«ارسەلورميتتال تەمىرتاۋ» اق 2-جەو-سىندا جىلۋ بەرۋ ماۋسىمىنا دايىندىق جانە جەتىنشى قازاندىقتىڭ قۇرىلىسى تۋرالى كاسىپورىننىڭ باس ديرەكتورى ۆلاديمير يابلونسكي باياندادى. ونىڭ ايتۋىنشا, ءۇش قازاندىق پەن ءۇش تۋربينالى گەنەراتوردى جوندەۋ جۇمىستارى اياقتالۋعا جاقىن. بۇعان قوسا جەتىنشى قازاندىقتى سالۋ بويىنشا ماڭىزدى جوبانى ىسكە اسىرۋ كەشىكتىرىلۋدە. سەبەپتى جاۋاپتى ورگان بىلاي تۇسىندىرەدى: نىساندا جۇمىسشىلار جەتپەي جاتىر, نەگىزگى جابدىقتار مەرزىمىنەن كەشىگىپ ورناتىلۋدا.
مەردىگەر كومپانيا باسشىلىعىنىڭ («AB Construction» جشس) ەسەبىن تىڭداعان ر.سكليار قۇرىلىس-مونتاجداۋ جۇمىستارىن ۋاقتىلى اياقتاۋ قاجەتتىگىن بەلگىلەپ, ەسكەرتۋ جاسادى.
ر.سكليارعا جىلۋ جەلىلەرىن جوندەۋ بويىنشا باعدارلاما تانىستىرىلدى. قالاداعى جىلۋ جەلىلەرىنىڭ بارلىق توزعان ۋچاسكەسى بويىنشا جاڭارتىلۋ جۇمىستارى ءجۇرىپ جاتىر. ر.سكليار جاۋاپتىلارعا جۇمىستى جەدەلدەتۋ كەرەكتىگىن, جىلۋ بەرۋ ماۋسىمىنا دەيىن تولىق اياقتاۋدى قاتتى تاپسىردى.
سونىمەن قاتار پرەمەر-ءمينيستردىڭ ءبىرىنشى ورىنباسارى قاراعاندى, شاحتينسك قالاسىنىڭ جانە توپار كەنتىنىڭ جىلىتۋ قازاندىقتارىن ارالادى.
«توپار» ماەس باسشىلىعى نەگىزگى جانە قوسالقى جابدىقتاردى كۇردەلى جانە قالىپتى جوندەۋ جۇمىستارى كەستە بويىنشا ءجۇرىپ جاتقانىن حابارلادى. «بۇگىنگى تاڭدا جوندەۋ جۇمىستارى 60 پايىزعا ورىندالدى. جوسپاردان كەشىكپەي كەلە جاتىرمىز. بارلىق مىندەتتەمەنى تولىق ورىندايمىز», دەدى «توپار»ماەس وپەراتسيالىق ديرەكتورى الەكساندر بۋزو.
شاحتينسك قالاسىنىڭ جىلۋ جەلىلەرى تەمىرتاۋ سەكىلدى 75 پايىزعا توزىپ تۇر. 10 جىل بويى ەش ەنەرگيا كوزى كۇردەلى جوندەۋ كورمەگەن. بيىل ءۇش قازاندىق پەن ەكى تۋربينا جوندەلىپ جاتىر. ر.سكليار جاۋاپتىلارعا بارلىق جۇمىس ۋاقىتىندا اياقتالۋى كەرەكتىگىن, جەدەلدەتۋ قاجەتتىگىن قاتاڭ ەسكەرتتى.
وبلىس ورتالىعىندا دا وسى باعىتتاعى جۇمىستار قىزۋ ءجۇرىپ جاتىر. الداعى جىلۋ بەرۋ ماۋسىمىنا دەيىن 16 قازاندىق پەن 10 تۋربينا جوندەلىپ جاتىر. مۇنداعى جۇمىستار كەستە بويىنشا ءجۇرىپ جاتىر. بيىلعى جوندەۋ جۇمىستارىنا باعىتتالعان قارجى كولەمى 13 ملرد تەڭگەنى قۇرايدى. بۇل تۋرالى ءبىرىنشى ۆيتسە-پرەمەرگە «قاراعاندى ەنەرگوورتالىق» كومپانياسىنىڭ باسشىلىعى دا باياندادى. ول وبلىس ورتالىعىنىڭ تۇتىنۋشىلارىن جىلۋمەن جانە ەلەكتر ەنەرگياسىمەن قامتاماسىز ەتەدى. قۇرامىنا ەكى ەنەرگيا كوزى كىرەدى: 3-جەو جانە 1-جەو.
سونداي-اق ر.سكليارعا 3-جىلىتۋ قازاندىعىنىڭ قۇرىلىس بارىسى تۋرالى ايتىلدى. جوبا كەزەڭ-كەزەڭمەن جۇزەگە اسىرىلىپ جاتىر. مۇنداعى اتالعان جۇمىس جۇيەلى اتقارىلسا, جىلۋمەن جابدىقتاۋ جۇيەسىن جاقسارتۋعا جانە قالانىڭ جاڭا نىساندارىن جىلۋمەن قامتاماسىز ەتۋگە مۇمكىندىك مول بولماق.
قاسىمحان عالىم,
«Egemen Qazaqstan»
