توتەننەن تونگەن ءتىلسىز جاۋ تالاي جايدىڭ بەتىن اشىپ بەرگەندەي. وقيعا ورنىنا ون مينۋت بولماي-اق جەتتىك دەگەن تج قىزمەتكەرلەرى ءورتتى ءبىر جارىم ساعاتتا اۋىزدىقتادى. ءورت ءسوندىرۋ كولىكتەرىنىڭ اپات ورنىنا بىردەن ەنە الماۋىنا تۇرعىن ءۇي اۋلاسىنداعى جول جيەگىنە جاعالاي قويىلعان جەكە كولىكتەر كەدەرگى بولعان. كەيبىر تۇرعىندار جول جوسپارىنىڭ قولايسىزدىعىن سىنعا الدى. ماماندار ازىرگە توسىن وقيعا ەڭسەلى عيماراتتىڭ 5 جانە 6-قاباتتارىنداعى جەدەلساتىنىڭ توق كابەلدەرىنەن شىققان بولۋى مۇمكىن دەگەن بولجامعا كەلىپ وتىر. الاتاۋ اۋدانىنىڭ اكىمى ازامات قالدىبەكوۆتىڭ توراعالىعىمەن قۇرىلعان جەدەل شتاب قۇرامىنا پروكۋراتۋرا, ۇلتتىق قاۋىپسىزدىك كوميتەتى, پوليتسيا باسقارماسى, توتەنشە جاعدايلار دەپارتامەنتى وكىلدەرى ەنگەن. قۇزىرلى ورىندار وسى وقيعاعا قاتىستى ەكى بىردەي قىلمىستىق ءىس قوزعالعانىن مالىمدەدى.
ءورت پايدا بولعان العاشقى مينۋتتاردا تۇسىرىلگەن بەينەجازبالاردان دەنەڭ تۇرشىگەدى. تەرەزەدەن جان ۇشىرا كومەك سۇراعاندارعا, ەڭ الدىمەن, سول ماڭنان ءوتىپ بارا جاتقان قاراپايىم تۇرعىندار قولۇشىن سوزعان.
قويۋ ءتۇتىن تۇرعىن ءۇيدىڭ ىشكى بولىگىن تۇتاس تۇمشالاعاندىقتان, تەكپىشەكپەن دالاعا شىعۋ مۇمكىن بولماعان. بەينەكادردان بىرنەشە جىگىتتىڭ جەردە تۇرىپ تەرەزەدەن سەكىرگەن تۇرعىنداردى كىلەممەن قاعىپ الىپ جاتقانىن كورۋگە بولادى. مۇنىڭ ءبارى ارناۋلى قىزمەت ماماندارى كەلگەنگە دەيىن وربىگەن جاعداي. وقيعانىڭ كارتيناسىن ءوز كوزىمەن كورىپ, قۇتقارۋ جۇمىستارىنا بەلسەنە قاتىسقان داۋلەتقالي نۇرلان دوستارىمەن بىرگە بىرنەشە ازاماتقا كومەك كورسەتكەن.
ء«تورت جىگىت اۋلادا اڭگىمەلەسىپ تۇرعانبىز. كەنەت ءتۇتىن شىعا باستادى. اينالادا ەشكىم جوق. الدىمەن بىرنەشە بالانى, كىشكەنتاي قىزدى دالاعا الىپ شىقتىق. ودان كەيىن ءتۇتىن قويۋلانىپ كەتتى. جوعارى قاباتتان جايمالاردى ءبىر-بىرىنە بايلاپ, تاعى ءبىر بالانى ءتۇسىردىم. تومەندەگى جىگىتتەر ونى قاعىپ الدى. 15-20 مينۋتتا 4 رەت وسىلاي كوتەرىلىپ شىقتىم. ءبىرىنشى قاباتتاعى پاتەردىڭ تەرەزەسىنەن كىلەم مەن ماتراستى كوردىك. تەرەزەنى سىندىردىق تا ولاردى الىپ شىقتىق. سونىڭ كومەگىمەن شامامەن 7-8 ادامدى جەردەن قاعىپ الدىق. ەرىك دەگەن جىگىت ەسىنەن تانىپ قالعان ۇلكەن كىسىگە جاساندى جولمەن دەم بەرىپ, العاشقى مەديتسينالىق كومەك كورسەتتى. تاعى دا ءبىراز جىگىت ايانىپ قالعان جوق, جۇگىرىپ ءجۇرىپ زارداپ شەككەندەرگە كومەكتەستى. كەيىننەن قۇتقارۋشىلار كەلىپ, ءبىزدى وقيعا ورنىنا جولاتپادى», دەيدى ول.
قۇتقارۋ ءىسىنىڭ بەل ورتاسىندا بولعان ەرىك توكەن ۇلى لاجى قالماعان ايەل ادام التىنشى قاباتتان ەكى بالاسىن لاقتىرعانىن, ونى تومەننەن ماتراسپەن قاعىپ العاندارىن, ارتىنشا الگى تۇرعىننىڭ ءوزى دە تومەنگە سەكىرگەنىن ايتادى. العاشقى كومەككە تۇرعىن ۇيگە جاقىن اۋماقتا جۇمىس ىستەپ جاتقان قۇرىلىسشىلار دا ارالاسقان.
كوز الدىندا وربىگەن جان اۋىرتار جايدى جەلىگە تۇسىرۋمەن شەكتەلىپ, ادام ءومىرى ارپالىسقا تۇسكەن سىن ساعاتتا قول قۋسىرىپ قالۋ – ادامگەرشىلىككە جات. مۇنداي ساتتە ءوز ءومىرىن قاتەرگە تىگىپ, كوزسىز ەرلىككە بارۋ كەز كەلگەننىڭ كوكەيىنە كەلە بەرمەسى انىق. كەلەڭسىز وقيعا ورىن العان جەرگە كەزدەيسوق كەلىپ, مۇلدە تانىمايتىن ادامداردى اپاتتان اراشالاۋعا اتسالىسقان داۋلەتقالي, ەرىك سىندى ازاماتتاردى بۇگىنگى قوعامنىڭ باتىرلارى دەسەك جاراسار. ازاماتتاردىڭ قاۋىپ-قاتەردە ءبىر-بىرىنە قورعان بولۋى, سىن ساعاتتا جۇدىرىقتاي جۇمىلۋى ىزگى قوعامنىڭ باستاۋى دەپ اتاعان دۇرىس شىعار.
اپاتتىڭ بەتىن قايتارۋعا الماتى قالاسى تجد-نىڭ 50 قىزمەتكەرى مەن 14 تەحنيكاسى, پوليتسيا دەپارتامەنتىنىڭ 40 قىزمەتكەرى مەن 11 تەحنيكاسى, 109 قۇتقارۋ قىزمەتىنىڭ 12 قىزمەتكەرى مەن 6 تەحنيكاسى, جەدەل جاردەم قىزمەتىنىڭ 69 وكىلى مەن 23 كولىگى جۇمىلدىرىلدى. ورتەنگەن تۇرعىن ۇيگە كىرۋگە ۋاقىتشا تىيىم سالىنىپ, زارداپ شەككەن تۇرعىندارعا ىستىق تاماق پەن جاتىن ورىن بەرىلدى. قالا اكىمى ەربولات دوساەۆ قازا بولعان ايەلدىڭ جاقىندارىنا كوڭىل ايتىپ, وقيعادان زارداپ شەككەن سول وتباسىنىڭ تاعى ءبىر وكىلىنىڭ ساۋىعۋى ءۇشىن بارلىق جاعداي جاسالاتىنىن جەتكىزدى. سونداي-اق اكىمدىك ورتەنگەن تۇرعىن ءۇي كەشەنىنە جاۋاپتى كومپانيامەن كەلىسسوز جۇرگىزىپ, ب ۇلىنگەن باسپانانى قالپىنا كەلتىرۋگە ۋاعدالاسقان.
ءوز كەزەگىندە «اقكەنت» تۇرعىن ءۇي كەشەنىن سالۋشى كومپانيا ءورت سالدارىنان قازا تاپقان اسەل بەكمۇحامبەتوۆانىڭ وتباسىنا وتەۋسىز نەگىزدە ەكى بولمەلى پاتەر بەرىلەتىنىن حابارلادى.
ميلليوندار توعىسقان مەگاپوليستە ەكى كۇننىڭ بىرىندە ءورت جاعدايى ورىن الىپ جاتادى. اقكەنتتەگى جاعدايعا قاتىستى پىكىر بىلدىرگەن ساراپشىلار قۇرىلىس ساپاسىن تەكسەرۋ جۇمىستارى جولعا قويىلماعانىن سىنعا الدى.
«ەگەر ءورت تۇيىقتالعان توقتان بولسا, دەمەك ونى بىلىگى تومەن بىرەۋ ىستەگەن. قۇرىلىس كومپانيالارىندا ءاربىر جۇمىستى قايتا تەكسەرىپ وتىراتىن ساپا مەنەدجمەنتى جوق. قۇرىلىستى قابىلدايتىن اۆتورلىق باقىلاۋ مەن تەحباقىلاۋ كوزدى جۇمىپ قول قويادى. ونى مەملەكەتتىك ورگانداردىڭ قالاي قابىلداپ الاتىنىن بىلەمىز. ورتتەن قورعاۋشىلار دا جىلدام كەلمەگەن سەكىلدى. كەلگەن بولسا, تۇرعىندار كىلەم كەرىپ, بالكوننان ادامداردى قاعىپ الۋعا ۇيىمداسپاس ەدى. كەلگەن كۇننىڭ وزىندە جوعارىداعىلاردى ءتۇسىرىپ الاتىن ءيا ۇزىن ساتى جوق, ءيا ارنايى تەحنيكا جوق. ەگەر ءبىر تۇرعىن ءۇيدىڭ بىرنەشە قاباتىنان شىققان ءتۇتىن وسىنداي تراگەدياعا الىپ كەلگەن بولسا, جەر سىلكىنسە جاعداي قيىن ەكەن», دەپ پىكىر ءبىلدىردى شىڭعىس مۇقان.
ساراپشى ەلنازار احمەتبەك الماتىنىڭ ءورت قاۋىپسىزدىگىن قاداعالاۋ ىسىنە كەشەندى كوزقاراس قاجەت ەكەنىن ايتادى. ونىڭ پىكىرىنشە, قۇرىلىس نىساندارىن جوسپارلاۋداعى ولقىلىقتار قاتەلىكتى كەشىرمەيدى. «اسىرەسە قالاداعى كوپتەگەن جەكە تۇرعىن ۇيلەر تىم تىعىز ورنالاسقان. بىرىنەن شىققان ءورت ەكىنشىسىنە اسەر ەتەدى. كەيبىر كوشەلەردىڭ تارىلىپ كەتكەنى سونشالىق, ءورت ءسوندىرۋ كولىكتەرىنىڭ ەمىن-ەركىن قوزعالۋىنا ەشقانداي مۇمكىندىك جوق. قۇرىلىس نىساندارىنىڭ تىعىزدىعىنان اۋلادا كولىك قوياتىن ورىن تاپشى. جەكە كولىكتەرىن تۇرعىندار جول جيەگىنە قويۋىنا تۋرا كەلەدى. بۇرىنعى 3-4 قاباتتى ۇيلەردىڭ ورنىنا 10-12 قاباتتى ءزاۋلىم عيماراتتار سالىناتىن بولعان. اياداي جەردە مىڭداعان ادام تۇرادى. بۇل كەز كەلگەن توتەنشە جاعدايعا توسقاۋىل قويۋعا كەدەرگىسىن تيگىزەتىنى انىق», دەيدى ساراپشى.
