اقىننىڭ جازۋ ىسىمەن بەل شەشىپ اينالىسقان كەزدەرى قازاق حالقىنىڭ تاريحىندا وتە ءبىر اۋىر جىلدار ەدى. ول مادەنيەتى وزىق, ەكونوميكاسى دامىعان ەلدەردىڭ جوعارى جەتىستىكتەرىن ۋاعىزداپ, جاڭالىقتىڭ جارشىسى بولا ءبىلدى. سول سەبەپتى اقىننىڭ «بۇگىنگى جاستارعا وقۋ مىندەت, بار قيىندىقتى تەك قانا عىلىم جەڭبەك» دەپ وي تاستاعانى. قامشىنىڭ سابىنداي قىسقا عانا عۇمىرىندا ۇلت بولاشاعى ءۇشىن كۇرەسكەن ول جالىندى جىرلارىمەن قازاق حالقىنىڭ ءۇمىت وتىن جاقتى.
«قاراڭعى قازاق كوگىنە,
ورمەلەپ شىعىپ كۇن بولام!
قاراڭعىلىقتىڭ كوگىنە,
كۇن بولماعاندا, كىم بولام؟». اقىننىڭ ۇلى ارمانى وسىلايشا ۇلتىنا قىزمەت ەتۋ ەدى.
تورايعىر كولىنىڭ جاعاسىندا وتكەن ءدۇبىرلى تويعا جينالعان حالىقتىڭ قاراسى قالىڭ كورىندى. ارعىماقتار الامانعا ءتۇسىپ, بىلەكتى جىگىتتەر بوزكىلەمدە بەلدەسسە, كۇمىس كومەي انشىلەر ساحنا تورىندە تىڭدارماننىڭ قۇلاق قۇرىشىن قاندىردى. جينالعان قاۋىمعا پاۆلودارلىق سۋرەتشىلەردىڭ كارتينالارى, قولدانبالى ونەر بۇيىمدارىنىڭ كورمەسى, ۇلتتىق تاعامدار بايقاۋى, وبلىستىڭ قالالارى مەن اۋداندارىنىڭ شىعارماشىلىق ۇجىمدارىنىڭ مەرەكەلىك كونتسەرتى دە ۇسىنىلدى. وڭىرلىك مادەنيەت باسقارماسىنىڭ ۇيىمداستىرۋىمەن وتكەن كونتسەرتتىك باعدارلاما اياسىندا ەسترادا جۇلدىزدارى سايات مەدەۋوۆ, اللاجار قايبار, اسەل مادەكەشوۆا سىندى ساحنا ساڭلاقتارى ونەر كورسەتتى.
مەرەكەلىك ءىس-شاراعا پاۆلودار وبلىسىنىڭ اكىمى اسايىن بايحانوۆ, پارلامەنت سەناتىنىڭ دەپۋتاتى التىنبەك نۇح ۇلى, ءماجىلىس دەپۋتاتتارى نۇرجان اشىمبەتوۆ پەن جارقىنبەك امانتاي ۇلى, سونداي-اق اقىننىڭ ونەگەلى ءومىرىن زەرتتەپ جۇرگەن بەلگىلى تاريحشىلار مەن زيالى قاۋىم وكىلدەرى قاتىستى. ءبىر توپ شىعارماشىلىق قاۋىم اۋەلى اقىننىڭ كەسەنەسىنە بارىپ, دۇعا باعىشتادى.
– كيەلى ەرتىس-بايان ءوڭىرى – ۇلى تۇلعالاردىڭ قاسيەتتى مەكەنى. رۋحاني الىپتاردىڭ قاتارىندا سۇلتانماحمۇت تورايعىروۆتىڭ ورنى ەرەكشە. جەرلەسىمىزدىڭ وراسان زور ەڭبەگىن ۇلىقتاۋ ماقساتىندا ءوڭىرىمىزدىڭ الدىڭعى قاتارلى جوعارى وقۋ ورنى, وڭىرلىك كىتاپحانا, كوشە مەن ەلدى مەكەن اقىننىڭ ەسىمىن يەلەنىپ وتىر. ال جىل سايىن وتكىزىلەتىن تورايعىروۆ وقۋلارى الاش ارداقتىسىنىڭ قالدىرعان اماناتىن وسكەلەڭ ۇرپاققا جەتكىزۋدىڭ ءبىر كورىنىسى, – دەپ اتاپ ءوتتى ا.بايحانوۆ.
مەرەكەلىك جيىندا رەستاۆراتسيادان ءوتىپ, جارىق كورگەن س.تورايعىروۆتىڭ 1933 جىلعى «تولىق شىعارمالار جيناعىنىڭ» جانە 1971 جىلى الماتى قالاسىندا باسىلعان «يزبراننىە» كىتابىنىڭ تۇساۋى كەسىلدى. العاشقى اتالعان لاتىن قارپىندەگى كىتاپ بۇقار جىراۋ اتىنداعى ادەبيەت جانە ونەر مۋزەيىنىڭ باستاماسىمەن, تورايعىروۆ ۋنيۆەرسيتەتىنىڭ قولداۋىمەن جونگە كەلتىرىلگەن. ال سوڭعىسى پاۆلودار قالالىق اكىمدىگىنىڭ قولداۋىمەن 600 دانا بولىپ قايتا باسىلىپ شىقتى.
