مۇندا ەرەكشە بالالار اپتاسىنا 3 مارتە كەلىپ, يپپوتەراپيا ەمىن قابىلدايدى. كۋرس جارتى ساعاتقا سوزىلادى. بىلىكتى, سەرتيفيكاتى بار مامانداردىڭ نۇسقاۋىمەن بالالار ات ۇستىندە ءتۇرلى قيمىل-قوزعالىس جاسايدى.
«يپپوتەراپيا ەمى بالاعا پسيحوەموتسيونالدىق جانە بيومەحانيكالىق تۇرعىدان جاقسى اسەر ەتەدى. اتقا ءمىنىپ, سەرۋەندەۋ – جارىمجان بالا ءۇشىن ۇلكەن جەتىستىك. جىلقى ءجۇرىسىنىڭ تەربەلىسى بالانىڭ تىرەك-قوزعالىس جۇيەسىنە وڭ اسەر ەتەدى. مۇنى ماماندار راستايدى. اتا-اناسىنىڭ نەمەسە نۇسقاۋشىنىڭ كومەگىمەن اتپەن سەرۋەندەتۋ ارقىلى مۇمكىندىگى شەكتەۋلى بالالاردىڭ اياق-قول موتوريكاسىن دامىتۋعا, ات ۇستىندە تەپە-تەڭدىكتى ساقتاۋ ارقىلى ولاردىڭ قيمىل-قوزعالىس ۇيلەسىمىن تۇزەتۋگە بولادى. بىزگە كەلىپ جۇرگەن بالالار العاشقىداعىداي ەمەس, قازىر شيراپ قالدى. بۇل تسەرەبرالدى سال اۋرۋىن, اۋتيزم, موتورلىق جانە سويلەۋ ارەكەتتەرىن جاقسارتادى, سويلەۋ بەلسەندىلىگىن ارتتىرادى», دەيدى يپپوتەراپيا بويىنشا نۇسقاۋشى ءمولدىر راسۋلوۆا.
ايتا كەتەيىك, ءمولدىردىڭ وسى باعىتتا جۇمىس ىستەپ جۇرگەنىنە 8 جىلعا جۋىقتاپتى. ول 9 ايلىق بالانى دا يپپوتەراپيا ەمىنە اكەلگەندەر بار ەكەنىن ايتتى. مۇنى مامان قۇپتاپ وتىر. بالانىڭ بەلگىلى ءبىر جاسقا تولىپ, دياگنوزى انىقتالۋىن كۇتىپ وتىرعانشا, العاشقى بەلگىلەرىن بايقاساڭىز, بىردەن جىلقى ۇستىندە جاتتىعۋ جاساتۋ كەرەك ەكەنىنە كەڭەس بەرەدى. سونىمەن قاتار ءمولدىر پاراليمپيادالىق ات سپورتىن دامىتىپ جۇرگەن جاس مامان رەتىندە ايماققا بەلگىلى. «قابىلەتتى بالالاردى بايقاساق, ات سپورتىنا باۋلىپ, ناتيجە شىعارامىز», دەيدى ول.
ءداميلا ءتۇسىپوۆا ەكى بالاسىن دا يپپوتەراپيا ساباعىنا اپارادى. 11 جاستاعى ءايشابيبى ەسىمدى قىزىنان تسەرەبرالدى سال اۋرۋى, ال 10 جاستاعى كەرىمنەن تۋا بىتكەن اۋتيزم دياگنوزى انىقتالعان.
«ناۋرىز ايىنان باستاپ يپپوتەراپيامەن اينالىسامىز. بالالارىم مازاسىز بولاتىن. قازىر وڭ ناتيجە بايقالادى. بالالار سابىرلى بولا ءتۇستى. قىزىمنىڭ ءتۇزۋ وتىرۋى قيىندىق تۋدىراتىن. مىنە, بەس اي ءوتتى, ساباقتان قالمايمىز, سونىڭ ناتيجەسىندە تەپە-تەڭدىكتى, ءتۇزۋ وتىرۋدى ۇيرەندى. ۇلىم تۇندە مازاسىزدانىپ, ارەڭ ۇيىقتايتىن. قازىر ۇيقىسى تىنىشتالدى. وسىنداي مۇمكىندىك سىيلاعان جاندارعا ەرەكشە العىس ايتامىز. بالالارىم وسىندا كەلەمىز دەسەك, قاتتى قۋانادى. جىلقىنى جاقسى كورەدى. مۇندا ينۆاتاكسيدىڭ كومەگىمەن تەگىن قاتىناپ تۇرامىز. ءبىر كۇن بۇرىن تاپسىرىس بەرەمىز. بۇل دا ۇلكەن كومەك بولىپ تۇر», دەيدى د.ءتۇسىپوۆا.
ءسىز دە بالاڭىزدىڭ يپپوتەراپيا ەمىن قابىلداعانىن قالاساڭىز, وندا جولى وپ-وڭاي. تەك تومەندەگىدەي قۇجاتتار تولىق بولسا بولدى.
«يپپوتەراپيا قىزمەتىن قاجەت ەتسەڭىزدەر, قاراعاندى قالاسىنىڭ جۇمىسپەن قامتۋ جانە الەۋمەتتىك باعدارلامالار بولىمىنە ءوتىنىش, بالانىڭ تۋ تۋرالى كۋالىگى, مۇمكىندىگى شەكتەۋلى ەكەنىن ايعاقتايتىن انىقتاما جانە بالاعا يپپوتەراپيامەن اينالىسۋ قاجەتتىگى تۋرالى دارىگەرلەردىڭ ساراپتاماسى قاجەت. ەگەر ءوتىنىش كوبەيىپ, بالالار سانى ارتا تۇسسە, قوسىمشا قاراجات قاراستىرىلادى», دەيدى قاراعاندى قالاسىنىڭ جۇمىسپەن قامتۋ جانە الەۋمەتتىك باعدارلامالار ءبولىمىنىڭ سەكتور مەڭگەرۋشىسى گۇلجان شايماردانوۆا.
«كارات» جىلقى زاۋىتىندا يپپوتەراپيا ەمىن جۇرگىزەتىن سەرتيفيكاتى بار ءتورت جاتتىقتىرۋشى قىزمەت كورسەتەدى. الاڭداماڭىز, بالالاردىڭ قاۋىپسىزدىگى قاتاڭ ساقتالادى. ءبىر بالاعا ءۇش مامان قىزمەت كورسەتەدى. بۇعان قوسا ارنايى يپپوتەراپيا ءۇشىن جۋاس ءۇش جىلقى تاڭدالىپ الىنعان.
ات ۇستىندە وتىرعان ادامنىڭ بارلىق بۇلشىق ەتى قوزعالىستا بولادى. تەپە-تەڭدىكتى ساقتاۋ ءۇشىن سالت مىنگەن ادام بويىن جيناۋعا, ءوزىنىڭ ءاربىر دەنە قيمىلىن يگەرۋگە جاتتىعادى. ال ەرەكشە بالالارعا ەڭ كەرەگى دە وسى جاتتىعۋ. ءبىر سوزبەن ايتقاندا, جىلقى – تابيعي ترەناجەر.
قاسىمحان عالىم,
«Egemen Qazaqstan»
