فوتو: قر قورعانىس مينيسترلىگىنىڭ رەسمي سايتى
باتىر اتىنداعى اۋە قورعانىسى كۇشتەرىنىڭ اسكەري ينستيتۋتىندا ەرەكشە كوزگە تۇسكەن اسكەري قىزمەتشىلەرگە العىس جاريالاندى.
اسكەري بولىمدەردە مەرزىمدى قىزمەتتەگى ساربازدار ءۇشىن «ازات ەتۋشىلەر» سەرياسىنداعى «شابۋىلداۋشىلار» دەرەكتى ءفيلمى كورسەتىلىپ, ەرلىك ساباقتارى وتكىزىلدى.
قارۋلى كۇشتەردىڭ مەملەكەتتىك اسكەري-تاريحي مۇراجايىندا اتى اڭىزعا اينالعان شابۋىلداۋشى ۇشقىش تالعات بيگەلدينوۆتىڭ ءومىرى مەن قىزمەتىنە ارنالعان فوتوسۋرەتتەر مەن قۇجاتتاردى قامتىعان تاقىرىپتىق ەكسپوزيتسيا ۇيىمداستىرىلدى.
تالعات جاقىپبەك ۇلى بيگەلدينوۆ 1922 جىلى اقمولا وبلىسى مايبالىق اۋىلىندا دۇنيەگە كەلگەن. بالالىق, جاستىق شاعى بىشكەكتە وتكەن بولاشاق ۇشقىشتىڭ كوككە دەگەن قۇشتارلىعى فرۋنزەدەگى اەروكلۋبقا ەرىكسىز الىپ كەلدى. ءبىر جىلدان سوڭ ول وسى كلۋبتىڭ نۇسقاۋشى-ۇشقىشى بولىپ شىعادى. ساراتوۆ وبلىسىنداعى ۇشقىشتار دايارلايتىن بالاشوۆ اسكەري اۆياتسيالىق مەكتەبىن, كەيىننەن ورىنبور اۆياتسيالىق ۋچيليششەسىن ءتامامدادى.
جاۋىنگەرلىك جولىن قاتارداعى ۇشقىش بولىپ باستاعان ول سوعىستى گۆارديالىق اۋە پولكىنىڭ ەسكادريليا كومانديرى رەتىندە اياقتادى. كالينين, ۆورونەج, ستەپنوي, ءبىرىنشى جانە ەكىنشى ۋكراين مايداندارىندا سوعىستى. 305 رەت اۋەگە كوتەرىلىپ, جاۋىنگەرلىك تاپسىرمالاردى ورىندادى.
سوعىستان كەيىن تالعات جاقىپبەك ۇلى اسكەري-اۋە اكادەمياسىن ءبىتىرىپ, ۋكرايناداعى شابۋىلداۋشى اۋە پولكىندە قىزمەت ەتتى. اسكەري-اۋە كۇشتەرىنىڭ شابۋىلداۋشىلارىن دايارلايتىن كراسنودار جوعارى مەكتەبىندە شتاب باسقاردى. قازاقستانداعى ازاماتتىق اۆياتسيا باسقارماسى باسشىسىنىڭ ورىنباسارى بولىپ قىزمەت ەتتى. ءومىرىنىڭ سوڭىنا دەيىن مەملەكەت پەن قوعام ومىرىنە بەلسەندى تۇردە قاتىسىپ, سوعىس مۇگەدەكتەرىنە قولداۋ كورسەتەتىن حالىقارالىق قورعا باسشىلىق جاسادى.
