ونىڭ اشىلۋ سالتاناتىنا بەلگىلى قوعام قايراتكەرلەرى مەن ابايتانۋشى عالىمدار, ەلىمىزدەگى ديپلوماتيالىق ەلشىلىكتەر وكىلدەرى قاتىستى.
– اباي كۇنى – ۇلتتىق رۋحىمىزدىڭ بايراعىن جەلبىرەتەتىن كۇن. كىرلەگەن جۇرەگىمىزدى ابايدى وقىپ تازارتاتىن كۇن. اباي كەمشىلىگىمىزدى سىنادى ەكەن دەپ, ابايدى جەك كورۋگە ەش حاقىمىز جوق. كەرىسىنشە, «سىن تۇزەلمەي, ءمىن تۇزەلمەيدى». اباي رۋحى اسقاقتاي بەرسىن! – دەدى اقىن داۋلەتكەرەي كاپ ۇلى.
راسىمەن دە, بۇل كۇنى كوكىرەك كوزىمىزدى وياتىپ, جانىمىز تازارعانداي كۇي كەشتىك. «سەگىز اياق», «جەلسىز تۇندە جارىق اي», «تاتيانا ءسوزى» سىندى اباي اندەرىن تىڭداپ, جان-جۇرەك شىمىرلاپ, كوڭىلىمىز الابۇرتتى. بۇدان ارمەن اباي الەمىنىڭ سان قىرىن جۇرتشىلىققا تانىتاتىن نەبىر كەرەمەت جيىندار لەگى باستالدى. سونداي-اق قالىڭ وقىرمان نازارىنا «اباي – تۇتاس ءبىر الەم» اتتى كىتاپ كورمەسى ۇسىنىلدى. كورمەگە ابايدىڭ ءار جىلدارى جارىق كورگەن ەڭبەكتەرى, فيلوسوفيالىق پايىمدارى, شەت تىلىنە تارجىمالانعان شىعارمالارى, اباي مۇراگەرلەرىنىڭ ەڭبەكتەرى التى ءبولىم بويىنشا جىكتەلىپ قويىلعان. كورمەنىڭ باستى قازىناسى – مۇحتار اۋەزوۆتىڭ 1942 جىلى جارىق كورگەن «اباي جولىنىڭ» ءبىرىنشى كىتابى. كىتاپ مۇقاباسىندا اۆتوردىڭ ءوز قولتاڭباسى بار ەكەنىن ايتا كەتكەن ءجون.
ادەبي ءىس-شارا اياسىندا «ادامشىلىقتىڭ الدى – ماحاببات, عادىلەت, سەزىم» اتتى حالىقارالىق دوڭگەلەك ۇستەل, «سەن دە ءبىر كىرپىش دۇنيەگە..» پوەزيا ساعاتى ءوتتى. سونداي-اق ۇستاز, «اعىلشىنشا ءتىل سىندىرۋ», «تولىق ادام جانە ءتورت تانۋ» سىندى جوبالاردىڭ اۆتورى ەرنات قاشقىنوۆتىڭ «اباي ارقىلى اعىلشىنشا ۇيرەن» اتتى شەبەرلىك ساعاتى بولدى.
«استانادا اعىلشىن تىلىنەن ساباق بەرىپ جۇرگەنىمدە, التىنشى سىنىپتا وقيتىن وقۋشىمنىڭ اتا-اناسى ء«سىز قازاق ءتىلىن جاقسى بىلەسىز. ادەبيەتتەن, اباي تاعىلىمىنان حابارىڭىز بار. بالاما اعىلشىن تىلىمەن قاتار قازاق ءتىلى مەن ادەبيەتىن ۇيرەتىڭىزشى» دەگەن ۇسىنىس ايتتى. اتا-انانىڭ ءوتىنىشىن جەرگە تاستاي الماي, ۇزاق ويلانىپ ءجۇرىپ, سوڭىندا اباي ارقىلى اعىلشىن ءتىلىن وقىتۋ يدەياسى ويعا كەلدى. وقۋشىلار اراسىندا تانىمال اباي ولەڭدەرى مەن قارا سوزدەرىن تالداپ الىپ, ونى اعىلشىنشا ۇيرەتۋدىڭ ادىستەمەسىن جاساپ شىعاردىم», دەيدى شىعارماشىل ۇستاز.
ەرنات قاشقىنوۆتىڭ شەبەرلىك ساعاتى قاتىسۋشىلارعا ەرەكشە اسەر ەتتى. ساباقتىڭ ءبىر ارتىقشىلىعى, اعىلشىن ءتىلىن مەڭگەرىپ قويماي, اباي ولەڭدەرىنىڭ ماعىناسىن تەرەڭىرەك ءتۇسىنىپ پايىمداۋعا دەگەن قىزىعۋشىلىعىمىز ارتقانداي. ۇستازدىڭ ايتۋىنشا, اباي الەمىن تانىپ-ءتۇسىنىپ, ولەڭ-قارا سوزدەرىنىڭ اعىلشىنشا جاتتاپ العان بالا حالىقارالىق بايگەلەردە دە سول ونەر-ءبىلىمىن ورتاعا سالا الادى, ءبىر سوزبەن ايتقاندا, «اباي الەمىنىڭ ەلشىلەرى» اتانادى دەيدى.
اقىننىڭ تۋعان كۇنىنە وراي الەۋمەتتىك جەلىدە ۇيىمداستىرىلعان «اباي مەنىڭ جۇرەگىمدە» بەينە-Reels-تار بايقاۋى دا قورىتىندىلانىپ, جەڭىمپازدار ماراپاتتالدى. ءىس-شارانىڭ سوڭىندا كىتاپحانا قوناقتارى مەن وقىرماندارى «ابايدىڭ سوڭعى كۇندەرى» دەرەكتى ءفيلمىن تامشالادى.
اباي كۇنى اباي جۇمباعىن تانۋعا دەگەن ۇمتىلىستىڭ باستاۋى ما دەرسىڭ.
ايسۇلۋ سەزحان,
اباي اتىنداعى قازۇپۋ-دىڭ ستۋدەنتى
