بۇگىن تاڭەرتەڭ بۇرعىلاۋ جۇمىستارىن جۇرگىزۋ كەزىندە 34 جاستاعى جۇمىسشى تاۋ-كەن ءۇيىندىسىنىڭ استىندا قالىپ قويعان.
«6 تامىزدا «شاحتينسك» شاحتاسىندا زاكىردى بۇرعىلاۋ كەزىندە كەنجاردىڭ جوعارعى بولىگىنەن تاۋ-كەن ماسساسىنىڭ شوعىرى وپىرىلىپ, قۇلاعان. سالدارىنان ۇڭگۋشى جاراقات الدى», دەپ حابارلادى «ارسەلورميتتال تەمىرتاۋ» اق ءباسپاسوز قىزمەتى.
ۋپر-1 ۋچاسكەسىنىڭ قىزمەتكەرلەرى ۇڭگۋشىگە العاشقى مەديتسينالىق كومەك كورسەتىپ, بىردەن ونى شاحتانىڭ بەتىنە شىعارعان. سودان كەيىن رەانيماتسيالىق-شوكقا قارسى توپ بريگاداسى زارداپ شەككەن كەنشىنى قاراعاندى قالاسىنداعى ح. ماقاجانوۆ اتىنداعى اۋرۋحاناعا جەتكىزگەن.
