سانجار اۋەلدە بيولوگياعا قىزىققان ەكەن. كەيىن حيمياعا اڭسارى اۋىپتى. ول حالىقارالىق وليمپياداعا وسىمەن ءۇشىنشى رەت قاتىسىپ وتىر. ونىڭ باستاپقى ەكەۋىندە ونلاين فورماتتا باق سىناسا, سوڭعىسىنا ارنايى بارعان. 10 كۇنگە سوزىلعان زەردەلىلەر دوداسىنا الەمنىڭ 90-عا جۋىق مەملەكەتىنەن وقۋشىلار قاتىستى. بارلىعى شامامەن 360-تان استام وقۋشى باق سىنادى.
– سايىس ەكى بولىمنەن تۇردى. ءبىرىنشىسى – پراكتيكالىق, ەكىنشىسى – تەوريالىق جۇمىس. پراكتيكالىق جۇمىستا ءۇش تاپسىرما بەرىلدى. وندا ءارتۇرلى ساپالىق, ساندىق تالداۋ جاساۋ كەرەك بولدى. تەوريالىق تاپسىرما عىلىمي تاقىرىپتارعا بايلانىستى بەرىلدى. ماعان پراكتيكالىق ءبولىم كۇردەلى بولدى. سەبەبى كەيىنگى جىلدارى وليمپيادا ونلاين فورماتتا وتكەندىكتەن, تەك تەوريالىق ءبولىمنىڭ تاپسىرمالارىن عانا ورىنداعان ەدىم. بۇل جولعى دودا وسى تۇرعىدان العاندا ۇلكەن تاجىريبە بولدى دەپ سانايمىن. وليمپيادادا قىتاي, اقش, جاپونيادان كەلگەن وقۋشىلار ۇنەمى توپ جاراتىن. ءوز باسىم قىتايلىقتاردى نەگىزگى قارسىلاس سانادىم. ويتكەنى قىتاي مەملەكەتى وقۋشىلار اراسىندا قاتاڭ ىرىكتەۋ وتكىزەدى ءارى تەك ۇزدىكتەردىڭ ۇزدىگىنە عانا سەنىم ارتادى. نازارباەۆ زياتكەرلىك مەكتەپتەرى اراسىندا دا جان-جاقتى ىرىكتەۋ جۇرگىزىلدى. وبلىستى باعىندىرعان وقۋشى رەسپۋبليكالىق دودادا باق سىنايدى. رەسپۋبليكا دەڭگەيىندە كوزگە تۇسكەن ءتورت وقۋشى عانا حالىقارالىق وليمپياداعا جولداما الدى, – دەدى سانجار. زياتكەردىڭ اناسى لاۋرا ءماجيتوۆا بالاسىنىڭ ءبىلىم باسەكەلەرىنە كىشكەنتاي كۇنىنەن دايىندالعانىن ايتتى.
– بۇعان دەيىن وتباسىمىزدا حيميكتەر بولماعان. فيزيكا, ماتەماتيكا, فيلولوگيا سالالارىن تاڭداعاندار بولدى. سانجار حيميانى تاڭداعاندا تاڭ قالدىق. ءبىرىنشى سىنىپتان باستاپ ونى وليمپياداعا باۋلي باستادىق. ەڭ العاشقى وليمپياداسىنا ەكىنشى سىنىپتا قاتىستى. سىنىپ جەتەكشىسىمەن بىرگە تۇركياعا باردى. ءۇشىنشى سىنىپتا ماتەماتيكا ءپانى بويىنشا بولگارياداعى باسەكەدە باق سىنادى. ودان دا مەدالمەن ورالدى. سودان بەرى ۇلىمنىڭ حالىقارالىق وليمپيادالاردا توپ جارۋىن تىلەدىم. شۇكىر, ەكى رەت كۇمىس جۇلدەگەر اتاندى, بۇل جولى التىن مەدالدى ەنشىلەدى. سونداي-اق سانجار بىرنەشە ءتىلدى ەركىن مەڭگەرگەن. مەكتەبى ۇلكەن مۇمكىندىكتەرگە جول اشتى. ول – وتە ەڭبەكقور بالا. جەتىستىگىنىڭ باستى سىرى دا وسىندا. حيميا پانىنەن العاشقى وليمپياداسىنا 9-سىنىپتا الماتى قالاسىندا قاتىسىپ, 17-ورىندى يەلەندى. سول كەزدە سانجار «ماما, كەلەسى جىلى ءبىرىنشى ورىن الامىن» دەپ ۋادە بەردى. سول ۋادەسىندە تۇردى, – دەيدى لاۋرا ءماجيتوۆا.
سانجار بۇل وليمپياداعا قازاقستان قۇراماسىنىڭ جەتەكشىسى ازيم امانجولوۆپەن ءبىر جارىم جىل دايىندالعان ەكەن.
– ءداستۇرلى وليمپياداعا تىڭعىلىقتى دايىندىق كەرەك. ماسەلەن, ءبىز قاتىسقان ءبىلىم باسەكەسىنە وقۋشىلاردى 8-سىنىپتان باستاپ دايارلايمىز. باسىندا قيىندىق بولادى, البەتتە. بىراق كەيىن ءبارى دە قالىپقا تۇسەدى. ايتالىق, سانجار شاكىرتىم ابىلمانسۇرمەن بىرگە دايىندالدى. ءابىلمانسۇر بارىنشا قولداۋ كورسەتتى. بۇل جولعى جەتىستىكتى بەس جىلدىق دايىندىقتىڭ وتەۋى دەپ ايتا الامىن. سانجاردىڭ التىن الاتىنىنا سەنىمدى بولدىم. ويتكەنى بىلتىر كۇمىستى يەلەندى. ونىڭ ۇستىنە تاجىريبەسى دە تولىستى ءارى دايىندىق جۇمىستارى دا جان-جاقتى جۇرگىزىلدى, – دەيدى ازيم امانجولوۆ.
سانجاردىڭ كۋراتورى ورال بەكبولاتقىزىنىڭ ايتۋىنشا, ول – مەكتەپتەگى ۇلگىلى وقۋشىلاردىڭ ءبىرى. «سانجار مەكتەپتە ءوزىن جاقسى جاعىنان كورسەتتى. وليمپيادالارعا قاتىسۋعا ساباقتان بوساتساق تا, قالىپ قويعان تاراۋلاردى جىلدام يگەرىپ الادى. وزىنە تاپسىرىلعان ءىستى جوعارى جاۋاپكەرشىلىكپەن اتقارادى. مەكتەپتە وتكىزىلگەن مادەني جانە تاربيەلىك ءىس-شارالارعا بەلسەنە قاتىسادى. مىنەزى اشىق, ۇستامدى, سابىرلى, كىشىپەيىل. وزگەلەرمەن تەز ءتىل تابىسادى. قولۇشىن سوزۋعا دايار تۇرادى. جەكە تۇلعالىق كوزقاراسى قالىپتاسقان. ءوز ويىن, پىكىرىن اشىق, انىق جەتكىزەدى», دەيدى ورال بەكبولاتقىزى.
وقۋعا جۇيرىك وقۋشى دومبىرا مەن گيتارادا جاقسى وينايدى, شاحماتتى دا جەتىك مەڭگەرگەن. ءبىر سوزبەن ايتقاندا, سەگىز قىرلى, ءبىر سىرلى جان. «ماعان سەنىم ارتىپ, قولداۋ كورسەتكەن اتا-اناما, ۇستازدارىما, تالىمگەرلەرىمە, دوستارىما العىسىم شەكسىز», دەيدى سانجار.
سالتانات بايتەكەنوۆا,
ح.دوسمۇحامەدوۆ اتىنداعى اتىراۋ ۋنيۆەرسيتەتىنىڭ
4-كۋرس ستۋدەنتى
