استانا قالاسىنىڭ ادىلەت دەپارتامەنتى باسشىسىنىڭ ورىنباسارى ازامات اينابەكوۆ جسو-عا قاتىستى جۇرگىزىلگەن تەكسەرۋلەر تۋرالى استانانىڭ كوممۋنيكاتسيالار قىزمەتىندە وتكەن بريفينگتە ايتتى.
جىل باسىنان بەرى دەپارتامەنت جەكە سوت ورىنداۋشىلارىنىڭ قىزمەتىنە 149 جوسپاردان تىس جانە 75 جوسپارلى تەكسەرۋ جۇرگىزدى. ناتيجەسىندە 99 جسو تارتىپتىك جاۋاپكەرشىلىككە تارتىلدى, ۇشەۋى ليتسەنزياسىنان ايىرىلدى, تجك ليتسەنزيالارىنان ايىرۋ تۋرالى تاعى ەكى ۇسىنىس قر ادىلەت مينيسترلىگىنىڭ قاراۋىندا.
ايتا كەتۋ كەرەك, استاناداعى جەكە سوت ورىنداۋشىلارى ەكىنشى دەڭگەيلى بانكتەرمەن, ولاردىڭ كاسىپورىندارىمەن, قارجى جانە ساقتاندىرۋ ۇيىمدارىمەن, پاتەر يەلەرىنىڭ كووپەراتيۆتەرىمەن جاسالعان كەلىسىمدەر نەگىزىندە اتقارۋشىلىق ءىس جۇرگىزەدى.
«قازاقستان رەسپۋبليكاسىنىڭ «اتقارۋشىلىق ءىس جۇرگىزۋ جانە سوت ورىنداۋشىلارىنىڭ مارتەبەسى تۋرالى» زاڭىنا سايكەس اليمەنت ءوندىرىپ الۋ تۋرالى اتقارۋشىلىق قۇجاتتار الەۋمەتتىك ماڭىزى بار سانات بولىپ سانالادى.
قازىرگى ۋاقىتتا اليمەنت ءوندىرىپ الۋ قوعامداعى وزەكتى ماسەلە بولىپ سانالادى.
استانا قالاسىنىڭ جەكە سوت ورىنداۋشىلارى اليمەنت ءوندىرىپ الۋ تۋرالى 19 890 اتقارۋشىلىق ءىس قوزعادى, ونىڭ ىشىندە 9 915 اتقارۋشىلىق ءىس جۇرگىزۋ بويىنشا بورىشكەرلەردىڭ جالاقىسىنان اي سايىن ۇستاپ قالۋ جۇرگىزىلۋدە, 618 اتقارۋشىلىق ءىس جۇرگىزۋ بورىشكەرلەردى ىزدەستىرۋگە جاريالاۋعا بايلانىستى توقتاتىلدى», دەپ حابارلادى سپيكەر.
ادىلەت دەپارتامەنتى قالا پروكۋراتۋراسىمەن جانە جەكە سوت ورىنداۋشىلارىنىڭ وڭىرلىك پالاتاسىمەن بىرلەسىپ وسى باعىتتا ۇلكەن جۇمىس اتقاردى.
ماسەلەن, 6 بورىشكەر قىلمىستىق جاۋاپكەرشىلىككە تارتىلدى, 79 بورىشكەر اكىمشىلىك جاۋاپكەرشىلىككە تارتىلدى, سونداي-اق جىل باسىنان بەرى 600-گە جۋىق بورىشكەردەن 358 ملن تەڭگە مولشەرىندە بەرەشەك ءوندىرىلدى. جىل باسىنان بەرى جۇمىسسىز بورىشكەرلەردى جۇمىسقا ورنالاستىرۋ ماقساتىندا 10 جارمەڭكە وتكىزىلىپ, ناتيجەسىندە 21 ادام جۇمىس تاپتى. مۇنداي جۇمىس جارمەڭكەلەرى اي سايىن ۇيىمداستىرىلادى.
