الدا نە كۇتىپ تۇر؟ پاريجگە دەيىن نەبارى ءبىر جىل قالدى. وسىعان وراي شىعىس قازاقستان وبلىستىق دەنە شىنىقتىرۋ جانە سپورت باسقارماسى باسشىسىنىڭ ورىنباسارى سەرىك قۇسىمباەۆ اقپارات قۇرالدارى وكىلدەرىمەن كەزدەسىپ, اتقارىلىپ جاتقان جۇمىستارمەن پاريجدەگى وليمپياداعا كىمدەردىڭ بارۋى مۇمكىن ەكەنى جايىندا ايتىپ بەردى. «ازىرشە ليتسەنزيا جوق, بىراق ءۇمىت كۇتتىرەتىن سپورتشىلارىمىز جەتكىلىكتى», دەيدى ول.
ونىڭ سوزىنە قاراعاندا, وسى جىلدىڭ العاشقى جارتىسىندا ءوڭىر سپورتشىلارى سپورتتىڭ ءار تۇرىنەن 3 303 مەدال يەلەنسە, ونىڭ ىشىندە 1 208-ءى التىن, 1 031-ءى كۇمىس, قالعانى قولا مەدال ەكەن. جىل سوڭىنا دەيىن 300 سپورتشى حالىقارالىق تۋرنيرلەردە باقتارىن سىنايدى. ال 170 سپورتشىنىڭ الەم جانە ازيا چەمپيوناتتارىنا قاتىساتىنى دا وسى جەردە بەلگىلى بولدى.
س.قۇسىمباەۆتىڭ ايتۋىنشا, فرانتسياداعى جاھاندىق دوداعا قاتىسۋعا شىعىس وڭىرىنەن 18 ۇمىتكەر ليتسەنزياعا تالاسادى. قايتالاپ ايتامىز, بۇل سان ناقتى ەمەس. الايدا جەرلەستەرىمىزدىڭ قازىرگى ناتيجەلەرى وسىلاي دەۋگە نەگىز بەرەدى. جەڭىل اتلەتيكادان نادەجدا دۋبوۆيتسكايا مەن ەلينا ميحيناعا, جاننا ماماجانوۆا مەن گالينا ياكۋشەۆاعا, دەيزي دجەپكەمەي, كارولينا كيپكيرۋيگە, شادەراك كوەچ پەن نورا تانۋيگە ۇلكەن ءۇمىت ارتامىز. اتاقتى ولگا رىپاكوۆانىڭ ءۇش بىردەي وليمپياداعا قاتىسىپ, مەدالدەردىڭ ءۇش ءتۇرىن يەلەنۋى شىعىس سپورتىنىڭ الەۋەتىن كورسەتسە كەرەك. ەركىن كۇرەس بويىنشا ازامات داۋلەتبەكوۆ پەن دانيار قايسانوۆ ءدۇبىرلى دودالاردان ولجالى ورالىپ ءجۇر. اعايىندى ەرنار, ەرنۇر فيداحمەتوۆتەردەن دە ءۇمىت كۇتەمىز. ەسكەك ەسۋ سپورتى تۇرلەرىنەن الەكساندر كۋليكوۆ, قۋانىش ەرعايىپوۆ, مارگاريتا تورلوپوۆا, اۋىر اتلەتيكادان دەنيس ۋلانوۆ جولداما بيىگىنەن كورىنەدى دەپ سەنەمىز. سەمسەرلەسۋدەن ەل تاريحىندا تۇڭعىش رەت قورجىنىمىزعا قولا مەدال سالعان رۋسلان قۇربانوۆ پەن ۆاديم شارلايموۆتىڭ دا نامىستى قولدان بەرە قويمايتىندارى انىق.
توكيوداعى وليمپياداعا كەندى التايدان 10 سپورتشى قاتىسقان ەدى. وكىنىشكە قاراي, مەدال بۇيىرمادى. دانيار قايسانوۆتان ءۇمىت كۇتكەن ەدىك. الايدا ول بەسىنشى ورىندى قاناعات تۇتتى. ولگا رىپاكوۆا شاۋ تارتىپ قالعانىن كورسەتتى. سەمسەرلەۋشى رۋسلان قۇربانوۆ بابىنا ەندى كەلگەن سەكىلدى. سونداي-اق لەگيونەر افريكانىڭ جەلاياق قىزدارىنىڭ ءۇمىتتى اقتايتىن كەزى جەتكەن سىڭايلى. بۇدان كەيىن جۋرناليستەر قويعان ساۋالدارىنا تۇشىمدى جاۋاپ الدى.
وڭداسىن ەلۋباي,
«قازاقستاننىڭ قۇرمەتتى
سپورت قايراتكەرى»
