مەملەكەت باسشىسى ق.توقاەۆتىڭ نازارىنداعى كاسىپكەرلىكپەن اينالىساتىن ازاماتتاردى قولداۋ جانە بيزنەستەرىن قورعاۋ جايىن ايتار بولساق, بۇل سالاعا قاتىستى زاڭ بۇزۋشىلىقتاردىڭ ورىن العاندىعىن بايقاۋ قيىن ەمەس. اسىرەسە ءتيىستى سالاعا باعىتتالعان بيۋدجەت قاراجاتىنىڭ جۇمسالۋى وبلىستىق پروكۋراتۋرانىڭ قاشاندا نازارىندا. مەملەكەتتىك ساتىپ الۋ راسىمدەرىن مۇقيات تەكسەرۋ ناتيجەسىندە جالپى قۇنى 12,7 ملرد تەڭگەگە باعالانعان
55 كونكۋرس توقتاتىلعان. سونىمەن قاتار 4,9 ملرد تەڭگەگە جوبالانعان 259 مەملەكەتتىك ساتىپ الۋ شارتتارىن زاڭعا قايشى كەلەتىندىكتەن, بۇزۋعا تۋرا كەلىپ وتىر. سول ماقساتتا جۇمىستار جۇرگىزىلۋدە. مۇنداي قيتۇرقىلىق ارەكەت نەگىزىنەن مەملەكەتتىك ساتىپ الۋدىڭ ءتاسىلىن تەرىس پايدالانىپ, ءتىپتى ولاردى جوبالىق-سمەتالىق قۇجاتتارىنسىز جاريالاۋمەن, باسەكەلەستىكتى بولدىرمايتىن جوعارى تالاپتار قويۋ سياقتى سەبەپتەرمەن تامىرلاسىپ جاتىر. مىسالى, جارما اۋدانىنداعى جولداردى جوندەۋگە ارنالعان كونكۋرستىڭ توقتاتىلۋى – سونىڭ ءبىر دالەلى. انىعىن ايتقاندا, «قازاۆتوجول» كومپانياسى جوندەۋ جۇمىستارىن جوسپارلاعان جول ۋچاسكەسىنە 294 ملن تەڭگەنى زاڭسىز جۇمساماق بولعان.
اباي وبلىستىق پروكۋراتۋراسىنىڭ مالىمەتىنشە, جالپى جيىنى مەملەكەتتىك ساتىپ الۋ ءتارتىبىن بۇزعانى ءۇشىن اكىمشىلىك جاۋاپكەرشىلىككە – 10 ادام, تارتىپتىك جاۋاپكەرشىلىككە 27 ادام تارتىلعان. ونىڭ ىشىندە 2 كەنت اكىمى جانە 2 اكىمدىك بولىمدەرىنىڭ باسشىلارى بار. قازىر بۇل فاكتىلەر ارنايى پروكۋروردىڭ وندىرىسىندە ءجىتى قارالۋدا.
مەملەكەت باسشىسى ق.توقاەۆتىڭ وتاندىق بيزنەستى دامىتۋ جانە كاسىپكەرلىكپەن اينالىساتىن ازاماتتاردىڭ قۇقىن قورعاۋ جايىن ۇنەمى تىلگە تيەك ەتەتىنى بەلگىلى. كاسىپكەرلەردى زاڭسىز تەكسەرۋگە جول بەرۋگە بولمايتىندىعى دا ءمالىم. وبلىستىق پروكۋراتۋرانىڭ ارالاسۋىمەن باقىلاۋشى ورگانداردىڭ 7 زاڭسىز تەكسەرۋلەرىنىڭ كۇشى جويىلىپ, 70 لاۋازىمدى تۇلعا تارتىپتىك جاۋاپكەرشىلىككە تارتىلعان.
«ناتيجەسىندە 3 مىڭنان استام كاسىپكەردىڭ قۇقىعى قورعالدى. اكىمشىلىك جاۋاپكەرشىلىككە بورودۋليحا اۋدانى مەملەكەتتىك كىرىستەر باسقارماسىنىڭ باسشىسى تارتىلدى. ول كاسسالىق چەكتەردى بەرمەگەنى ءۇشىن التى كاسىپكەردى اكىمشىلىك جاۋاپكەرشىلىككە تارتتى. جەكە كاسىپكەرلەرگە قاتىستى 283 زاڭسىز سالىق بۇيرىعىنىڭ كۇشى جويىلدى. ءبىزدىڭ اكتىلەرىمىز بويىنشا 230 كاسىپكەرگە 190 ملن تەڭگە تولەندى. ودان بولەك, كاسىپكەرلەرگە قاتىستى ءۇش قىلمىستىق ءىس توقتاتىلدى», دەيدى اباي وبلىسىنىڭ پروكۋرورى ە.اباەۆ.
