قانداستارىمىز اتاقونىسىنان ىرگە كوتەرمەگەن اۋىلداردىڭ كەيبىرى كادىمگى سۋسىعان قۇمنان تونگەن قاۋىپتەن ارىلا الار ەمەس. ارينە, قۇم كوشكىنىن تابيعاتتىڭ تىلسىم ءارى توسىن قۇبىلىسىنا بالاعانمەن, ونى توقتاتۋ باعىتىنداعى جۇمىستىڭ ناتيجەسى ازىرگە كورىنبەي تۇر.
قۇمدى توقتاتۋدىڭ ءبىر جولى – سەكسەۋىل ەگۋ. بىراق سەكسەۋىل ەگۋمەن اينالىساتىن مەردىگەردىڭ نەمقۇرايلىعى انىقتالىپ وتىر. يساتاي اۋدانىنداعى زابۋرىن اۋىلىندا – 1 300, يساتاي ەلدى مەكەنىندە 300-گە جۋىق تۇرعىن بار. قاۋىپ توندىرگەن قۇم كوشكىنىن توقتاتۋ ءۇشىن 115 ملن تەڭگە ءبولىنىپ, اۋىل ماڭىنا 26 875 سەكسەۋىل ەگىلگەن. كەيبىر اۋىلدارعا قامىستان قورشاۋ تۇرعىزىلعان. الايدا سەكسەۋىل دە, قامىس تا اۋىلدارعا قالقان بولماي تۇر.
ء«بىز قۇمنىڭ ازابىن كورەمىز دەپ ويلاعان جوق ەدىك. اپتا سايىن تراكتورمەن قۇم كۇرەتەمىز. بىراق قۇم ءالسىن-ءالسىن بوراپ, قاۋىپ ءتوندىرىپ تۇر. كەيىنگى كەزدە ەسىك-تەرەزەنى اشۋ مۇڭعا اينالدى. ءبىر كۇنى قۇم ءۇيىمىزدى باسىپ قالۋى مۇمكىن. كوڭىلدە وسىنداي قاۋىپ بار», دەيدى اۋىل تۇرعىنى فارۋزا سۇلتاناليەۆا.
يساتاي اۋىلىنىڭ اكىمى اسلان عۇباشتىڭ ايتۋىنشا, قازىر تاعى دا جوبالاۋ-سمەتالىق قۇجات دايىندالىپ جاتىر. ازىرگە اۋىل ىشىندەگى قۇمدى كولىككە تيەپ شىعارۋدان باسقا امال جوق.
وبلىستىق تابيعي رەسۋرستار جانە تابيعاتتى پايدالانۋدى رەتتەۋ باسقارماسى باسشىسىنىڭ ورىنباسارى نۇرگۇل قاليەۆانىڭ مالىمەتىنشە, مەردىگەر مەكەمە كەمشىلىكتى تۇزەتۋگە ۋادە بەرگەن. سول ۋادە ورىندالماسا, جەرگىلىكتى بيلىك سوتقا جۇگىنبەك.
دەگەنمەن بىلتىردان بەرى قۇرمانعازى اۋدانىنداعى ۇشتاعان اۋىلىندا 10 گەكتارعا 9 370 دانا سەكسەۋىل كوشەتى ەگىلگەن. ەندى يساتاي اۋدانىنىڭ نارىن اۋىلىنىڭ ماڭىنداعى 8 گەكتارعا, قىزىلقوعا اۋدانىندا ورنالاسقان ساعىز, قاراباۋ, قاراكول, جاسقايرات, بۇيرەك اۋىلدارىندا 32,45 گەكتارعا سەكسەۋىل كوشەتىن ەگۋ ءۇشىن سمەتالىق جوباسى جاساقتالىپ جاتىر.
