اتىراۋ وبلىسى اكىمىنىڭ ورىنباسارى جاسۇلان بيسەمبيەۆتىڭ مالىمەتىنشە, بيىل 211 مەكتەپتىڭ 11-سىنىبىن 6 081 تۇلەك ءبىتىردى. ونىڭ ىشىندە 159 تۇلەك «التىن بەلگىگە» يە بولعان ەدى.
سوڭعى جىلدارى وڭىردە مامانداندىرىلعان ءبىلىم وردالارى كوبەيدى. سونىڭ قاتارىندا 2021 جىلى اشىلعان جاراتىلىستانۋ باعىتىندا جاڭا فورماتتا ءبىلىم بەرەتىن «زياتكەر» مەكتەپ-ليتسەي-ينتەرناتى دا بار. بەس ءجۇز ورىندىق ءبىلىم ورداسىنا العاشقى جىلى 150 وقۋشى قابىلداندى. بيىل ونى العاشقى 32 تۇلەك ءبىتىرىپ شىقتى.
– مەكتەپ تۇلەكتەرىنىڭ ءبارى دە جوعارى وقۋ ورنىندا مەملەكەتتىك ءبىلىم گرانتىمەن وقىعىسى كەلەدى. الايدا گرانت تەك مەكتەپتە العان ساپالى ءبىلىمىنىڭ ناتيجەسىن كورسەتكەن زەردەلى تۇلەكتەرگە بەرىلەدى. ماسەلەن, اتىراۋ قالاسىنداعى «زياتكەر» مەكتەپ-ليتسەي-ينتەرناتىنىڭ 28 تۇلەگى مەملەكەتتىك ءبىلىم گرانتىن يەلەنىپ, جوعارى وقۋ ورىندارىنىڭ ستۋدەنتى اتانىپ وتىر. گرانت يەلەنگەندەر سانى اتالعان مەكتەپ تۇلەكتەرىنىڭ 88 پايىزىن قۇرادى. بۇل – «زياتكەر» مەكتەبى ءۇشىن ۇلكەن ابىروي ءارى ساپالى ءبىلىمنىڭ ناقتى كورسەتكىشى, –دەيدى جاسۇلان بيسەمبيەۆ.
ۇلتتىق تەستىلەۋ ورتالىعىنىڭ ديرەكتورى رۋسلان ەمەلباەۆتىڭ ايتۋىنشا, مەملەكەت باسشىسى اتىراۋلىق تۇلەكتەردىڭ جوعارى ءبىلىم الۋى ءۇشىن ارنايى گرانت ءبولۋدى تاپسىرعان. سوعان سايكەس, بيىل اتىراۋ وبلىسىنىڭ مەكتەپتەرىن بىتىرگەن تۇلەكتەرگە 1 500 نىسانالى گرانت بولىنگەن.
– بۇل – تەك اتىراۋ وبلىسىنىڭ تۇلەكتەرىنە بولىنگەن گرانت. ماسەلەن, پەداگوگيكا سالاسىنا 283, جاراتىلىستانۋ, ماتەماتيكا جانە ستاتيستيكا باعىتىنا – 49, اقپاراتتىق-كوممۋنيكاتسيالىق تەحنولوگيالار ماماندىعىنا – 561, ينجەنەرلىك, وڭدەۋ جانە قۇرىلىس يندۋسترياسىنا 607 گرانت ءبولىندى. نىسانالى گرانت كونكۋرسىنا قاتىساتىن ۇمىتكەرلەر جالپى گرانت كونكۋرسىنا دا قۇجات تاپسىرا الادى. بىراق نىسانالى گرانت ارقىلى تالاپكەر ءتورت قالانى جانە سول قالاداعى جوعارى وقۋ ورنىنىڭ بارلىعىن بەلگىلەۋگە مۇمكىندىگى بار, – دەيدى رۋسلان ەمەلباەۆ.
جىل سايىن مەكتەپ تۇلەكتەرىنە اتىراۋ وبلىسى اكىمىنىڭ گرانتى بەرىلىپ كەلەدى. بيىل اكىم گرانتىن 240 تۇلەككە بەرۋ كوزدەلىپ وتىر.
اتىراۋ وبلىسى
