلادى, بۇل رەتتە سۋبسيديالاۋ ەسەبىنەن مولشەرلەمە 6%-عا دەيىن تومەندەيدى.
