ەسەپ 39 ەلدەگى 136 جاڭالىقتار باسىلىمىنىڭ جەتەكشىلەرىمەن جۇرگىزىلگەن ساۋالداما مەن تەرەڭدەتىلگەن سۇحبات ناتيجەلەرىنە نەگىزدەلگەن. زەرتتەۋ ناتيجەسى ۇيىمداردىڭ 61%-ى يكەمدى جۇمىس كەستەسىن ەنگىزگەنىن, ال 20%-ى پاندەمياعا دەيىنگى جۇمىس ۇلگىسىنە ورالۋعا نيەتتى ەكەنىن كورسەتتى. سونىمەن بىرگە قالىپتاسقان جاعدايعا بايلانىستى مەديا يندۋستريا سالاسىندا تۋىنداعان ماسەلەلەردى جۇيەلەۋگە مۇمكىندىك بەردى.
پاندەميا كەزىندەگى ءماجبۇرلى تۇردە قاشىقتان جۇمىس ىستەۋ قىزمەتكەرلەردىڭ يكەمدى دە وڭتايلى جانە دەربەس جۇمىس ىستەۋگە دەگەن ۇمتىلىسىن جەدەلدەتەتىن جول بارىن, قالىپتى جۇمىس تاسىلىمەن بىرگە جاڭا, وڭتايلى جۇمىس فورماتى بارلىعىن كورسەتكەن ەدى. 2021 جىلعى بولعان زەرتتەۋدە جاڭالىق يندۋسترياسىنىڭ جەتەكشىلەرى ءوز ۇيىمدارى گيبريدتى جانە يكەمدى جۇمىس فورماتىنا كوشۋدى قولدايتىنىن ءبىلدىردى.
بۇگىندە رەداكتسيالاردىڭ جۇمىس ءتارتىبى جاڭا, وڭتايلى جۇمىس فورماتىنا سايكەس وزگەرىپ قايتا قۇرىلىپ جاتىر. رەسپوندەنتتەردىڭ 61%-ى ءوز ۇيىمىندا گيبريدتى جانە يكەمدى جۇمىس ءتۇرى كوبىرەك ەنگىزىلگەنىن كورسەتتى. ساۋالداماعا قاتىسقان جەتەكشىلەردىڭ 57%-ى ءوز ۇيىمىندا بۇل ماسەلە بويىنشا جاقسى جۇمىس ءجۇرىپ جاتىر دەپ ەسەپتەيدى. سونىمەن بىرگە ساۋالداماعا قاتىسۋشىلاردىڭ 20%-ى ءوز ۇيىمى جۇمىس بارىسىنا كەيبىر وزگەرىستەر ەنگىزگەنىمەن, نەگىزىنەن پاندەمياعا دەيىنگى ۇيرەنشىكتى جۇمىس ۇلگىسىنە قايتا ورالعىسى كەلەتىنىن ايتتى.
كەيبىر جاعدايدا ۇيىمداردىڭ پاندەميادان كەيىن كەڭسەگە قايتا ورالۋ جوسپارى قىزمەتكەرلەر مەن جۇمىس بەرۋشى جەتەكشىلەر اراسىنداعى كەلىسپەۋشىلىكتەر مەن داۋعا اكەلىپ وتىر. مىسالى, 2022 جىلعى قىركۇيەكتە مىڭنان استام قىزمەتكەر ءۇشىن قارسىلىق ءبىلدىرۋ سەبەپتەرىنىڭ ءبىرى – The New York Times-تىڭ «كەڭسەگە ورالۋعا» قاتىستى جاڭا ساياساتى ەدى.
ساۋالداماعا قاتىسقان سالا جەتەكشىلەرىنىڭ 57%-ى گيبريدتى جانە يكەمدى فورماتقا كوشكەننەن كەيىنگى ءوز ۇيىمى جۇمىسىنىڭ ساپاسىنا وڭ باعا بەردى. رەداكتسيالاردا گيبريدتى جانە يكەمدى جۇمىس ءتۇرىن ەنگىزۋ ءتاسىلى بويىنشا رەسپوندەنتتەردىڭ جاۋابى تومەندەگىدەي بولدى: 49%-ى قىزمەتكەر اپتاسىنا نەمەسە ايىنا مىندەتتەلگەن كۇندەرى كەڭسەدە بولۋى كەرەگىن; 29%-ى قىزمەتكەر كەڭسەگە كەلۋى مىندەتتى كۇندەر سانىن وزدەرى بەلگىلەيتىنىن; 5%-ى ماماننان كوپ جاعدايدا ۇيدەن جۇمىس ىستەۋىن تالاپ ەتەتىنىن اتادى.
Microsoft ءوزىنىڭ جىل سايىنعى Work Trend Index ەسەبىندە گيبريد مودەلدە جۇمىس ىستەيتىن قىزمەتكەرلەردىڭ 38%-ى ءوزىنىڭ ەڭ ۇلكەن پروبلەماسى رەتىندە كەڭسەگە قاشان جانە نە ءۇشىن كەلۋ كەرەكتىگىن ءبىلۋ ەكەنىن ايتقان ەدى. بۇل ماسەلەنىڭ شەشىمى رەتىندە ەسەپتە جەتەكشىلەردىڭ كەڭسەگە كەلىپ جاساۋعا تۇراتىنداي دەڭگەيدە جۇمىس ۇيىمداستىرۋ قاجەتتىلىگى ۇسىنىلدى.
2021 جىلعى ەسەپتە ارالاس جانە قاشىقتان جۇمىس ىستەۋگە كوشۋدىڭ نەگىزگى ارتىقشىلىقتارىنىڭ ءبىرى – تيىمدىلىك پەن ونىمدىلىكتىڭ جوعارىلاۋى دەپ كورسەتىلگەن ەدى. 2022 جىلعى ساۋالداماعا قاتىسقانداردىڭ كوپشىلىگى بۇل فورماتتىڭ ونىمدىلىككە ايتارلىقتاي ايقىن اسەرىن, ىقپالىن بايقاماعان: ولاردىڭ 45%-ى گيبريدتى جانە يكەمدى جۇمىسقا كوشۋ ونىمدىلىككە وڭ نەمەسە تەرىس اسەرىن تيگىزدى دەپ سانامايدى, ال 38%-ى ونىڭ وڭ اسەر ەتكەنىن ايتادى.
پاندەميا كەزىندە كوپ ادام ۇيدەن جۇمىس ىستەۋگە ءماجبۇر بولدى جانە بۇل جاعداي ولاردىڭ جەكە ءومىرى مەن كاسىبي ءومىرى اراسىنداعى ادەتتەگى شەكاراسىنىڭ وزگەرۋىنە اكەلگەنى انىق. بۇل ولاردىڭ ءوز ءومىرىنىڭ كەيبىر اسپەكتىسىن, سونىڭ ىشىندە جۇمىستىڭ ءرولىن قايتا قاراۋىنا ىقپال ەتىپ وتىر. كەيبىر قىزمەتكەرلەر جۇمىستان جاپپاي كەتسە, كەيبىرەۋى ءۇشىن يكەمدى جانە قاشىقتان جۇمىس ءتارتىبى وسى پروبلەماعا جاۋاپ رەتىندە قاراستىرىلىپ وتىر.
ساۋالداماعا قاتىسقان جەتەكشىلەردىڭ ۇشتەن ءبىرى (33%) ءوز رەداكتسياسىن وزگەرتۋدە باستى باسىمدىقتى گەندەرلىك ارتۇرلىلىككە بەرەتىنىن اتاپ وتسە, ال 32%-ى
باسىمدىق رەتىندە ەتنوستىق ارتۇرلىلىكتى كورسەتتى. 2021-2022 جىلعى زەرتتەۋلەردە ءجيى كوتەرىلگەن ماسەلەلەردىڭ ءبىرى – جاڭالىق تاراتۋ بولىمىندە تۇراقتى قىزمەتكەرلەردىڭ بولماۋىنىڭ «وسموس وقىتۋ» (learnings by osmosis) ۇدەرىسىنە قاۋىپ ءتوندىرۋى. وسموس وقىتۋ – بۇل تاجىريبەسى بار ارىپتەستەردىڭ مىنەز-قۇلقىن باقىلاۋ جانە رەداكتسيادا بولعان كەزدەيسوق اڭگىمەلەرگە قاتىسۋ جانە تىڭداۋ مۇمكىندىگىنىڭ ارقاسىندا تاجىريبەسىز قىزمەتكەرلەردىڭ ۇيرەنۋى.
رەداكتسيا ۇجىمىندا ۇزدىكسىز ءبىلىم بەرۋ مادەنيەتىن ىلگەرىلەتۋ ءۇشىن رەسپوندەنتتەردىڭ 69%-ى ۇيىمدا قاجەت داعدىلاردى وقىتۋ, 47%-ى كوشباسشىلىق قاسيەتتەردى دامىتۋ, 46%-ى تالىمگەرلىك جانە 45%-ى باسقارۋ باعدارلامالارى جۇرگىزىلىپ جاتقانىن اتاپ ءوتتى. 2021 جىلى The New York Times رەداكتسيادا جۇمىس مادەنيەتىن دامىتۋعا جانە قىزمەتكەرلەرى ءۇشىن پايدالى ورتا قالىپتاستىرۋ ماقساتىندا مادەنيەت جانە مانساپ ءبولىمىن اشتى.
الەمدەگى ءىرى جاڭالىقتار ۇيىمدارىنىڭ بۇل باعىتتاعى ءىس-ارەكەتتەرى تالانتتى دامىتۋ ماڭىزىن مويىنداۋدىڭ, ارتۇرلىلىكتى ىلگەرلەتۋدىڭ جانە مەديا يندۋستريادا ينكليۋزيۆتى جۇمىس ورتاسىن قۇرۋدىڭ ماڭىزدى ەكەنىن كورسەتەدى. ەڭ الدىمەن, بۇل قازىرگى زاماناۋي تالاپتار مەن سۇرانىستارعا ساي بولۋ ءۇشىن جۇمىستىڭ جاڭا تاسىلدەرى مەن ادىستەرىن ۇنەمى جەتىلدىرىپ, دامىتىپ وتىرۋ قاجەتتىلىگىنەن تۋىنداپ وتىرعانىن اتاپ وتكەن ءجون.
دۋلات وتەعالي,
«قازاقستان قوعامدىق دامۋ ينستيتۋتى» ساراپشىسى
