فوتو: قر قورعانىس مينيسترلىگىنىڭ رەسمي سايتى
«اتامنىڭ اماناتى» قوعامدىق بىرلەستىگىنىڭ سپورتتىق شارا وتكىزۋ تۋرالى باستاماسىن قورعانىس مينيسترلىگى مەن ۇلتتىق ۇلان جانە استانا اكىمدىگى قولدادى.
«ەكى مارتە كەڭەس وداعىنىڭ باتىرى اتاعىنا يە بولعان جالعىز قازاق تالعات بيگەلدينوۆ كوزى تىرىسىندە-اق اڭىزعا اينالدى. ءبىز «101 جىل – 10,1 كم» جارىسى قازاقستاندىقتار ءۇشىن جاقسى مەسسەدج بولارىنا سەنەمىز جانە شاراعا بەلسەنە قاتىسادى دەپ ويلايمىز», دەپ ۇيىمداستىرۋشىلار تاراپى جارىسقا كاسىپقويلاردى عانا ەمەس, اۋەسقوي جۇگىرۋشىلەردى دە شاقىرعاندىقتارىن اڭداتپادا اتاپ ايتقان.
سالتاناتتى اشىلۋ ءراسىمى قارۋلى كۇشتەر اسكەري قىزمەتشىلەرىنىڭ, ۇقك شەكارا قىزمەتىنىڭ جانە ۇلتتىق ۇلاننىڭ سالتاناتتى ساپ تۇزەۋىمەن باستالادى.
قورعانىس مينيسترلىگىنىڭ اسكەري انسامبلدەرى, ۇلتتىق ۇلان, ەلوردانىڭ شىعارماشىلىق ۇجىمدارى جانە قۇرمەت قاراۋىل روتاسىنىڭ دەفيلەسى شارا اياسىندا ونەر كورسەتەدى. وعان قوسا جارمەڭكە ۇيىمداستىرۋ جوسپارلانىپ وتىر.
تالعات جاقىپبەك ۇلى بيگەلدينوۆ جاۋىنگەرلىك جولىن قاتارداعى ۇشقىش بولىپ باستاپ, سوعىستى گۆارديالىق اۆياپولك ەسكادريلياسىنىڭ كومانديرى رەتىندە اياقتاعانى ءمالىم. سوعىس جىلدارى شابۋىلداۋشى يل-2 ۇشاعىمەن اسا كۇردەلى ءھام جاۋاپتى تاپسىرمالاردى ورىنداعان شاقتاردا جاراقات العان ول بىرنەشە مارتە اجال اپانىنان امان شىققان.
جەڭىس جولىندا ءوز ءومىرىن تالاي مارتە قاتەرگە تىككەن تالعات بيگەلدينوۆتىڭ ەرلىكتەرى قازاقستان تاريحىندا ماڭگىلىك قالارى انىق. اتى اڭىزعا اينالعان ۇشقىشتىڭ قۇرمەتىنە ارناپ وسىنداي شارا وتكىزۋ ۇلى وتان سوعىسى باتىرلارىن جادىمىزدا جاڭعىرتىپ, ۇرپاققا ونەگە ەتۋدىڭ اجىراماس بايلانىسىن ايعاقتاسا كەرەك.
