ءار اپتانىڭ سەيسەنبى كۇندەرى «شالقار» راديوسىنان تالانتتى جۋرناليست جانار ورازىمبەتوۆانىڭ «دارابوز» حابارى ەفيردەن تۇراقتى بەرىلىپ تۇرادى. سونداي ءبىز تىڭداعان حاباردىڭ ءبىرى جوعارىدا تىلىمىزگە تيەك ەتكەن نۇرعيسا اتاباي ۇلىنا ارنالعان ەكەن.
نۇراعاڭدى ەسكە العاندا مىنا ءبىر جايدىڭ ويعا ورالىپ وتىرعانى. وتكەن عاسىردىڭ 70-جىلدارىنىڭ اياق كەزىندە, قوڭىر كۇزدىڭ جايماشۋاق كۇندەرىنىڭ بىرىندە وڭتۇستىكتىڭ شالعايدا جاتقان سوزاق اۋدانىنا نۇراعاڭنىڭ باسقارۋىنداعى اتاقتى «وتىرار سازى» وركەسترى گاسترولدىك ساپارمەن كەلدى. سول كەزدەگى اۋدانعا قاراستى 10 كەڭشاردى تۇگەلدەي ارالاپ, كونتسەرت قويعان ونەر ۇجىمى ەڭ سوڭعى كۇنى اۋدان ورتالىعى – شولاققورعان اۋىلىنداعى «مىڭجىلقى» مادەنيەت سارايىندا تەرىسكەي ءوڭىرىنىڭ تۇرعىندارىمەن جۇزدەسىپ, ونەرلەرىن پاش ەتتى.
«ەل ءىشى – ونەر كەنىشى» دەگەن. كەزىندە «سوزاققا بارساڭ – كۇيشىمىن دەمە» دەگەن ءسوز مۇقاڭنان (م.اۋەزوۆتى ايتادى) قالعان. وسى ولكەدەن شەرتپە كۇيدىڭ شەبەرى سۇگىر ءالي ۇلى شىققان. بۇگىن, مىنە, سونداي ۇلى كۇيشى, جەرلەستەرىڭىز تولەگەن مومبەكوۆ اعامىز ورتالارىڭىزدا وتىر», دەگەن نۇراعاڭ ساحنادان ءتۇسىپ توكەڭنىڭ قولىن الىپ, قۇشاعىنا باستى.
« ۇلىق بولساڭ, كىشىك بول» دەگەن. مىنا كورىنىسكە تەبىرەنبەگەن ادام قالماي, 650 ورىندىق زالداعى جۇرتشىلىق دۇركىرەتە قول سوقتى. سول كۇنى نۇراعاڭنىڭ ديريجەرلىگىمەن ۇلتتىق وركەستردىڭ ورىنداۋىنداعى «اتا تولعاۋى», «القيسسا», «اققۋ», ت.ب. كۇيلەرى تىڭداۋشىلاردىڭ قۇلاق قۇرىشىن قاندىرىپ, ەرەكشە اسەرگە بولەدى.
كارىباي امزە ۇلى,
ەڭبەك ارداگەرى
تۇركىستان وبلىسى
